HeˬByehˇ 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mirtsaq-euq Shawr-eu Jawrduq

¹ Aqdir aernar-aq, dawqma sarjax yawbae hmq khawf, uqduq tanq-eu zanrtaq khoftaq jav-awr, mirtsaq-anr taf-eu shawr-eu jawrduq khawf jav-eu mae.

² Saqpar saeqghawv ghawvtaq-awr, ‘Shawr-eu jawrduq’ laer kur-eu yawbae lawv-anr heudeuq jav-eu mae: tsirkhmq dofdavduq, hawqje hawr-eu lawrdzar kaqmur.

³ Saqpar saeqghawv-anr tawtaq-euq saqpar nyiq lawv tiqlawv-euq narkhan-aq, ‘Shawr duidui-eu lawv’ laer kur-eu mae.

⁴ Khoergar, yawsaw jeq dofdamq-eu shuir lawrguir hawr-eu yawqpyawq navluf shuir nae yawtaq-euq dawqma sarjax bawqkeuv jav-eu mae. Bawqkeuv-euq lafkhoer, maqnav anr-eu shuir oeqlanq, bawnmq nmqlar-euq Aqloq-euq gawqyoeq hawr-eu dawqma sarjax-euq terbyaf anr-eu mae.

⁵ Bawqkeuv-euq khoertav khanqsaer huiq-eu Jeqlurbeq-euq mawrkawr, ghawqshaq gaq-eu nuirmanq-anr joeshmr taq-euq mae. Garkawv heudeuq, nymq-mr aqdui, aqyawf jeq aqyawf-aer dufyawrni ja-eu maqdan-a.

Maqbyan-eu Mirtsaq-euq Gar

⁶ Khoerdeuq dawqtawvluf laeqhmqdan jir-euq nar-aq, pirma deuq aqmyanluf saqpar saeqghawv-euq yawbae lawv-anr urler-awr, uqduq tanq-eu gardeuq mr-eu mae.

⁷ Aerkhawf, nyiq lawv tiqlawv-anr-aq, pirma yawhuiq ghaq taef-aer yawqkhof navluf tiq khof tiq pov taef-aer ya urler-eu mae. Aqyawf urler ngae, yawqha-euq iqbax-euq gharduq hawr-eu Irsaqleqlav tsawrhaq maq siqnya-aer mr-euq iqbax-euq gharduq, lawrnaeq-eu shiq ya yuranr lef-eu mae.

⁸ Saqpar saeqghawv yawbae ghawv kharjav-eu khoerkeuvni, shawr duidui-eu lawv-anr urler-eu garma maq danrlar-aq siq laer, Yawshawr Saflar toeqmaeq naeqlaf-euq mae

⁹ Heudeuq-aq, nymq-mr sarkaq-euq arbar pyeuf-eu mae. Khoergar lafsawq damq-awr lawrnaeq-eu jeq lawr-eu, uqduq tanq-eu gar mr-eu tsawrhaq-euq zaqsiq nuisiq-anr maqbi byanjirlar nya-a.

¹⁰ Dzaq-awr dawr-eu jeq hawr-eu tsiqshawr-eu ghawqmya jeq heu-aq, shiqshaq paw taf-eu zanrsanrkhof pyeuf-eu taef mae. Heudeuq-aq, yawshuif lavshuif-eu aryamq maq keuvle-euq khoerkeuvni gardanr tsoeq-eu mae.

Mqtav-euq Shawr-eu Jawrduq

¹¹ Aerkhawf, Kali-aq, keuvle-eu laer ghae-eu yawmuiq jeq-euq Pirma yawhuiq ghaq lof-aer oe-euq mae. Baetaq-euq jeq-anr maqtaf-aer, tsawrhaq-euq aqlaf nae ghawvtaq-euq maqngeur-eu, huiqdzaeq-awr byandzaeq-eu saqpar saeqghawv-anr aqyawf urler-euq mae.

¹² Aqdui, mqmaq maqbyav yarzir kakhof-eu jeq za’ni, aqyawf, shawr duidui-eu lawv-anr tiq pov urler-euq nar-aq luivni, cifmyaef-euq shiq hawr-eu mawrner mawrgaw-euq shiq yur-awr, urler-euq maqngeur-a, aqyawf-euq shiq yur-awr urler-euq mae.

¹³ Cifmyaef-euq shiq, mawrner mawrgaw-euq shiq hawr-eu mawrner mawrkhar-euq khaqlaer laertsar, maqshawr-eu tsawrhaq-anr byavshaeqnaeq ngae, shiqshaq paw bi shawrlarni janrnya nar-aq,

¹⁴ Kali-euq shiq, ngeurdzaeq arnavni par lavshawr nya-eu jeq nga. Aqyawf, li-eu maqbawni daef-eu muiq-eu Saflar-anr ghoe-awr, marbyawf maqbaw-eu aqyawf-euq mawrdo, Miqyaer-anr lawrnaeq-euq mae. Nawmaf, daefluf-eu Miqyaer-anr uqduqtanq nya’ni, aqyawf-euq shiq-aq, gar yawshir-anr nae nawmaf-euq zaqsiq nuisiq-anr tsiqshawr naeqlaf-eu mae.

¹⁵ Heu-euq baqda’nae, tsawrhaqzaq dawqma sarjax yawbae hmq-euq lafov jawr ngae, mrbanq mrlaeq-euq deuq-anr kakhof-eu laer Yeqsur shirdan-euq mae. Miqyaer nae kurtaq-euq tsawrhaq deuq-anr sarjax dzaqtaq-euq lof-aer, mqmaq maqbyav yarzir-euq jeqbir bi za’ni, Yeqsur-aq, dawqma sarjax yawshuif-euq tsawrkaq pyeuf-eu mae.

Tsawrkaq Ghaq Yashir-euq

¹⁶ Jeqbir bif-eu sanqbof jav nar-aq, jeqbir sanqbof bif-eu ghaq shir-euq yawduq yabi baw-eu mae.

¹⁷ Aqjeq mirnae aernar-aq, jeqbir bif-eu ghaq shir-awr nae taef-aer jeqbir khoer za’nya-eu mae. Aerkhawf, jeqbir bif-eu ghaq khardaef-eu khoerkeuvni, jeqbir khoer maqza nya-a siq.

¹⁸ Khoermirnae, dawqma sarjax yawbae hmq khawf, shiq-anr maqghoe-aer zmq-euq maqngeur-a.

¹⁹ Aqjeq mirnae aernar-aq, Morseq, zanrdawq-euq lafkhoer boftaq-euq zanrtaq khoftaq yawqdawq navluf, tsawrhaq khoerdeuq dawqtawv luf-anr aernaeq ghaq-euq nar-aq, mawrner mawrgaw hawr-eu cifmyaef-euq shiq, ircuf-anr keuq-awr, nertseuvni ghae-eu yawr cafhm hawr-eu hursor uqnae yur-awr, sanqbof hawr-eu tsawrhaq dawqtawv luf-anr juifshaeq-eu mae.

²⁰ Khoerngae, Morseq aer-eu, “Heu-aq, Miqyaer nae nawmaf-anr khaertaq-euq dawqma sarjax-anr taf-eu shiq mae.” (Di 24:8)

²¹ Khoerlof-aer durni, saqpar saeqghawv hawr-eu uqduq tanq-eu gar zmq-eu mrmyawq keuka yawqjeq navluf-anr khawf, aqyawf, shiq juifshaeq-eu mae.

²² Zanrdawq aertaq-euq lof-aer nar-aq, yawqjeq navluf aerghaqni, shiq nae yashawr-eu mae. Shiq dov-eu jeq maqjav nar-aq, iqbax pyaeq-eu jeq maqjav-a.

Iqbax Pidzae-eu Laer Yeqsur-euq Mawrdo Lawrnaeq-euq

²³ Khoermirnae, mq-euq khoertav jav-eu keuka deuq-euq arbar pyeuf-eu mrmyawq-anr khawf, heudeuq nae yashawr-eu ngeur nar-aq, mq-euq khoertav-euq mrmyawq keuka-aq, heudeuq navmaqtser muiq-eu lawrnaeq-eu jeq nae ya lavshawr-eu mae.

²⁴ Aqjeq mirnae aernar-aq, marmarni ghae-eu jawrduq-euq arbar taef-aer pyeuf-eu, tsawrhaqzaq nae tsovtaq-euq shawr-eu jawrduq-anr Kali urler-euq maqngeur-a. Aerkhawf, aqyawf, aqdui-euq danzar Miqyaer-euq maeqshi jawrni mq-euq khoertav urler-euq mae.

²⁵ Khoer-aq, pirma yawhuiq ghaq, aqyawf khof aqyawf jeqzaq-euq shiq yur-awr, shawr duidui-eu lawv-anr urler-eu lof-aer, Kali, aqyawf-euq mawrdo ghawqmya pov maqya lawrnaeq-a.

²⁶ Khoerlof-aer ya lawrnaeq lawnmr-aq, mqmir bae-euq taf nar-aq, aqyawf ghawqmya pov shaqzanq yadaq-euq law taef-a. Aerkhawf, aqyawf iqbax yurdzae-eu laer arsaq saq-eu aryamq heu-euq lafkhoer, aqyawf-euq mawrdo lawrnaeq-euq baqda’nae, aqyawf tiq pov dovle-euq taef mae.

²⁷ Tsawrhaqzaq tiq pov yashir-eu mae laer aertsaev taq-euq mae. Shir-euq nar-aq, yarkhaq yabi dar-eu mae.

²⁸ Khoerlof-aer durni, Kali, tsawrhaq ghawqmya ni-euq iqbax-anr pidzae-eu laer tiq pov lawrnaeq-euq taef mae. Aqyawf nyiq pov tiqpov dovle ngae, iqbax naeq-aer tiqjeq-iq maqpar taf-aer, aqyawf-anr lofluf-eu tsawrhaq deuq-anr bibuq-ir-eu laer oe-eu mae.