Jaceuq 52 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Miqyaer Yarkhaq Dar-eu Jeq Hawr-eu Ghawqshaq Gaq-eu Jeq

Car-eu paw sheuqghae-eu aqyuif ghaq-anr bofnaeq-euq, Eqdoq tsawrhaq Doegaq , Sawrluv-anr, “Daqbir, Aqbirmaqlaev-euq nymr-anr oe-euq mae” laer aernaeq ngae-euq, Daqbir-euq Maqsaqkir

¹ Baoq huiq-eu tsawrhaq-or! Nawr aqjeq ghae-eu yawdoer jeq-anr khanqsaer jaev-eu le? Miqyaer-euq yawmuiq-aq, li-eu maqbawni zif-eu mae.

² Nawq-euq maeqlar-aq, uqjaev micaer lof-aer tav-awr, Lavcawv-eu jeq tovluf-eu lafkhoer, jaqmyawf maershuir-euq gar mr-eu laejae-eu mae.

³ Nawr-aq, yawmuiq jeq-anr navmaqtser yawdoer jeq-anr gaq-awr, Tsaq-awr dawr-eu jeq ngaeq-eu gar navmaqtser jaqmyawf myawf-eu gar gaq-eu mae.

⁴ Jaqmyawf maershuir-euq maeqlar-or, Nawr dawq yawcawv yawqdawq navluf-anr gaq-eu mae.

⁵ Miqyaer, nawq-anr yurdzae-eu laer, nawq-euq jawrduq-anr nae gheudov-awr, Aqyawf, nawq-anr yawdaefzaq-euq mirtsaq-anr nae mqmaq maqbyav yarzir lavcawv-eu laer, Duqcir-anr nae gheudzae taef-a. Sela.

⁶ Tsaq-awr dawr-eu tsawrhaq khoer-anr ya’mawr ngae guv taef-a; Aqyawf-anr uir-eu lafkhoer heulof-aer aernaeq taef-a;

⁷ “Aqyawf, Miqyaer-anr aqyawf-euq ghaq zaduq maqbi pyeuflar-aq. Aerkhawf, aqyawf, yawqhar yawqha yawdoer jeq nae ghaq bif-awr, Yawqha smrmuiq muiq-awr pyurshuir myawqganq jav-eu gar ghoe-eu mae.”

⁸ Aerkhawf, ngar-aq, Miqyaer-euq nymr-anr nyoerjawfni daef-eu saqloq arbawr-anr dur-eu ma. Ngar, mqmaq maqbyav yarzir Miqyaer ghawqshaq gaq-eu jeq-anr ghoe ma.

⁹ Heu-anr nawq nae mr-euq mirnae, ngar, nawq-anr li-eu maqbawni jaceuq ma; Nawq-euq tsawrshawr deuq jawr-eu maeqshi, Ngar, nawq-euq tsawrmyanr-anr dawq ma; Aqjeq mirnae aernar-aq, heulof-aer janr-eu-aq, yawmuiq mae.