Lormav 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer Sarjax Zif-eu

¹ Yurdav tsawrhaq, aqcawq navmaqtser aqjeq guiqlanq huiqdzaeq-eu la? Maqngeur nar-aq, bawkhov maeqdzaq yaeq-euq baqda’nae aqjeq gardanr tsoeq-eu la?

² Yawqdzer dzaq-anr navluf gardanr zawr tsoeq-eu mae. Uqdzan jeq-aq, Miqyaer-euq dawq aqyawf maf-anr a’naeq taq-euq mae.

³ Aqyawfmaf tiqpavnav deuq maqjan-eu khawf aqjeq parngeur-eu? Aqyawfmaf maqjan-eu mirnae, Miqyaer-euq sarjax zif-eu jeq-anr lavcawv-eu la lor?

⁴ Tiqpawf-iq maqngeur-a. Tsawrhaq dawqtawvluf jaqmyawf pyeufjir-euq khawf, (Jc 116:11) Miqyaer-aq, tsaq-awr dawr-eu mae. Yaerbof-euq lafkhoer boftaq-euq lof-aer, “Nawq-euq dawq baqda’nae, nawr-aq, dawr-awr tsaq-eu nga laer dovlar-awr, Nawq-anr yarkhaq darlar ngae nawr ghaqler taef-a.” (Jc 51:4)

⁵ Aqdui-euq maqtsaq maqdawr-eu jeq-euq baqda’nae, Miqyaer-euq tsaq-awr dawr-eu jeq bi dovlar nar-aq, aqdui aqjox-aer aer-eu tsaq la? Miqyaer maqtsaq maqdawr-eu lafkhoer, aqyawf nuima paer-eu jeq bi keuvle-eu nga laer aer-eu lor? (Ngar-aq, tsawrhaqzaq noeq-eu lof-aer aer-eu taef ma.)

⁶ Khoerlof-aer maqngeur-a. Khoerlof-aer ngeur-eu law nar-aq, Miqyaer, mirtsaqzaq-anr yarkhaq aqjox-aer dar nmr-mq?

⁷ Ngar jaqmyawf myawf-eu mirnae, Miqyaer-euq yawtsaq yawdawr jeq-anr yawshaef khanqsaer bi dovlar dzaeq-eu ngeur nar-aq, aqjeq mirnae ngaq-anr iqbaxzaq lof-aer yarkhaq darluf-eu la?

⁸ “Yawmuiq jeq dovlarni, aqdui yawdoer jeq mr kar-eur” laer maqaer nya-a lor? Nga’maf khoerlof-aer aer-eu mae laer tsawrhaq tiqpavnav deuq yaeqbawq-aer jabu jadoer-eu mae. Khoerlof-aer aer-eu deuq-aq, yarkhaq dar-eu gar bidaq-eu tsaq mae.

Tsaq-awr Dawr-eu Tsawrhaq Maqjawr-a

⁹ Tox-aer mar-iq, aqdui, Yurdav tsawrhaq-aq, aqcawq-euq navmaqtser muiqdzaeq-eu le lor? Tiqpawf-iq maqngeur-a. Aqjeq mirnae aernar-aq, Yurdav tsawrhaq hawr-eu Heqlaqsar tsawrhaq dawqtawvluf iqbax-euq lafov jawrluf-eu mae laer nga’maf jashawdzeur yaf-euq ma.

¹⁰ Yaerbof-euq lafkhoer heulof-aer boftaq-euq mae, “Tsaq-awr dawr-eu tsawrhaq maqjawr-a, tiqghaq-iq maqjawr-a.

¹¹ Ghovshaw nya-eu tsawrhaq tiqghaq-iq maqjawr-aer, Miqyaer-anr sharpov-eu tsawrhaq khawf tiq ghaq taef-aer khawf maqjawr-a.

¹² Tsawrhaq dawqtawvluf garbanq banq-ir-awr, Yawqghaq navluf tiqgar durni gardanr maqtsoeq-eu tsawrhaq pyeuflar-euq mae. Yawmuiq jeq mr-eu tsawrhaq maqjawr-a, tiqghaq-iq maqjawr-a.” (Jc 14:1-3; 53:1-3)

¹³ “Aqyawf maf-euq kuqbyanq-aq, pantaq-euq lmqbymr pyeuf-eu mae. Aqyawf maf-euq maeqlar nae myawfdzaq shuirdzaq-awr,” “Aqyawf maf-euq maeqluq-euq lafkhoer paw, dof khav-eu arlawr uirnav-euq dof anr-eu uqtaf.” (Jc 5:9; 140:3)

¹⁴ “Khaqmae-euq lafkhoer yaqkhaer yaq-eu dawq hawr-eu khaqjawfni ghae-eu dawq tiqbyan anr-eu mae.” (Jc 10:7)

¹⁵ “Aqyawf maf-euq aqkuir-aq, aqcawq-euq shiq lavyoer-eu yawkawr mae.

¹⁶ Aqyawf maf-euq garma-aq, lavcawv-eu jeq hawr-eu noeqshaq-eu jeq jav-eu mae.

¹⁷ Aqyawfmaf nuisar of-eu garma maq siqnya-a.” (Isy 59:7-8)

¹⁸ “Aqyawf maf-euq myavkhae, Miqyaer-anr guv-eu jeq maqjav nga.” (Jc 36:1)

¹⁹ Zanrdawq-euq lafkhoer khar boftaq-euq dawqdeuq-aq, zanrdawq-euq lafov jawr-eu tsawrhaq-anr aernaeq-eu mae laer aqdui siqnya-eu ma. Khoer-aq, tiqghaq-iq daeqlaefkhar maqbi za-aer, mirtsaqzaq dawqtawvluf Miqyaer-euq maeqshi yawlaeq ngar-a laer bi dovlar-eu gharduq mae.

²⁰ Zanrdawq-anr mrcaw-eu baqda’nae, tsawrhaq tiqghaq-iq Miqyaer-euq maeqshi tsaq-awr dawr-eu tsawrhaq maq pyeuflar nya-a. Aqjeq mirnae aernar-aq, zanrdawq-euq baqda’nae iqbax-anr siqnya-eu tsawrganr anrlar-eu mae.

Tsaq-awr Dawr-eu Tsawrhaq Pyeuflar-eu

²¹ Aerkhawf, nymq-mr zanrdawq-anr maqtaf-eu, Miqyaer-anr nae dovle-euq tsaq-awr dawr-eu jeq-anr panmaeq naeqlaf-euq mae. Garkawv heu-aq, zanrdawq hawr-eu Miqyaer gharduq ngaeqdan-eu deuq-euq sanqbof-euq lafkhoer sarkirkamq taq-euq mae.

²² Yeqsur Kali-anr kharjan-eu tsawrhaq dawqtawvluf, aqyawfmaf jan-eu lafkhoer, Miqyaer-euq tsaq-awr dawr-eu jeq-anr za-euq mirnae, beugar-eu tiqjeq-iq maqjav-a.

²³ Aqjeq mirnae aernar-aq, tsawrhaqzaq dawqtawvluf iqbax mr-awr, Miqyaer-euq yawshaef khanqsaer-anr nae kaq-ir taq-euq mae.

²⁴ Aerkhawf, nymq-mr-aq, Miqyaer-euq guiqlanq yawdzanr baqda’nae, Yeqsur Kali-euq lafkhoer anr-eu kakhof-eu jeq-anr ghoe-awr, yawqngaef-aer mrshawr naeqlaf-euq mae.

²⁵ Miqyaer, Yeqsur Kali-anr lawrbyan-eu jeq lof-aer tserdov taq-euq mae. Jan-eu lafkhoer Yeqsur-euq shiq-anr ghoe-awr, aqyawf-euq tsaq-awr dawr-eu jeq bi dovlar-eu gharduq, Miqyaer ornya-eu nuima nae, dzeurlaf ngae tsawrhaq nae mr-euq iqbax-anr aqyawf hawdzeur-euq mae.

²⁶ Khoer-aq, aryamq heu-euq lafkhoer, aqyawf-euq tsaq-awr dawr-eu jeq panmaeq naeq-eu gharduq mae. Aqyawf-aq, tsaq-awr dawr-eu ghaq pyeuf-awr, Yeqsur-anr kharjan-eu tsawrhaq-anr mrshawr-eu ghaq pyeuf-eu ngar-a laer bi dovlar-eu gharduq mae.

²⁷ Tox-aer ngeur nar-aq, aqjeq-anr nuima huiqkhar za-eu la? Nuima huiqkhar maqza-a. Zanr hawr-eu mr-awr shar-eu baqda’nae la lor? Maqngeur-a, jan-eu jeq-euq zanr baqda’nae mae.

²⁸ Khoermirnae, zanrdawq-anr mrcaw-eu gar maqtafni, jan-eu baqda’nae taef-aer bi mrshawr-euq tsawrhaq pyeuflar-euq mae laer nga’maf sawx-eu ma.

²⁹ Miqyaer-aq, Yurdav tsawrhaq-euq Miqyaer taef-a lor? Aqyawf-aq, aqcawq tsawrjeuq tsawrca-euq Miqyaer khawf pyeuf-eu maqngeur-a laq? Ngeur mae. Aqcawq tsawrjeuq tsawrca-euq Miqyaer khawf pyeuf-eu mae.

³⁰ Bawkhov maeqdzaq yaeq-euq tsawrhaq jan-eu mirnae, tsaq-awr dawr-eu tsawrhaq bi pyeuflar-awr, bawkhov maeqdzaq maqyaeq-euq tsawrhaq khawf jan-eu mirnae, tsaq-awr dawr-eu tsawrhaq bi pyeuflar nya-eu ghaq-aq, Miqyaer tiq ghaq jawr-eu taef mae.

³¹ Tox-aer ngeur nar-aq, aqdui jan-eu jeq-anr ghoe-awr zanrdawq-anr lavbyov-eu nga lor? Maqngeur, zanrdawq-anr lavzif-eu ma.