Jaceuq 54 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nawq-euq Tsawrmyanr Nae Ngaq-anr Kakhof Naeqlaf-awq

Car-eu paw sheuqghae-eu aqyuif ghaq-anr bofnaeq-euq, arcav tsof-eu keuka zmq-eu Daqbir-euq Maqsaqkir . Zirpiq tsawrhaq tiq ghaq, Sawrluv-anr, “Daqbir, nga’maf-euq ghanrcae caevzaf taq-euq maqngeur-a laq?” laer aernaeq ngae-euq

¹ Miqyaer-or! Nawq-euq tsawrmyanr nae ngaq-anr kakhof naeqlaf-awq; Nawq-euq ghaq-anr ghoe-awr ngar maqlaeq-a laer japir naeqlaf-awq.

² Miqyaer-or! Ngaq-euq guiqlanq shardawq-anr narhaq naeqlaf-awq; Ngaq-euq khaqmae-anr nae dovle-euq dawq-anr, Naqbawr ciqkhmr naeqlaf-awq.

³ Aqjeq mirnae aernar-aq, boermiq siqkhaq, Ngaq-euq daefzir yur-eu laer turlar taq-awr; Khaeq-awr khav-eu deuq ngaq-anr saef-eu laer povluf-eu mae. Aqyawf maf-aq, Miqyaer-anr yawzeu maqbaw-a.

⁴ Hawde-eq, Miqyaer-aq, ngaq-anr cawba-eu ghaq pyeuf-eu mae. Sanqpaq Miqyaer-aq, ngaq-euq daefzir-anr ngaeqghae naeqlaf-eu ghaq mae.

⁵ Aqyawf, ngaq-anr muir-eu deuq-anr yawdoer mrpoeq janrkhofnaeq taef-a; Nawq-euq yawtsaq yawdawr nae, aqyawf maf-anr deuvtsaevdzae naeq-awq.

⁶ Ya’we Miqyaer-or! Ngar, nawq-euq tsawrmyanr-anr jaceuq ma; Ngar nuima keuv-awr nawq-anr laqkhaq tiqcaer lawrnaeq ma. Aqjeq mirnae aernar-aq, heulof-aer mr-eu-aq, yawmuiq mae.

⁷ Aqjeq mirnae aernar-aq, aqyawf, ngaq-euq gardzaq garkawv dawqtawv luf-anr nae, Ngaq-anr bibuq-ir naeqlaf-euq mae; Ngaq-euq myavnuiv, ngaq-anr muir-eu deuq-anr ghaqler-euq gar ya’mawr-euq ma.