Lormav 14 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yarkhaq Dar-eu Taqkawr

¹ Nawmaf jan-eu paw ghaq baq-eu tsawrhaq deuq-anr hageuf-awq. Aerkhawf, nuinoeq beugar-eu garkawv-anr tsawrpyaer taqpyaer.

² Ngar yawqjeq navluf dzaqnya ma laer tsawrhaq tiqghaqnav jan-eu mae. Aerkhawf, jan-eu paw ghaq baq-eu tsawrhaq deuq-aq, ghawqpaf ghawqnyoer taef-aer dzaq-eu mae.

³ Dzaq-eu ghaq, maqdzaq-eu ghaq-anr taq hawdoer. Maqdzaq-eu ghaq khawf dzaq-eu ghaq-anr yarkhaq taqdar. Aqjeq mirnae aernar-aq, Miqyaer, aqyawf-anr hageuf ghaq-euq mae.

⁴ Aqcawq-euq kuirlaf zaqkhav-anr yarkhaqdar paq-aer nawr aqsur ghaq le? Aqyawf yawfzif nya-eu hawr-eu coq-ir-eu khoer-aq, aqyawf-euq yawsanr ghaq navni jav-eu mae. Aqyawf yawfzifnya taef-a. Aqjeq mirnae aernar-aq, aqyawf yawfnya’ni Sanqpaq Miqyaer janrnya-eu mae.

⁵ Tsawrhaq tiqghaqnav, heunan-aq, khoernan navmaqtser muiqdzaeq-eu mae laer taqhuiq-awr, tiqghaq nav-aq, yawqnan navluf tiqkawv mae laer noeq-eu mae. Aerkhawf, yawqghaq navluf yawqha-euq nuima-euq lafkhoer tiqbyanni janduq taq-euq jeq bijav-awq.

⁶ Arnan tiqnan nav-anr lan-eu tsawrhaq-aq, Sanqpaq Miqyaer-anr noeqkeuv-awr lan-eu mae. Maqlan-euq tsawrhaq khawf, Sanqpaq Miqyaer-anr noeqkeuv-eu lafkhoer maqlan-eu mae. Dzaq-eu tsawrhaq khawf, Sanqpaq Miqyaer-anr noeqkeuv-awr dzaq-eu mae. Aqjeq mirnae aernar-aq, aqyawf, Miqyaer-anr jaceuq-awr dzaq-eu mae. Maqdzaq-eu tsawrhaq khawf, Sanqpaq Miqyaer-anr noeqkeuv-eu lafkhoer maqdzaqni, Miqyaer-anr jaceuq-eu mae.

⁷ Aqdui tiqghaq-iq yawqha-euq gharduq daef-eu maqngeur. Tiqghaq-iq yawqha-euq gharduq shir-eu khawf maqngeur.

⁸ Aqdui yadaef nar-aq, Sanqpaq Miqyaer-euq gharduq daef ma. Aqdui yashir nar-aq khawf, Sanqpaq Miqyaer-euq gharduq shir ma. Khoermirnae, aqdui daef-eu maqaer, shir-eu maqkaq, aqdui-aq, Sanqpaq Miqyaer-euq pyeuf-eu ma.

⁹ Heu-euq baqda’nae, shir-euq tsawrhaq hawr-eu daefluf-eu tsawrhaq-euq Sanqpaq Miqyaer pyeufni, Kali shir-awr ghofdaef lar-awr daefluf-eu mae.

¹⁰ Aerkhawf, nawr aqjeq mirnae nawq-euq maernmr-anr yarkhaq dar-eu le? Nawr aqjeq mirnae nawq-euq maernmr-anr hawdoer-eu le? Aqdui yawqghaq navluf Kali yarkhaq dar-eu nuirmanq-euq maeqshi ya yawfler-eu mae.

¹¹ Yaerbof-euq lafkhoer boftaq-euq, “Sanqpaq Miqyaer aer-eu, Ngar-aq, aqmyanluf daefluf ma. Yawqghaq navluf, ngaq-euq maeqshi pawqtsuif pawqdmq ya dmqlar-awr, Maeqlar yawqlar navluf, Miqyaer-euq maeqshi ya aerdov taef-a.” (Isy 49:18; 45:23)

¹² Khoermirnae, aqdui yawqghaq navluf yawqha-euq garkawv yawqha Miqyaer-anr ya dzawrnaeq-eu mae.

Aqyuif Aqnyir Sanqtiftif Paq-aer Taqjanr

¹³ Khoermirnae, aqkar nar-aq, aqdui tiqghaq tirghaq yarkhaq maqpar dar-aer, aqdui-euq maernmr sanqtif bitif-awr, bicoq-ir paq-aer maqpar janr-eu ma laer noeqtsaev kar-eur.

¹⁴ Sanqpaq Yeqsur-euq baqda’nae aqgeu jeq maqkaq, aqyawxyawf maqshawr-eu tiqjeq-iq maqjav-a laer ngar siqnya-awr, janduq lar-euq ma. Aerkhawf, aqgeu jeq maqkaq maqshawr-a laer tsawrhaq tiqghaqnav noeq nar-aq, aqyawf-euq gharduq maqshawr-eu jeq pyeuf-eu mae.

¹⁵ Nawq-euq dzaqdzaq dawrdawr-euq baqda’nae nawq-euq maernmr-anr bi noeqshaq nar-aq, nawr-aq, gaq-eu lafkhoer daefluf-eu maqngeur-a. Nawq-euq dzaqdzaq dawrdawr-euq baqda’nae, Kali nae shirdan-euq nawq-euq maernmr-anr taq lavcawv.

¹⁶ Nawq-euq yawmuiq jeq-anr aqcawq jadoerduq taqbi pyeuf.

¹⁷ Aqjeq mirnae aernar-aq, Miqyaer uvlanr-eu jeq-aq, dzaq-awr dawr-eu garkawv maqngeur-a. Yawshawr Saflar-euq lafkhoer, tsaq-awr dawr-eu, nuisar of-eu hawr-eu laqkhaq caer-eu jeq pyeuf-eu mae.

¹⁸ Kali-euq gharduq mr-eu tsawrhaq-anr Miqyaer nuikhanr shir-awr, tsawrhaqzaq khawf nuima tsaq taef-a.

¹⁹ Khoermirnae, aqdui tsaqler dzoerlerni hawr-eu tiqghaq tirghaq bihuiq bi manrlarni mr kar-eur.

²⁰ Dzaqdzaq dawrdawr-euq baqda’nae, Miqyaer-euq gar-anr taq lavcawv. Dzaqdzaq dawrdawr dawqtawvluf yawshawr mae. Aerkhawf, tsawrhaq tiq ghaq, dzaqdzaq dawrdawr-euq baqda’nae aqcawq-anr sanqtif bitif nar-aq, dzaq-eu khoerghaq yawdoer jeq mr-euq mae.

²¹ Shaqjir dzaq-awr, aqgaf dzaruir dawr-eu uqtaf, tiqjeqnav mr-eu baqda’nae nawq-euq maernmr-anr sanqtif bitif-awr, bitov-ir-eu uqtaf, ghaq bibaq-ir paq-aer ghae-eu jeq maqmr nar-aq yawmuiq mae.

²² Nawr nuijan anr-eu le laq? Nuijan khoer Miqyaer hawr-eu yawqha-euq yawkaq bijav-awq. Yawqha nae tsaq nga laer noeq-awr mr-awr shar-euq jeq-euq baqda’nae, yawqhar yawqha iqbax taq-eu jeq maqjav nar-aq, guiqlanqhuiq taef-a.

²³ Tsawrhaq tiq ghaq, jan-eu povpov lavlav-aer ghae-eu lafkhoer dzaq nar-aq, yarkhaq dar-eu gar yadaq taef-a. Aqjeq mirnae aernar-aq, aqyawf-aq, jan-eu lafkhoer dzaq-euq maqngeur-a. Maqjan-eu lafkhoer kharmr-eu yawqjeq navluf iqbax mae.