Jaceuq 130 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Ya’we Miqyaer-anr Dawq-eu

Ledav ngae car-eu dawqcar

¹ Ya’we Miqyaer-or! Naf duidui-eu gar nae, ngar, nawq-anr gurgaq luf-eu ma.

² Sanqpaq Miqyaer-or! Ngaq-euq tersar-anr narhaq naeqlaf-awq! Ghawqshaq gaqnaeqlaf laer, Ngar tanqshar-eu tersar-anr nawq-euq naqbawr ciqkhmr naeqlaf-awq.

³ Ya’we Miqyaer-or! Nawr yawbanq yawlaeq guitaq nar-aq, Sanqpaq Miqyaer-or! Aqsur ghaq yawf-awr jawrnya-eu?

⁴ Aerkhawf, nawr jawr-eu gar iqbax pyaeq-eu jeq jav-eu mae; Khoermirnae, aqcawq, nawq-anr guv-eu tsaq mae.

⁵ Ngar, Ya’we Miqyaer-anr dawq-eu ma; Ngaq-euq nuima saflar dawq-awr, Aqyawf-euq dawq-anr noeqtmq-eu ma.

⁶ Uqcif paw lofpir-eu deuq uqbya byalar-eu gar dawq-eu navmaqtser, Ngaq-euq nuima saflar, Sanqpaq Miqyaer-anr dawq-eu ma. Uqcif paw lofpir-eu deuq uqbya byalar-eu gar dawq-eu navmaqtser dawq-eu ma.

⁷ Irsaqleqlav-or! Ya’we Miqyaer-anr noeqtmq-awq! Aqjeq mirnae aernar-aq, Ya’we Miqyaer jawr-eu gar maqtsaev-ir nya-eu gaq-eu jeq jav-awr, Aqyawf naeq-aer tiqbyanni kakhof-eu jeq jav-eu mae.

⁸ Aqyawf, Irsaqleqlav-anr kakhofnaeq taef-a; Aqyawf-euq yawbanq yawlaeq dawqtawv luf-anr nae kakhofnaeq taef-a.