Gʼaˬkʼehˇ 25 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv, Gaersaq Nae Bi Darmawf-eu

¹ Beqtur, mirkhanq khoerkhanq-anr larkeuv-euq smq nan byanlar ngae, Gaersaqlir-anr nae Yeqlursaqlaeq-anr le-euq mae.

² Khoerngae, pirma yawhuiq ghaq hawr-eu Yurdav tsawrhaq-euq aqyuif aqtsu deuq, Pawrluv-euq garkawv aqyawf-anr daqler-awr tanqshar-euq mae.

³ Pawrluv-anr muirni, Yeqlursaqlaeq-anr bi sheuqha lar-eu gharduq, janrtsaq naeqlaf laer Beqtur-anr shar-euq mae. Aqjeq mirnae aernar-aq, aqyawfmaf garpaer khoeqlof-awr, Pawrluv-anr saef-eu laer noeqtaq-euq mae.

⁴ Aerkhawf, Pawrluv-aq, Gaersaqlir-anr kalanr taq-eu tsaq mae laer Beqtur aer-awr, aqyawf ghawqmyanr maqghae-aer khoergar ghof-ir ma laer aernaeq-euq mae.

⁵ Peqlir aer-eu, “Khoermirnae, nawmaf-euq lafkhoer aryaq jav-eu aqyuif geuf-eu deuq, ngaq-anr cantae lef-awr, tsawrhaq heughaq-euq yawlaeq daq-eu jeq jav nar-aq daqle-awq. Aqyawf-euq lafkhoer yawbanq aqjeq anr-eu nga laer haw taef-a.”

⁶ Beqtur, aqyawfmaf naeq-aer tser nan dzaeqni jawr-awr, Gaersaqlir-anr ghof-ir-euq mae. Nishawq ngae nan, aqyawf yarkhaq dar-eu nuirmanq-anr nuir-awr, dawq bif-awr, Pawrluv-anr bi sheuqlaq-ir-euq mae.

⁷ Khoernar-aq, Pawrluv larkeuv ngae, Yeqlursaqlaeq-anr nae oe-euq Yurdav tsawrhaq deuq, Pawrluv-euq tiqjawq yawf-awr, Pawrluv nae yawkhav-aer mrlaeq-euq ghawqmya jeq jav-eu mae laer daq-eu mae. Aerkhawf, aqyawfmaf aer-eu lof-aer, yawduq bawni tiqjeq-iq maq toeqmaeq nya-a.

⁸ Khoerngae, Pawrluv, aqyawf-euq garkawv jashawkhof naeq-eu, “Ngar-aq, Yurdav tsawrhaq-euq zanrdawq-anr khawf, uqduq tanqnymr nymrma-anr khawf, Gaersaq-anr khawf, mrbanq taq-euq tiqjeq-iq maqjav.”

⁹ Aerkhawf, Beqtur, Yurdav tsawrhaq-anr ya yurmawf-eu mirnae, Pawrluv-anr aernaeq-eu, “Nawr, Yeqlursaqlaeq-anr le-awr, garkawv heudeuq ngaq-euq maeqshi yarkhaq ja’mawf mir-a lor?”

¹⁰ Khoerngae, Pawrluv heulof-aer aerkhof naeq-euq mae: “Ngar, Gaersaq-euq yarkhaq dar-eu nuirmanq-euq maeqshi yawfluf-eu ma. Heugar jawr-awr ngaq-anr yarkhaq darnaeq-eu tsaq taef-a. Nawr siqduq-eu lof-aer, ngar, Yurdav tsawrhaq-anr mrbanq taq-euq tiqjeq-iq maqjav.

¹¹ Ngar shir paq-aer geux-eu yawlaeq mrtaq-euq jav-eu lawnmr-aq, yashir-eu law-awr khawf ngar tiqjeq-iq maqaer. Aerkhawf, aqyawfmaf, ngaq-euq yawlaeq daq-eu deuq, ngar tiqjeq-iq maq mrbanq-euq gar-aq, tsawrhaq tiqghaq-iq aqyawf maf-euq aqlaf-euq lafkhoer ngaq-anr maqbi keuv-ir nya-ar. Ngar, Gaersaq jawr-eu gar yarkhaq bidar-ir laf laer shar ma.”

¹² Khoerngae, Beqtur, khavma armur naeq-aer bawqdzaq ghaq-awr aer-eu, “Nawr, Gaersaq jawr-eu gar yarkhaq bidar-ir laf laer shar-eu mirnae, nawr, Gaersaq jawr-eu gar ya’ir taef-a.”

Pawrluv, Sanqpaq Deuq-euq Maeqshi

¹³ Ghawqmyanr maqghae-aer, sanqpaq Aqgirpav hawr-eu Beqlaqnir, Beqtur-anr dawqcawq puqlar-eu laer Gaersaqlir-anr lar-euq mae.

¹⁴ Aqyawfnyaf khoergar ghawqmya nan jawrkeuvlaf ngae, Beqtur, Pawrluv-euq garkawv sanqpaq Aqgirpav-anr heulof-aer ja’naeq-euq mae: “Heugar, Peqlir nae bi kalanr yaf-euq tsawrhaq tiq ghaq jawr-eu mae.

¹⁵ Ngar, Yeqlursaqlaeq-anr jawr ngae, pirma aqyuif deuq hawr-eu Yurdav tsawrhaq-euq aqyuif aqtsu deuq, aqyawf-euq garkawv ngaq-anr ja’naeq laf-awr, aqyawf-anr yarkhaq dartsaev-awq laer ngaq-anr shar-eu mae.

¹⁶ Ngar, aqyawf maf-anr heulof-aer aernaeq-euq ma, ‘Lormav-euq zanrsanrkhof-aq, yawlaeq mr-aq laer bidaq-euq ghaq yacawv-ir ni, yawlaeq mr-aq laer daq-euq ghaq naeq-aer myavpyawq ciqdaq-awr, yawlaeq khoer-euq garkawv maqya jashaw-euq khoerkeuvni, yarkhaq maq darnya-a.’

¹⁷ Khoermirnae, aqyawfmaf heugar oekeuv ngae, ngar maq nyinaqni, nishawq ngae nan nae yarkhaq dar-eu nuirmanq-anr nuir-awr, dawq bif-awr tsawrhaq heughaq-anr bi sheuqdov laq-ir-euq ma.

¹⁸ Khoerngae, aqyawf-anr yarkhaq ja’mawf-eu deuq tur-awr, aqyawf-euq yawlaeq daq-eu mae. Aerkhawf, ngaq nae noeqtaq-euq lof-aer tiqjeq-iq maq dzawrdov laf-a.

¹⁹ Aerkhawf, aqyawfmaf uqduq tanq-eu zanr-euq garkawv ja-awr, shirdzeur-euq Yeqsur laer kur-eu tiq ghaq-euq garkawv Pawrluv naeq-aer tsawrpyaer pyaer-eu mae. Aerkhawf, Pawrluv, Yeqsur heughaq-aq, daefluf-eu mae laer aer-eu mae.

²⁰ Garkawv heudeuq-anr ngar aqjox-aer ya pyaevtser-eu la laer noeq maqdov-eu mirnae, aqyawf, Yeqlursaqlaeq-anr le-awr, garkawv heudeuq khoergar yarkhaq jalermawf mir-a laq laer ngar narhaq-euq ma.

²¹ Aerkhawf, Pawrluv, Awrgurtuv nae yarkhaq maqbi dar-euq khoerkeuvni bijawr naeqlaf laer, aqyawf shar-eu mirnae, Gaersaq jawr-eu gar maq sheuqha-ir-euq khoerkeuvni, aqyawf-anr heugar kalanr taq-awq laer ngar dawq bif-euq ma.”

²² Khoernar-aq, Aqgirpav, Beqtur-anr aernaeq-eu, “Ngar khawf heughaq ja-eu gar narhaqmawf mir-a.” Khoerngae, Beqtur aer-eu, “Nishawq, nawr, aqyawf ngaeq-eu gar yagaq taef-a.”

²³ Nishawq ngae nan, Aqgirpav hawr-eu Beqlaqnir, aqyawfnyaf yawshaef khanqsaer za-eu lafkhoer tanrdzoeq guirhuq deuq hawr-eu meuq-euq lafkhoer jawr-eu yawhuiq yawmanr deuq naeq-aer bawqdzaq duq-anr urler-euq mae. Beqtur dawq bif ngae, Pawrluv-anr sheuqur laf-euq mae.

²⁴ Khoerngae, Beqtur heulof-aer aer-eu mae: “Sanqpaq Aqgirpav hawr-eu heugar jawrluf-eu tsawrhaq deuq-or! Heughaq-anr hawsher-eq. Ngar, Yeqlursaqlaeq-anr jawr ngae khawf, heugar jawr ngae khawf, Yurdav tsawrhaq dawqtawvluf, ngar jawr-eu gar tanqshar lar-awr, ‘Heughaq-anr yawdaef bidaef-eu maqpar geux mae’ laer gur duidui-eu mae.

²⁵ Aerkhawf, aqyawf shir paq-aer geux-eu yawbanq ngar maq povmawr-aq. Khoeruqtaf, Awrgurtuv jawr-eu gar yarkhaq bidar-ir naeqlaf laer Pawrluv aqyawfghaq shar-eu mirnae, ngar, aqyawf-anr bi sheuqha-ir ma laer noeqtsaev taq-euq ma.

²⁶ Aerkhawf, ngar, Pawrluv-euq garkawv ngaq-euq sanqpaq-anr aqjox-aer bofnaeq-eu laer yawduq maqbawnya siq. Khoermirnae, aqyawf-anr yawmuiq-aer narhaqtser ghaq-awr, aqyawf-euq garkawv ngar bofnaeq nya’ni, nawmaf-euq maeqshi, heunav maqtser sanqpaq Aqgirpav-or! Nawq-euq maeqshi, ngar, aqyawf-anr sheuqlaf-euq ma.

²⁷ Aqjeq mirnae aernar-aq, kuv-anr nyaefur taq-euq tsawrhaq tiqghaqnav bi’ir ngae, aqcawq, aqyawf-euq yawlaeq daq-eu garkawv yawmuiq-aer maq bofanr naeq-eu-aq, tiqpawf-iq maqtsaq-a laer ngar noeq-eu ma.”