HeˬByehˇ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sarjax Zif-eu Zaqyo

¹ Mq-euq khoertav nae bikur-euq gar taf-eu shawr-eu aqyuif aqnyir deuq-or! Aqyawf-aq, Ghaqkhaer hawr-eu Pirma yawhuiq ghaq mae laer, aqdui aerdov-eu Yeqsur Kali-euq garkawv sharnoeq sharsawx haw-awq.

² Morseq, Miqyaer-euq nymrkhanq dawqtawv luf-euq lafkhoer sarjax zif-euq lof-aer, Yeqsur khawf aqyawf-anr tserdov-euq ghaq-anr sarjax zif-euq mae.

³ Nymr-anr navmaqtser, nymr tsov-euq ghaq-anr taqhuiq-eu lof-aer, Yeqsur khawf Morseq navmaqtser khanqsaer za-eu geux mae laer sawxtaq-euq mae.

⁴ Aqjeq mirnae aernar-aq, nymr yawqnymr navluf tsov-euq tsawrhaq jawr-eu mae. Aerkhawf, yawqjeq navluf-anr bae-euq ghaq-aq, Miqyaer mae.

⁵ Morseq-aq, aqkar maeqhu paw jagaq le-eu garkawv deuq-anr sarkir kamq-eu gharduq, Miqyaer-euq nymrkhanq dawqtawv luf-euq lafkhoer aqdir sarjax zif-eu kuirlaf zaqkhav tiq ghaq mae.

⁶ Aerkhawf, Kali-aq, Miqyaer-euq nymrkhanq-anr hawlanr-eu Zaqyo mae. Aqdui khawf arsaqsaq ngae keuvni, nuima khaqduqni ghae-eu jeq hawr-eu, nuima huiqkhar za-eu noeqtmq-eu jeq-anr zifdanni tuvtaeqtaq nar-aq, aqdui, aqyawf-euq nymrkhanq-euq lafkhoer yajawr mae.

Zifdanni Jan-awq

⁷ Khoermirnae, Yawshawr Saflar heulof-aer aertaq-euq mae, “Iqnan nawmaf, aqyawf-euq dawq yagaq-euq ngeur nar-aq,

⁸ Bawrtsanq bawrdanr lafkhoer, nawmaf-anr tsermr-euq arnan-anr puiq-euq lof-aer, nawmaf nuima taqghanr.

⁹ Khoergar, nawmaf-euq aqpoeq deuq, 40 khof byanni ngaq-anr mrhaw-awr, tsermr-euq uqtaf, ngaq-euq gardeuq-anr ya’mawr-euq mae.

¹⁰ Khoermirnae, ngar khoerzir-euq tsawrhaq deuq-anr nuima paer-awr heulof-aer aer-euq ma, ‘Aqyawf maf-euq nuima-euq lafkhoer aqmyanluf garbanq banq-awr, aqyawfmaf, ngaq-euq garma-anr maq siqnya-a.’

¹¹ Khoermirnae, ngar nuima paer-eu lafkhoer heulof-aer kamq-euq ma, ‘Aqyawfmaf, ngaq-euq ghaqnaq naqduq-anr maqya urler-ar.’ ” (Jc 95:7-11)

¹² Aqyuif aqnyir deuq-or, yanr-awq! Maqyanr nar-aq, nawmaf-euq lafkhoer tiqghaqnav maqjan-eu nuima yawdoer anrlar-awr, daefluf-eu Miqyaer-anr nae ghawq-ir nya-eu baw-mr.

¹³ Nawmaf-euq lafkhoer tiqghaq-iq iqbax maershuir shuir-eu baqda’nae nuima maqya ghanr-ir ni, “Iqnan” laer kur-eu aryamq-euq lafkhoer, nan-anr nae tiqghaq tirghaq, ghaq bif-awq.

¹⁴ Yawbae ngae nae, aqdui nuizif zif-euq lof-aer, arsaqsaq ngae keuvni zifnya nar-aq, aqdui khawf Kali naeq-aer gawf-eu tsawrhaq ma.

¹⁵ Yaerbof aer-eu, “Iqnan, nawmaf, aqyawf-euq tersar-anr yagaq-euq ngeur nar-aq, Aqyawf-anr puiq ngae lof-aer nawmaf-euq nuima taqghanr.” (Jc 95:7-8)

¹⁶ Khoerngae, yagaq-euq khawf, aqyawf-anr puiq-euq tsawrhaq aqsur ghaq la? Morseq nae Irjirtuv-anr nae sheuqdov laf-euq tsawrhaq khoerdeuq dawqtawvluf maqngeur-a lor?

¹⁷ Miqyaer, 40 khof byanni aqsur ghaq-anr nuima paer-euq la? Iqbax mr-awr shir-euq mawrdo bawrtsanq bawrdanr-anr gayaf-euq tsawrhaq khoerdeuq-anr maqngeur-a laq?

¹⁸ Miqyaer, aqyawf-euq ghaqnaq naqduq-anr maqbi urlar laer, aqsur ghaq-anr kamq-eu lafkhoer aernaeq-euq la? Aqyawf-euq dawq maq narhaq geuf-eu tsawrhaq khoerdeuq-anr maqngeur-a lor?

¹⁹ Khoermirnae, aqyawfmaf maq urler nya-euq khoer-aq, maqjan-euq mirnae nga laer aqdui-anr mawrlar-eu mae.