Jaceuq 144 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guir Bi Deuvnya Naeqlaf-eu Miqyaer

Daqbir-euq cardawq

¹ Ngaq-euq logur pyeuf-eu Ya’we Miqyaer-anr jaceuq ma. Aqyawf, ngaq-euq lafnoer guirdeuv deuvnya’ni hawr-eu, Ngaq-euq aqlaf deuvcae caenya’ni maeqnya naeqlaf-euq mae.

² Aqyawf-aq, ngaq-anr ghoer-awr gaq-eu, ngaq-euq lanrzif pyeuf-awr, Ngaq-anr bibuq-ir-eu ghaq, ngaq-euq lofpir-eu nymrgor pyeuf-eu uqtaf, Ngar, aqyawf-euq lafkhoer caevzaf ler-eu, ngaq-euq daeqdaqduq mae; Ngaq-euq tsawrhaq, ngaq-euq lafov jawrni, aqyawf nae janr-euq mae.

³ Ya’we Miqyaer-or! Nawr hawcawq-awr siqnya paq-aer tsawrhaq aqjeq la? Nawr, aqyawf-euq garkawv sharnoeq paq-aer, tsawrhaqzaq teu aqjeq nga?

⁴ Tsawrhaqzaq-aq, saf-anr dur-awr, Aqyawf-euq arnan aryamq-aq, tiqkhaeq nar-aq byov-ir-eu narshmr-anr dur-eu mae.

⁵ Ya’we Miqyaer-or! Nawq-euq mq ngawqghm-awr zafka le-awq; Gawqjawq-anr toeqciv-awr uqkhoeq dudu-aer bi dovlar-awq.

⁶ Mqjeq tsawqtaev bitaev-awr, aqyawf maf-anr taebyav ghae-awq. Nawq-euq kavmyaq beuvdov ghae-awr, aqyawf maf-anr lavcawv-awq.

⁷ Yawgor-anr nae nawq-euq aqlaf cawqja lef-awr, Boermiq siqkhaq-euq aqlaf hawr-eu ardzaeq-aer myaq-eu ircuf-anr nae, Ngaq-anr gheudov-awr bibuq-ir naeqlaf-awq.

⁸ Aqyawf-euq khaqmae-aq, gardanr maqtsoeq-eu dawq ngaeq-awr, Aqyawf-euq armar laf-aq, maershuir shuir-eu jeq mr-eu armar laf mae.

⁹ Miqyaer-or! Ngar, nawq-anr cardawq yawshuif carnaeq ma; Ngar, tser cav tsof-eu deur-mq diq-awr carcar-aer, nawq-anr jaceuq ma.

¹⁰ Aqyawf-aq, mirkhanq sanqpaq-anr kakhof-eu ghaq pyeuf-awr, Aqyawf-euq kuirlaf zaqkhav Daqbir-anr, Deuvlar-eu doer-awr cawv-eu micaer-anr nae bibuq-ir-euq ghaq mae.

¹¹ Boermiq siqkhaq-euq aqlaf-anr nae, Ngaq-anr gheudov-awr bibuq-ir naeqlaf-awq. Aqyawf-euq khaqmae-aq, gardanr maqtsoeq-eu dawq ngaeq-awr, Aqyawf-euq armar laf-aq, maershuir shuir-eu jeq mr-eu armar laf mae.

¹² Nga’maf-euq zaqyo deuq, aqyawfmaf zaqguq ngae, Maerlar luf-eu sanqlanq arbawr lof-aer bidur-awr; Nga’maf-euq zaqmiq deuq-aq, sanqpaq-euq nymr-anr hawmuiqni, Yawmuiq-aer tafmuiq taq-euq khawrzeur lof-aer bidur law.

¹³ Nga’maf-euq caerjir-euq lafkhoer, dzaqla ghovcaer kharngeur-eu jeq bibyan-awr; Nga’maf-euq yawrdeuq daega-anr gavluf-eu khoer, Armyaer armyaer mawr-anr nae bi puqbaer law.

¹⁴ Nga’maf-euq mawrner, mawrzaq ghawqmya’ni bi jawrle-awr, Mawrzaq ghaw ngae maqlov maqshav-aer taqbi ghae law, Nga’maf-euq garjawq-anr gurgur-aer teuv-eu jeq taqbi jav naeqlaf.

¹⁵ Heulof-aer ghae-eu artiv-anr yajawr-eu tsawrhaq-aq, guiqlanqhuiq taef-a. Ya’we Miqyaer, aqyawf maf-euq Miqyaer pyeuf-eu tsawrhaq-aq, guiqlanqhuiq taef-a.