HeˬByehˇ 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Mqmaq Maqmyav Yarzir-euq Pirma

¹ Tsawrhaqzaq-euq lafkhoer nae tserdov taq-euq Pirma yawhuiq yawqghaq navluf, Miqyaer-anr taf-eu gar bimr-eu laer, tsawrhaq-euq danzar khaerdar taq-euq mae. Aqyawf-aq, lafsawq bidamq-awr, iqbax-euq gharduq lawr-eu jeq bi lawrnaeq-eu gharduq mae.

² Aqyawf khawf, ghaq baq-eu jeq-euq uqmov jawrhaw-euq mirnae, maq siqnya-eu tsawrhaq hawr-eu garbanq banq-euq tsawrhaq deuq-anr ghawqshaq gaqnya-eu mae.

³ Khoermirnae, aqcawq-euq iqbax-euq gharduq lawr-eu jeq ya lawrnaeq-eu lof-aer, yawqha-euq iqbax-euq gharduq khawf yalawr-eu mae.

⁴ Tsawrhaq tiqghaq-iq yawqhar yawqha Pirma yawhuiq ghaq maq tsaqgeuf nya-a. Miqyaer nae Aqloq-anr kur-euq lof-aer, Miqyaer nae bikur-euq tsawrhaq taef-aer geufnya-eu mae.

⁵ Khoerlof-aer durni, Kali khawf Pirma yawhuiq ghaq pyeuflarni, yawqhar yawqha tsaqgeuf-euq maqngeur-a. Aerkhawf, Miqyaer, aqyawf-anr aernaeq-eu, “Nawr-aq, ngaq-euq Zaqyo ma. Iqnan, ngar, nawq-euq Aqda pyeuflar-euq ma.” (Jc 2:7)

⁶ Yaerbof yawqtsanr yawq-euq lafkhoer aqyawf paraer-eu, “Nawr-aq, Maqlaqkirsaqdaev-euq dzoeqdzaq za-awr, mqmaq maqbyav yarzir pirma yageuf taef-a.” (Jc 110:4)

⁷ Kali shiqshaq pi-awr daefluf ngae, aqyawf-anr shir-eu jeq-anr nae bibuq-ir nya-eu Miqyaer-anr, tersar yawkhav-aer gurgur-aer myavbir dov-eu lafkhoer, guiqlanq shar-awr tanqshar duidui-euq mae. Aqyawf, Miqyaer-anr yawzeu baw-eu lafkhoer guv-eu mirnae, Miqyaer, aqyawf-euq shardawq-anr narhaq-euq mae.

⁸ Aqyawf, Miqyaer-euq Zaqyo pyeuf-eu khawf, shaqzanq yadaq-euq baqda’nae narhaq geuf-eu jeq-anr dzawnya-euq mae.

⁹ Aqyawf khoerlof-aer byanlar-euq nar-aq, aqyawf-anr narhaq geuf-eu yawqghaq navluf-euq, li-eu maqbawni kakhof-eu jeq-euq dawqpaeq duqpur pyeuflar-euq mae.

¹⁰ Khoeruqtaf, Miqyaer, aqyawf-anr Pirma yawhuiq ghaq laer kur-awr, “Maqlaqkirsaqdaev-euq dzoeqdzaq biza-euq mae.”

Guiqlanq Saflar Paw-euq Arner Zaqnanq

¹¹ Nga’maf, aqyawf-anr taf-eu garkawv ngaeqmawf-eu ghawqmya’ni jav-eu ma. Aerkhawf, nawmaf naqtanq naqdae dae-ir-euq mirnae, jashaw naeq-eu yawshaq mir-a.

¹² Aryamq myanrlar-euq gar sharnoeq nar-aq, nawmaf-aq, maeqnaeq tsovnaeq-eu tsawrhaq pyeuf paq-aer ghae-eu mae. Aerkhawf, Miqyaer-euq dawq-anr taf-eu dzawdanq bae-eu garkawv deuq khawf, aqcawq, nawmaf-anr maeqpovnaeq paq-aer ghae-eu nga siq. Nawmaf-aq, dzar yawzae maq dzaqnya-aer, aqcoer dawrzaq-euq artiv-anr daefluf-eu nga siq.

¹³ Aqcoer taef-aer dawrluf-eu yawqghaq navluf, tsaq-awr dawr-eu dawq-anr maqsiq maqnya-eu mirnae, arner zaqnanq pyeuf-eu mae.

¹⁴ Dzar yawzae-aq, tsawrkhav khavlar-euq deuq-euq gharduq mae. Aqyawf maf-aq, yawqha-euq nuima-anr maeq-awr, yawmuiq hawr-eu yawdoer tserpav birpav nya’ni, mrdzaw shardzaw dzaw-euq tsawrhaq mae.