Jaceuq 105 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Li-eu Maqbawni Sarjax Zif-eu Miqyaer

¹ Ya’we Miqyaer-euq guiqlanq-anr jaceuq-awq! Aqyawf-euq tsawrmyanr-anr kur-awr, Aqyawf nae mr-euq jeq-euq garkawv, tsawrhaqzaq-anr bisiq-awq.

² Miqyaer-anr carnaeq-awq. Aqyawf-anr jaceuq-eu dawq carnaeq-awq. Aqyawf nae mr-euq zanqler paq-aer ghae-eu gar dawqtawv luf-euq garkawv ja-awq.

³ Aqyawf-euq shawr-eu tsawrmyanr-aq, yawshaef khanqsaer huiq-awr, Ya’we Miqyaer-anr pov-eu tsawrhaq deuq-euq nuima laqkhaqcaer luf-ur.

⁴ Ya’we Miqyaer hawr-eu aqyawf-euq ghaq-anr pov-awq. Aqyawf-euq myavpyawq-anr aqmyanluf pov-awq!

⁵ Miqyaer nae mr-euq zawr muiq-eu gardeuq hawr-eu; Aqyawf nae zanqler paq-aer ghae-eu jeq mr-euq uqtaf; Aqyawf-euq khaqmae nae yarkhaq dar-euq jeq-anr noeqmawr-awq,

⁶ Aqyawf-euq kuirlaf zaqkhav, Aqbyaqhaq-euq aryoeq-or! Aqyawf nae tserdov-euq Yaqkov-euq zaqdeuq-or! Khoer-anr noeqmawr-awq.

⁷ Ya’we Miqyaer-aq, aqdui-euq Miqyaer mae. Aqyawf yarkhaq dar-eu jeq-aq, mirtsaq tanqkhawr dawqtawv luf-anr taf-eu mae.

⁸ Aqyawf, aqyawf-euq dawqma sarjax-anr mqmaq maqbyav yarzir noeqtaq-awr; Aqyawf nae bif-euq khaerdawq-aq, artanr zir gmq-eu mae.

⁹ Aqyawf, Aqbyaqhaq naeq-aer dawqma sarjax dzaq-awr, Aqyawf, Irtsav-anr kamqtaq-euq mae.

¹⁰ Khoernar-aq, Yaqkov-anr zanrtaq khoftaq lof-aer yawduq lavbaw naeq-awr, Irsaqleqlav-anr mqmaq maqbyav yarzir zif-eu dawqma sarjax bipyeuf-euq mae.

¹¹ Aqyawf aer-eu, “Ngar, nawq-anr Kaqnaq mirkhanq bif-awr; Nawq-anr cavdaeq daeqbir naeq-euq jeqbir lof-aer bipyeuf ma.”

¹² Aqyawfmaf tsawrhaq maqmyaq-aer yawcuiv ngae, Aqyawfmaf zawr cuiv-awr, mirkhanq-euq boermiq siqkhaq pyeuf-eu mae.

¹³ Aqyawfmaf, mirkhanq tiqkhanq sair tiqkhanq can-awr, Uvlanr-eu dzoeqdzaq tiqgar nae, Tsawrjeuq nuijeq jawr-eu gar canpar-euq mae.

¹⁴ Aqyawf, aqyawf maf-anr tiqghaq-iq maqbi mrlaeq ler-aq; Aqyawf, aqyawf maf-euq gharduq sanqpaq deuq-anr khawf daeq-euq mae.

¹⁵ Aqyawf aer-eu, “Ngaq nae tsaqtsov taq-euq tsawrhaq-anr taq toeqciv. Ngaq-euq gharduq ngaeqdan-eu deuq-anr coeqler-eu jeq taqmr.”

¹⁶ Khoeruqtaf, aqyawf, mirtsaq-euq khoertav maef-awr shuf-eu jeq kurdov laf-awr bi keuvle-awr; Khar laeqhmq taq-euq dzaqdzaq dawrdawr dawqtawv luf-anr aqyawf nae lavcawv jir-euq mae.

¹⁷ Aqyawf, aqyawf maf-euq maeqhu tsawrhaq tiq ghaq khaerghae-euq mae. Khoer-aq, zaqkhav lof-aer bi anqdzaq-euq Yorsaev mae.

¹⁸ Aqcawq, aqyawf-euq aqkuir-anr narler-eu shmrcav paf-awr; Aqyawf-anr shmr lanrdan bidan-euq mae.

¹⁹ Aqyawf nae ngaeqtaq-euq dawq, maq pyeuflar-euq khoerkeuvni, Ya’we Miqyaer-euq dawq, aqyawf-anr tsermr-euq mae.

²⁰ Khoernar-aq, sanqpaq khaer-eu mirnae aqyawf-anr pyaeqnaeq-awr; Tsawrhaq-anr uvlanr-eu deuq, aqyawf-anr pyaeq-awr bidov-ir-euq mae.

²¹ Sanqpaq, aqyawf-anr sanqpaq-euq gar bimr-awr; Aqyawf-euq myawqganq dawqtawv luf-anr uvlanr-eu ghaq bigeuf-euq mae.

²² Aqyawf, sanqpaq-euq dzoeqda deuq-anr janrnaeq mawf-eu lof-aer janrnaeq-awr; Sanqpaq-euq aqyuif aqtsu deuq-anr zaqsiq tsawrganr maeqnaeq-euq mae.

²³ Khoernar-aq, Irsaqleqlav, Irjirtuv-anr oe-awr, Yaqkov, Haqmav-euq mirtsaq-anr jawr-euq mae.

²⁴ Miqyaer nae aqyawf-euq tsawrhaq yawkhav-aer bimyaq bi baerlar-awr; Aqyawf maf-anr muir-eu deuq navmaqtser, ghaq bi khavdzaeq lar-euq mae.

²⁵ Aqyawf, aqcawq-euq nuima, aqyawf-euq tsawrhaq-anr bi byaelar-awr; Aqyawf-euq kuirlaf zaqkhav-anr bi shuirdzaq bi khavdzaq-euq mae.

²⁶ Miqyaer, aqyawf-euq kuirlaf zaqkhav Morseq hawr-eu, Aqyawf nae tserdov-euq Aqloq-anr khaerlef-euq mae.

²⁷ Aqyawfnyaf, aqyawf maf-euq ghanrcae bisiq bimawr-eu jeq mr-awr; Haqmav-euq mirtsaq-anr zanqler paq-aer ghae-eu jeq mr-euq mae.

²⁸ Miqyaer nae yawzanr pyaeqghae lef-awr, zanrtsuini bipyeuf-ir-awr, Aqyawfmaf, aqyawf-euq dawq-anr maqpuiq-a.

²⁹ Aqyawf, aqyawf maf-euq ircuf-anr shiq bipyeuf-ir-awr, Aqyawf maf-euq ngaqshaq bishir-euq mae.

³⁰ Aqyawf maf-euq mirkhanq-anr khaqpaq jawrbyan lar-awr; Aqyawf maf-euq sanqpaq-euq arlawv-euq lafkhoer khawf, jawrbyan jir-euq mae.

³¹ Miqyaer dawq bif ngae, aqyawf maf-euq mirkhanq khanqlanni, Buqsav hawr-eu shaermawr baqmaf jawrbyan lar-euq mae.

³² Aqyawf, aqyawf maf-anr uqyaer-euq danzar uqyaer arsiq bi gale-awr; Aqyawf maf-euq mirtsaq-euq khoertav miqlmr dof-eu miqdzaq bi gale-euq mae.

³³ Aqyawf nae aqyawf maf-euq mirkaq-euq lafkhoer daef-eu aqgaf-euq bawduv, Hawr-eu siqguq arbawr deuq bi daecawv-awr, arbawr deuq bi daekhaef jir-euq mae.

³⁴ Miqyaer dawq bif ngae, maq guijir coer-eu nyaevbanr dovlar-awr, Nyaevbanr zaqguq deuq dovlar-euq mae.

³⁵ Khoernar-aq, aqyawf maf-euq mirkhanq-anr khardaef-eu sanqlanq ghawqdar dzaqjir-awr, Aqyawf maf-euq mirtsaq-euq arsiq myeufanr jir-euq mae.

³⁶ Aqyawf, aqyawf maf-euq ghaq-anr nae daefbae baele-euq dawqtawvluf, Aqyawf maf-euq mirkhanq-euq huqbaw dawqtawv luf-anr khawf, bi shirjir-euq mae.

³⁷ Khoernar-aq, Miqyaer, Irsaqleqlav tsawrhaq-anr, Pyur hawr-eu shuir biyur-awr nae sheuqdov laf-euq mae. Aqyawf-euq tsawrjeuq-euq ghanrcae ghaq baq-eu tiqghaq-iq maqkeuq-a.

³⁸ Irjirtuv tsawrhaq, aqyawf maf-anr guvluf-eu mirnae, Aqyawfmaf dov-ir ngae, Irjirtuv laqkhaq caer-eu mae.

³⁹ Miqyaer, gheuja taq-euq mqdmr nae joeshmr naeq-awr, Uqcif paw yawshaef bya-eu miqdzaq bijav-euq mae.

⁴⁰ Aqyawfmaf shar ngae, aqyawf, khanqzaqlaqma pyaeqghae lef-awr; Aqyawfmaf tiqdaev ya dzaqdaevni, mqtav-euq kaqmur bifnaeq-euq mae.

⁴¹ Aqyawf, khaqlo pan ngae ircuf tanqdov lef-awr, Guicorni ghae-eu jawrduq-anr lawrgawv lof-aer yoerle-euq mae.

⁴² Aqyawf, aqyawf-euq kuirlaf zaqkhav Aqbyaqhaq hawr-eu, Aqyawf-euq shawr-eu sarjax-anr noeqkeuv-euq mirnae,

⁴³ Aqyawf, aqyawf-euq tsawrhaq-anr laqkhaq tiqcaer sheuqdov laf-awr; Aqyawf nae tserdov-euq deuq-anr, lurgha caergha-eu lafkhoer sheuqdov laf-euq mae.

⁴⁴ Aqyawf, aqcawq tsawrjeuq-euq mirkhanq, aqyawf maf-anr bifnaeq-awr; Aqyawfmaf, tsawrjeuq deuq nae mrtaq-euq jeq za-euq mae.

⁴⁵ Khoer-aq, aqyawfmaf, aqyawf-euq zanrtaq khoftaq-anr bi cantae-awr; Aqyawf-euq zanrdawq-anr bi mrcaw-eu gharduq mae. Haleluya!