Lormav 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yawshawr Saflar-euq Lafkhoer Daef-eu

¹ Khoermirnae, nymq-mr Yeqsur Kali-euq lafkhoer jawr-awr, shiqshaq-euq nuikhanr maeqnan maqcan-aer, muiq-eu Saflar-euq lafkhoer canluf-eu tsawrhaq deuq-aq, yarkhaq dar-eu gar maqpar yadaq-eu mae.

² Aqjeq mirnae aernar-aq, muiq-eu Saflar-euq zanr-aq, ngaq-anr Yeqsur Kali-euq lafkhoer daef-eu jeq bif-awr, iqbax hawr-eu shir-eu jeq-euq zanr-anr nae bibuq-ir naeqlaf-euq mae.

³ Shiqshaq-euq baqda’nae zanrdawq ghaq byaev-eu mirnae, maq mrnya-eu jeq-anr Miqyaer nae mr-euq mae. Iqbax bi shadzae-eu laer Miqyaer, aqyawf-euq Zaqyo-anr iqbaxzaq lof-aer shiqshaq pi-awr bi’oe-awr, shiqshaq-euq lafkhoer anr-eu iqbax-anr yarkhaq darnaeq-euq mae.

⁴ Aqdui shiqshaq-euq maeqnan maq cantae-aer, muiq-eu Saflar-euq maeqnan cantae luf-eu ma. Khoermirnae, zanrdawq-euq lafkhoer ya’mr mae laer aertaq-euq tsaq-awr dawr-eu jeq aqdui-euq lafkhoer byanlarni, Miqyaer khoerlof-aer janr-euq mae.

⁵ Aqjeq mirnae aernar-aq, shiqshaq-anr daefcaw-eu tsawrhaq-aq, shiqshaq paw-euq garkawv-anr taef-aer noeqtsov taq-euq mae. Aerkhawf, muiq-eu Saflar-anr daefcaw-eu tsawrhaq-aq, muiq-eu Saflar-anr taf-eu deuq-anr noeqtsov taq-euq mae.

⁶ Shiqshaq paw-euq garkawv-anr noeqtsov taq-euq tsawrhaq-aq yashir-eu mae. Aerkhawf, saflar paw taf-eu deuq-anr noeqtsovtaq nar-aq, daef-eu jeq hawr-eu nuisar of-eu jeq za-eu mae.

⁷ Shiqshaq paw-euq garkawv-anr noeqtsov taq-eu-aq, Miqyaer-anr muir-eu jeq pyeuf-eu mae. Aqjeq mirnae aernar-aq, khoerlof-aer ghae-eu nuima-aq, Miqyaer-euq zanr-euq uqmov maqjawr-aer, jawr khawf maq jawrnya-a.

⁸ Shiqshaq-euq maeqnan cantae-eu tsawrhaq-aq, Miqyaer nuima tsaqni maq mrnya-a.

⁹ Miqyaer-euq Saflar, nawmaf-euq lafkhoer aqdir jawr nar-aq, nawmaf shiqshaq-euq lafkhoer maqpar jawr-aer, muiq-eu Saflar-euq lafkhoer jawr-eu mae. Tsawrhaq tiq ghaq-euq lafkhoer Kali-euq Saflar maqjawr nar-aq, khoerghaq Kali-anr maqtaf-a.

¹⁰ Kali, nawmaf-euq lafkhoer jawr nar-aq, iqbax-euq baqda’nae mawrdo shir-euq khawf, tsaq-awr dawr-eu jeq-euq baqda’nae, muiq-eu Saflar-euq lafkhoer yadaef taef-a.

¹¹ Khoeruqtaf, Yeqsur-anr shir-euq gar nae bi ghofdaef lar-euq ghaq-euq Saflar, nawmaf-euq lafkhoer jawr nar-aq, Yeqsur Kali-anr shir-euq gar nae bi ghofdaef lar-euq ghaq, nawmaf-euq lafkhoer jawr-eu aqyawf-euq Saflar-anr ghoe-awr, nawmaf-euq shirnya-eu mawrdo-anr khawf bi ghofdaeflar taef-a.

¹² Khoermirnae, aqyuif aqnyir deuq-or! Aqdui dzirdzov dav-eu tsawrhaq ma. Aerkhawf, shiqshaq-anr daefcaw-eu gharduq shiqshaq-anr dzirdzov dav-eu maqngeur.

¹³ Nawmaf shiqshaq-anr daefcaw nar-aq yashir taef-a. Aerkhawf, muiq-eu Saflar-anr ghoe-awr, mawrdo mr-awr shar-eu jeq-anr lavsaef nar-aq yadaef taef-a.

¹⁴ Miqyaer-euq Saflar khar sheuqghae-eu tsawrhaq-aq, Miqyaer-euq zaq mae.

¹⁵ Nawmaf parya guvni zaqkhav-euq saflar zataq-euq maqngeur-a. Nawmaf-aq, zaq sheuqcu-eu, muiq-eu Saflar zataq-euq mae. Khoermirnae, aqdui “Aqba, Aqda-or” laer kur-eu ma.

¹⁶ Aqdui-aq, Miqyaer-euq zaq mae laer muiq-eu Saflar, aqdui-euq saflar naeq-aer sarkir kamq-eu mae.

¹⁷ Aqyawf-euq zaq pyeuf-eu ngeur nar-aq, jeqbir of-eu tsawrhaq khawf pyeuf-eu mae. Kali naeq-aer tiqkawv lof-aer yawshaef khanqsaer za’ni, aqdui, aqyawf naeq-aer shaqzanq daq nar-aq, aqdui khawf Miqyaer-euq jeqbir of-eu tsawrhaq pyeuf-awr, Kali naeq-aer tiqkawv lof-aer jeqbir of-eu tsawrhaq pyeuf taef-a.

Aqkar Za-eu Yawshaef Khanqsaer

¹⁸ Ngar heulof-aer sharnoeq-eu ma. Heuzir-anr yadaq-eu shaqzanq-aq, aqkar aqdui-anr panmaeq naeqlaf-eu yawshaef khanqsaer-anr tiqpawf-iq sheucaevnyaf maqnyeuv-a.

¹⁹ Khar baetaq-euq jeq, Miqyaer-euq zaqdeuq dovle-eu gar mawrmawf-awr, noeqtmq duidui-eu lafkhoer lofluf-eu mae.

²⁰ Khar baetaq-euq jeq yawqngaef-euq uqmov jawrluf-eu mae. Khoerlof-aer jawrmawf-awr jawr-eu maqngeur-a. Khoerlof-aer bijawr-euq ghaq, noeqtmq-eu jeq-euq uqmov bijawr-euq mirnae jawrluf-eu mae.

²¹ Khoer-aq, baetaq-euq yawqjeq navluf peuq-ir cawv-ir-eu jeq-euq baoq-euq uqmov, paftawf taq-euq jeq-anr nae buq-ir-awr, Miqyaer-euq zaqdeuq-euq buq-ir-euq yawshaef khanqsaer-anr za taef-a.

²² Aqjeq mirnae aernar-aq, baetaq-euq yawqjeq navluf nymq-mr keuvni tiqkawv lof-aer shaqzanq naf-awr, maq kamqcoerni teuvluf manrluf-eu gar aqdui siqnya-eu ma.

²³ Khar baetaq-euq deuq taef-aer maqngeur-aer, muiq-eu Saflar-euq arsiq siqbae baele-euq aqdui khawf, aqdir aqyawf-euq zaq pyeuflar-awr, aqdui-euq mawrdo heu kakhof-eu jeq za-eu gar nuima keuv-awr lofluf ngae, yawqha-euq nuima-euq lafkhoer yawqha manrluf-eu ma.

²⁴ Noeqtmq-eu jeq-euq baqda’nae aqdui kakhof-eu jeq za-euq ma. Noeqtmq taq-euq jeq-anr ya’mawr nar-aq, khoer-aq, noeqtmq-eu jeq maqpar ngeur-eu mae. Ya’mawr-euq jeq-anr aqsur ghaq par noeqtmq-eu?

²⁵ Aerkhawf, aqdui maqmawr-euq jeq-anr noeqtmq luf-eu nar-aq, oror-aer nuima keuv-eu lafkhoer dawq-eu jeq pyeuf-eu mae.

²⁶ Khoerlof-aer durni, aqdui ghaq baq ngae, muiq-eu Saflar cawba naeqlaf-eu mae. Aqdui guiqlanq aqjox-aer shar-eu tsaq-eu la laer maq siqnya-eu khawf, muiq-eu Saflar, dawq maq ngaeqdovlaf nya-eu jeq manrmanr-aer aqdui-euq gharduq guiqlanq shardan-eu mae.

²⁷ Tsawrhaq-euq nuima-anr povtser haw-eu Miqyaer-aq, muiq-eu Saflar-euq nuinoeq-anr siqnya-eu mae. Aqjeq mirnae aernar-aq, muiq-eu Saflar-aq, tsawrshawr deuq-euq gharduq Miqyaer nuima tsaq-eu lof-aer guiqlanq shardan-eu mae.

²⁸ Miqyaer, aqyawf-anr khargaq-eu tsawrhaq-euq gharduq, yawqjeq navluf-euq lafkhoer nae, yawmuiq jeq bi dovlar-eu mae laer aqdui siqnya ma. Miqyaer nae noeqtaq-euq lof-aer pyeuflarni, aqyawf, tsawrhaq khoerdeuq-anr kur-euq mae.

²⁹ Aqjeq mirnae aernar-aq, aqyawfmaf, aqyawf-euq Zaqyo-euq shaevdzeuf anrlarni, yawbae ngae nae Miqyaer siqnya-awr tserdov taq-euq mae. Maernmr ghawqmya ghaq-anr nae, aqyawf-euq Zaqyo-anr huqbaw zaqyo ghaq bigeuf-eu laer Miqyaer khoerlof-aer janr-euq mae.

³⁰ Khoeruqtaf, yawbae ngae nae aqyawf nae tserdov taq-euq tsawrhaq-anr aqyawf kur-euq mae. Aqyawf nae kur-euq deuq-anr mrshawr-euq tsawrhaq bi pyeuflar-euq mae. Aqyawf nae mrshawr-euq deuq-anr aqyawf-euq yawshaef khanqsaer biza-euq mae.

Maq Lavghawq Nya-eu Gaq-eu Jeq

³¹ Heu-euq garkawv aqdui aqjox-aer aer nmr-mq? Miqyaer, aqdui jawr-eu paw pyawq nar-aq, aqdui-anr aqsur ghaq lavtsoeqlar nya-eu?

³² Miqyaer cirkhof maqkhof-aer aqyawf-euq Zaqyo khawfni, aqdui dawqtawv luf-euq gharduq bifnaeq lef-euq ngeur nar-aq, aqyawf-euq Zaqyo naeq-aer tiqkawv lof-aer aqyawf kharjav-eu yawqjeq navluf, aqdui-anr yawqngaef-aer bifnaeq lef-eu maqngeur-ar lor?

³³ Miqyaer nae tserdov taq-euq tsawrhaq-anr aqsur ghaq iqbax taqnya-eu la? Miqyaer nae aqyawf maf-anr mrshawr-euq tsawrhaq bi pyeuflar-euq mae.

³⁴ Aqyawfmaf yawlaeq mae laer yarkhaq darnya-eu aqsur ghaq la? Yeqsur Kali-aq, shir-euq khawf ghofdaef lar-awr, nymq-mr Miqyaer-euq armar paw jawr-awr nae aqdui-euq gharduq guiqlanq shardan luf-eu mae.

³⁵ Aqsur ghaq, aqdui-anr Kali-euq gaq-eu jeq-anr nae lavghawqlar nya-eu la? Yadaq duidui-eu jeq, shaq-awr zanq-eu jeq, khaeq-awr khav-eu jeq, maef-awr shuf-eu jeq, nermyawvni yashaq-eu jeq, guv-awr gav-eu jeq hawr-eu mizaq micaer, heudeuq-a lor?

³⁶ Yaerbof-euq lafkhoer boftaq-euq lof-aer, “Nawq-euq gharduq, nga’maf nan’ga-i saef-eu gar ya daqluf-eu ma. Nga’maf-aq, yabi saef-eu laer ghae-eu yawr lof-aer bi sawxtaq-euq ma.” (Jc 44:22)

³⁷ Aerkhawf, aqdui-anr gaq-eu ghaq-anr ghoe-awr, heudeuq dawqtawv luf-anr yawmuiq-aer ghaqler jir-euq ma.

³⁸ Aqjeq mirnae aernar-aq, ngar heulof-aer janduq taq-euq ma. Shir-eu jeq, daef-eu jeq, mqtav ghaqkhaer, dzoeqdzaq mrluf-eu deuq, baoq jav-eu deuq, nymq-mr jav-eu jeq, aqkar javle-eu jeq,

³⁹ yawgor jeq, yawnaf jeq, khar baetaq-euq aqgeu jeq maqkaq, aqdui-euq Sanqpaq Yeqsur Kali-euq lafkhoer anr-eu, Miqyaer, aqdui-anr gaq-eu jeq-anr nae maq lavghawqlar nya-a.