Gawˇlawˇsehˇ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Noeqtsov Taq-awq

¹ Nawmaf aqdir Kali naeq-aer tiqkawv lof-aer ghofdaef lar-euq ngeur nar-aq, yawgor-anr jav-eu jeq-anr sharpov-eu tsaq mae. Kali-aq, khoergar Miqyaer-euq armar paw nuirluf-eu mae.

² Nawmaf-euq nuinoeq, mirtsaq-euq khoertav jav-eu jeq-anr maqngeur-eu, mq-euq khoertav jav-eu jeq-anr noeqtsov taq-awq.

³ Aqjeq mirnae aernar-aq, nawmaf-aq shirdzeur-awr, nawmaf daef-eu jeq Miqyaer-euq lafkhoer Kali naeq-aer zaftaq-euq mae.

⁴ Aqdui-euq daef-eu jeq pyeuf-eu Kali dovle ngae, nawmaf khawf aqyawf naeq-aer tiqkawv lof-aer yawshaef khanqsaer-euq lafkhoer dovle taef-a.

⁵ Khoermirnae, nawmaf-euq lafkhoer anr-eu mirtsaq-anr taf-eu heudeuq-anr lavsaef-awq: banq-awr muv-eu, maqshawr-eu jeq, nuikhanr, yawdoer jeq mrmawf-eu hawr-eu, tanqpanq aqma mawrkawr-anr uqduq tanq-eu jeq pyeuf-eu maerjuir juir-eu jeq.

⁶ Heudeuq-euq baqda’nae, Miqyaer nuima paer-eu jeq, maq narhaq geuf-eu tsawrhaq-euq khoertav keuvle luf-eu mae.

⁷ Dzeurlaf ngae, nawmaf khawf heudeuq-euq lafkhoer daef-awr, heudeuq-anr mrhaw sharhaw-euq mae.

⁸ Aerkhawf, nymq-mr-aq, nawmaf heudeuq dawqtawv luf-anr ya byaerdzae-eu mae: nuima dav-eu jeq, nuima paer-eu jeq, muir-eu nuinoeq, yaeqbawq saerlu-aer aer-eu jeq hawr-eu, nawmaf-euq khaqmae-anr nae jawflafni ghae-eu dawq ngaeq-eu jeq.

⁹ Tiqghaq tirghaq jaqmyawf taqmyawf. Aqjeq mirnae aernar-aq, nawmaf, tsawrhaq yawoer ghaq hawr-eu aqyawf mr-awr shar-eu jeq laevdzae yaf-awr,

¹⁰ tsawrhaq yawshuif dmdav-euq mae. Yawshuif khoerghaq-aq, aqyawf-anr bae-euq ghaq-euq shaevdzeuf lof-aer bi durlarni, siqnya-eu tsawrganr bi lavshuif-euq mae.

¹¹ Tsawrhaq yawshuif pyeuflar-euq lafkhoer, Heqlaqsar hawr-eu Yurdav tsawrhaq, bawkhov maeqdzaq yaeq-euq hawr-eu bawkhov maeqdzaq maqyaeq-euq tsawrhaq, yarsaq tsawrhaq hawr-eu Siqtiv tsawrhaq, zaqkhav hawr-eu buq-ir-euq tsawrhaq laer maqbaw-a. Kali-aq, dawqtawvluf pyeuf-awr, dawqtawv luf-euq lafkhoer jawr-eu mae.

Daefzir Yawshuif-euq Shaevdzeuf

¹² Nawmaf-aq, Miqyaer nae tserdov taq-awr, aqyawf zawr gaq-awr shawr-eu tsawrhaq pyeuf-eu mirnae, ghawqshaq gaq-eu, yawmuiq jeq mr-eu, nuinanq nuiyu anr-eu, nuima nanqyuni ghae-eu, nuinoeq ghawqmanrni noeq-eu, heudeuq dmdav-awq.

¹³ Tiqghaq tirghaq oror-aer daef-awq. Tiqghaq-euq khoertav tiqghaq iqbax taqkharza nar-aq, tiqghaq tirghaq iqbax pyaeq-awq. Kali, nawmaf-euq iqbax-anr pyaeq-euq lof-aer, nawmaf khawf tiqghaq tirghaq iqbax yapyaeq-eu mae.

¹⁴ Aerkhawf, heudeuq dawqtawv luf-euq khoertav, yawqjeq navluf byanlarni ganrdzanq nya-eu gaq-eu jeq dmdav ghae-awq.

¹⁵ Khoeruqtaf, Miqyaer-euq nuisar of-eu jeq nae nawmaf-euq nuima-anr bi uvlanr-awq. Khoerlof-aer bi uvlanr-eu laer, mawrdo tiq do taef-aer pyeuflarni Miqyaer, nawmaf-anr kurtaq-euq mae. Khoermirnae, nawmaf, Miqyaer-euq guiqlanq-anr noeqmuiq-awq.

¹⁶ Kali-euq dawq nawmaf-euq lafkhoer tiqbyan tiqlof bi sanrlar-awq. Zaqsiq tsawrganr tiqbyanni anr-eu lafkhoer, jaceuq-eu dawq, jaceuq-eu cardawq hawr-eu saflar paw-euq cardawq-anr ghoeghoe-aer, tiqghaq tirghaq maeqnaeq tsovnaeq-awr ghaq bif-awq. Nawmaf-euq nuima-euq lafkhoer anr-eu guiqlanq yawdzanr nae Sanqpaq Miqyaer-anr carcar-aer jaceuq-awq.

¹⁷ Nawmaf dawqngaeq dawqtmr mr-eu hawr-eu, mr-awr shar-eu yawqjeq navluf, Sanqpaq Yeqsur-euq tsawrmyanr-euq uqmov mr-awq. Aqyawf-anr ghoe-awr Aqda Miqyaer-euq guiqlanq-anr jaceuq-awq.

Kalizaq-euq Zawfjir

¹⁸ Miqzaq deuq-or! Yawqha-euq khaqdzerzaq-euq lafov yawmuiq-aer jawr-awq. Khoer-aq, Sanqpaq Miqyaer-euq lafkhoer mr paq-aer ghae-eu jeq pyeuf-eu mae.

¹⁹ Khaqdzerzaq deuq-or! Yawqha-euq miqzaq-anr gaq-awr, aqyawf maf-anr nuima baw-eu jeq taqbi jav.

²⁰ Zaqdeuq-or! Yawqjeq navluf-euq lafkhoer, aqma aqda-euq aerdawq narhaq geuf-awq. Aqjeq mirnae aernar-aq, nawmaf khoerlof-aer narhaq-eu gar Sanqpaq Miqyaer nuima tsaq-eu mae.

²¹ Aqda deuq-or! Zaq nuima paerlarni taq janrnaeq. Janrnaeq nar-aq, aqyawfmaf nuighaq baq-ir-eu baw-mr.

²² Zaqkhav deuq-or! Yawqjeq navluf-euq lafkhoer, mirtsaq-euq khoertav jawr-eu nawmaf-euq yawsanr ghaq-euq aerdawq narhaq geuf-awq. Tsawrhaq nuikhanr bishir-eu laer aqcawq bimawrni taef-aer mr-eu jeq taqbi pyeuf. Nuima shawrjaevni ghae-awr, Sanqpaq Yeqsur-anr yawzeu baw-eu lafkhoer narhaq geuf-awq.

²³ Nawmaf kharmr kharshar-eu aqgeu jeq maqkaq, tsawrhaq-anr mrnaeq-eu maqngeur-eu, Sanqpaq Miqyaer-anr mrnaeq-eu lof-aer nuima keuv-awr mr-awq.

²⁴ Nawmaf, Sanqpaq Miqyaer nae bifnaeq laf-euq jeqbir-euq mrpoeq lafsawq za mae laer siqnya luf-eu mae. Aqjeq mirnae aernar-aq, nawmaf-aq, Sanqpaq Kali-euq gar mrluf-eu mae.

²⁵ Aerkhawf, yawlaeq mr-euq tsawrhaq-aq, yawqha nae mrtaq-euq lof-aer geuxni janrkhof naeq-eu gar yadaq taef-a. Miqyaer-aq, myavpyawq huiqnyir maqtser-a.