Lormav 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawrcoeni Yarkhaq Dar-eu

¹ Aqcawq-anr yarkhaq dar-eu tsawrhaq deuq-or! Nawr aqsur ghaq maqkaq, tiqjeq-anr-iq daeqlaefkhar maqza-a. Aqjeq mirnae aernar-aq, nawr, aqcawq-anr yarkhaq dar-eu khoer-aq, yawqhar yawqha yarkhaq dar-eu mae. Aqjeq mirnae aernar-aq, aqcawq-anr yarkhaq dar-eu nawr khawf, aqyawf lof-aer mrluf-eu mae.

² Aerkhawf, Miqyaer khoerlof-aer ghae-eu tsawrhaq-anr yarkhaq darnaeq-eu-aq, yawtsaq yawdawr-euq lafkhoer dar-eu mae laer aqdui siqnya ma.

³ Tsawrhaqzaq-or! Khoerlof-aer mrluf-eu tsawrhaq-anr nawr yarkhaq dar-awr, nawr ghae khoerlof-aer mrluf-eu khawf, nawr ghaq-aq, Miqyaer darnaeq laf-eu gar nae yabuq-ir taef-a laer noeq-eu le lor?

⁴ Maqngeur nar-aq, aqyawf-euq sanr duidui-eu yawmuiq jeq, ornya-eu jeq, nuinoeq ghawqmanrni noeq-eu jeq-anr nawr yaeqbawq saerlu-aer ghae-eu le laq? Nawr noeqpov noeqparlar nya’ni, Miqyaer-euq yawmuiq jeq, nawq-anr sheuqghaeluf nga laer nawr maq siqnya-eu le lor?

⁵ Nawr nuima ghanr-awr nuima maq noeqpov maq noeqpar-eu mirnae, Miqyaer nuima paer-eu arnan khoernan-euq gharduq aqyawf nuima paer-eu jeq-anr nawr povuiq luf-eu mae. Khoernan keuvle ngae, Miqyaer tsaq-awr dawr-eu lafkhoer byacaevni yarkhaq dar-eu gar ya’mawr taef-a.

⁶ “Tsawrhaq yawqghaq navluf-anr yawqha nae mr-euq lof-aer geuxni, Miqyaer janrkhofnaeq taef-a.”

⁷ Nuima zifdanni or-eu lafkhoer yawmuiq jeq mr-awr, yawshaef khanqsaer hawr-eu taqhuiq taqmanr-eu jeq-anr pov-eu uqtaf, maqbyov-ir maqcawv-ir nya-eu jeq-anr pov-eu tsawrhaq-aq, mqmaq maqbyav yarzir daef-eu jeq za taef-a.

⁸ Aerkhawf, yawqha-euq gharduq taef-aer sharnoeq-eu tsawrhaq hawr-eu yawtsaq yawdawr dawq-anr maq narhaq geuf-aer, maqtsaq maqdawr-eu jeq-anr narhaq geuf-eu tsawrhaq-euq khoertav, Miqyaer nuima dav-awr nuima paer-eu jeq keuvle taef-a.

⁹ Yawdoer jeq kharmr-eu tsawrhaq dawqtawv luf-euq khoertav, shaqdui zanq duidui-eu jeq hawr-eu noeqdui noeqduir-eu jeq keuvle taef-a. Yurdav tsawrhaq-anr jeqhu keuvle-awr, Heqlaqsar tsawrhaq-anr keuvle taef-a.

¹⁰ Aerkhawf, yawmuiq jeq kharmr-eu tsawrhaq yawqghaq navluf, yawshaef khanqsaer, taqhuiq taqmanr-eu jeq hawr-eu nuisar of-eu jeq za taef-a. Yurdav tsawrhaq-anr jeqhu keuvle-awr, Heqlaqsar tsawrhaq-anr keuvle taef-a.

¹¹ Aqjeq mirnae aernar-aq, Miqyaer myavpyawq huiqnyir maqtser-a.

Zanrdawq Hawr-eu Yarkhaq Dar-eu Jeq

¹² Zanrdawq maqjav-aer iqbax kharmr-euq tsawrhaq-aq, zanrdawq-anr maqtaf-aer yacawv-ir taef-a. Zanrdawq jav-eu gar nae iqbax kharmr-euq tsawrhaq-aq, zanrdawq aertaq-euq lof-aer yarkhaq dar-eu gar yadaq taef-a.

¹³ (Zanrdawq-anr yagaq-euq mirnae, Miqyaer-euq maeqshi tsaq-awr dawr-eu tsawrhaq pyeuflar-eu maqngeur-a. Zanrdawq-anr mrcaw-euq tsawrhaq deuq taef-aer mrshawr-euq tsawrhaq pyeuflar-eu mae.

¹⁴ Zanrdawq maqjav-eu aqcawq tsawrjeuq tsawrca deuq, zanrdawq maqjav-eu khawf, aqyawfmaf, yawqhar yawqha noeqsiq-awr, zanrdawq aertaq-euq lof-aer mr nar-aq, mr-eu khoer aqyawf maf-euq gharduq zanrdawq pyeuf-eu mae.

¹⁵ Zanrdawq aertaq-euq lof-aer, aqyawf maf-euq nuima-euq lafkhoer boftaq-euq nga laer mawrlar-eu mae. Aqyawf maf-euq zaqsiq nuisiq khawf, sarkir kamq-eu mae. Khoermirnae, aqyawf maf-euq yawkaq iqbax taqnya-awr, tsaq ngar-a laer khawf aernya-eu mae).

¹⁶ Ngar guiqlanqdawq maeq-eu lof-aer, Miqyaer, Yeqsur Kali-anr ghoe-awr tsawrhaqzaq nae zaftaq-euq jeq-anr yarkhaqdar ngae nan, heulof-aer pyeuflar taef-a.

Yurdav Tsawrhaq Hawr-eu Zanrdawq

¹⁷ Nawr aqdir Yurdav tsawrhaq ma laer aer-awr, zanrdawq-anr ghoe-eu uqtaf, Miqyaer-anr taf-eu jeq-anr khanqsaer jaev-eu mae.

¹⁸ Nawr, Miqyaer nuima tsaq-eu jeq siqnya-awr, zanrdawq-anr yadzaw-euq mirnae, zawr muiq-eu jeq-anr tserpav birpav nya-eu mae.

¹⁹ Nawr, myavbaef-anr garma sheuqmaeq-eu tsawrhaq pyeuf-awr, yawzanr-euq lafkhoer jawr-eu tsawrhaq-anr yawshaef bya’naeq-eu tsawrhaq pyeuf-eu ma laer yawduq baw-eu mae.

²⁰ Aqdzawq argan deuq-anr maeqpar tsovpar-eu tsawrhaq pyeuf-awr, zaqdeuq-euq saqlaq ma laer nawr sawxtaq-euq mae. Zanrdawq-euq lafkhoer, siqnya-eu tsawrganr hawr-eu yawtsaq yawdawr jeq anr-eu ma laer nawr noeqtaq-euq mae.

²¹ Nawr, aqcawq-anr maeqnaeq tsovnaeq-eu khawf, yawqhar yawqha maqmaeq-eu le lor? Nawr, aqcawq-anr smrkhoeq taqkhoeq laer dawqmaeq maeq-eu khawf, nawr ghaq parkhoeq-eu le laq?

²² Nawr, “Aqcawq-euq miqzaq yozaq-anr taqbanq taqjoe” laer aerluf-eu khawf, nawr ghaq parbanq parjoe-eu le lor? Nawr, tanqpanq aqma mawrkawr-anr nuidav dav-eu khawf, uqduq tanqnymr nymrma-euq lafkhoer jav-eu myawqdeuq tanrjoe joeluf-eu le laq?

²³ Nawr zanrdawq-anr ghoe-awr khanqsaer jaev-eu khawf, zanrdawq-anr mrbanq mrbanq-aer, Miqyaer-euq tsawrmyanr-anr lavcawv luf-eu le lor?

²⁴ Yaerbof-euq lafkhoer boftaq-euq lof-aer, “Nawmaf-euq baqda’nae, aqcawq tsawrjeuq tsawrca, Miqyaer-euq tsawrmyanr-anr yaeqbawq saerlu-aer aerluf-eu mae.” (Isy 52:5)

²⁵ Nawr zanrdawq-anr narhaqgeuf nar-aq, bawkhov maeqdzaq yaeq-euq khoer, nawq-anr gardanr tsoeq-eu mae. Aerkhawf, nawr zanrdawq-anr mrbanq nar-aq, nawr bawkhov maeqdzaq yaeq-euq khawf, maqyaeq-euq tsawrhaq pyeuflar-eu mae.

²⁶ Khoermirnae, bawkhov maeqdzaq maqyaeq-euq tsawrhaq, tsaq-awr dawr-eu zanrdawq-euq zanrtaq khoftaq-anr narhaqgeuf nar-aq, aqyawf bawkhov maeqdzaq maqyaeq-euq khawf, bawkhov maeqdzaq yaeq-euq tsawrhaq lof-aer sawx-eu maqngeur-a lor?

²⁷ Boftaq-euq zanrdawq jav-awr, shiqshaq paw bawkhov maeqdzaq yaeq-euq khawf, nawr zanrdawq-anr mrlaeq-euq nar-aq, bawkhov maeqdzaq maqyaeq-euq khawf, zanrdawq mrbyan-eu tsawrhaq nae nawq-anr yarkhaq yabi dar-eu maqngeur-a laq?

²⁸ Aqjeq mirnae aernar-aq, lafnyir paw taef-aer Yurdav tsawrhaq geuf-eu ghaq-aq, aqdir Yurdav tsawrhaq maqngeur-a. Shiqshaq lafnyir paw taef-aer bawkhov maeqdzaq yaeq-euq tsawrhaq khawf, aqdir bawkhov maeqdzaq yaeq-euq maqngeur-a.

²⁹ Lafkhoer paw Yurdav tsawrhaq pyeuf-eu ghaq taef-aer aqdir Yurdav tsawrhaq mae. Aqdir bawkhov maeqdzaq yaeq-euq tsawrhaq-aq, nuima-euq lafkhoer yaeq-eu mae. Boftaq-euq zanrdawq khofdawq-euq baqda’nae maqngeur-a, muiq-eu Saflar baqda’nae mae. Khoerlof-aer ghae-eu tsawrhaq-anr jaceuq-eu-aq, tsawrhaq maqngeur-a, Miqyaer mae.