Gʼaˬkʼehˇ 19 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv, Erpersu-anr Jawr-euq

¹ Aqpawrluv, Gawrliqtu-anr jawr ngae, Pawrluv laftav paw-euq mirkhanq deuq-anr cantsaev-awr, Erpersu-anr irkeuv-euq mae. Khoergar, zaqlanr heumyav ghaq-anr tanqpuq-awr,

² aqyawf, aqyawf maf-anr aernaeq-eu, “Nawmaf janlar ngae Yawshawr Saflar za’maq lor?” Khoerngae, aqyawfmaf aer-eu, “Nga’maf, Yawshawr Saflar-euq garkawv gaq-eu taef-aer khawf maq gaqhaw-aq.”

³ Khoerngae, Pawrluv aer-eu, “Tox-aer mar-iq, nawmaf aqgeu jeq-euq bartirsaq-anr hageuf-euq le?” Khoerngae, aqyawfmaf aer-eu, “Yorhaq-euq bartirsaq-anr hageuf-euq ma.”

⁴ Khoerngae, Pawrluv aer-eu, “Yorhaq-euq bartirsaq-aq, noeqpov noeqpar-eu bartirsaq mae. Yorhaq, tsawrhaq khoerdeuq-anr aqyawf-euq maeqnan oe-eu ghaq-anr jan-awq laer aernaeq-euq mae. Khoerghaq-aq, Yeqsur Kali mae.”

⁵ Aqyawfmaf dawq khoerdawq-anr yagaq ngae, Sanqpaq Yeqsur-euq tsawrmyanr-euq uqmov bartirsaq hageuf-euq mae.

⁶ Khoernar-aq, Pawrluv, aqyawf maf-euq khoertav aqlaf bafdavnaeq ngae, aqyawf maf-euq khoertav Yawshawr Saflar zafka le-euq mae. Aqyawfmaf dawqbav bav-eu uqtaf, Miqyaer gharduq ngaeqdan-eu mae.

⁷ Aqyawf maf-aq, zaqyo aqli deuq dawqtawvluf 12 ghaq aerghaqni byan-eu mae.

⁸ Khoernar-aq, Pawrluv zanrdawq khawqnymr-anr urler urler-aer, khaqduqni bala smr siq aerghaqni, aqyawf maf-anr gheupyawr khof-eu gharduq, Miqyaer uvlanr-eu garkawv jasawx jasawx-aer jawr-euq mae.

⁹ Aerkhawf, tiqpavnav deuq nuima ghanr-awr maqjan-aer, tsawrhaq armaf mafma-euq maeqshi Yeqsur-euq Garma-anr dawqdoer ngaeq-eu mae. Khoerngae, Pawrluv, aqyawfmaf jawr-eu gar nae dov-ir-awr, zaqlanr deuq-anr khawf, aqyawf maf-euq lafkhoer nae bi dovle-awr, nan-anr nae Durlaqnmr-euq dawqmaeq maeq-eu dzawnymr-euq lafkhoer jasawx-euq mae.

¹⁰ Aqyawf nyiq khof byanni khoerlof-aer janr-euq mirnae, Aqsir mircoer-anr kharjawr-eu tsawrhaq dawqtawvluf Yurdav tsawrhaq deuq khawf, Heqlaqsar tsawrhaq deuq khawf, Sanqpaq Yeqsur-euq dawq yagaq-euq mae.

Naef Nae Bitae-euq Geqbar-euq Zaqyo Deuq

¹¹ Miqyaer, Pawrluv-euq aqlaf-anr ghoe-awr nae, tiqjawr-iq maq mawrhaw-euq khavjeq-aer ghae-eu jeq mr-euq mae.

¹² Khoermirnae, Pawrluv-euq mawrdo-anr nae lafsiv maqngeur nar-aq, tsanrghaq-eu saqpar, nar-awr gawr-eu deuq jawr-eu gar yurghae-awr ghovdavnaeq ngae, nargawr taqler-awr, naef yawjawf deuq khawf dov-ir-eu mae.

¹³ Khoerngae, doedoe-aer cancan-aer, naeftor tor-awr naef taedov luf-eu Yurdav tsawrhaq heumyav ghaq, Sanqpaq Yeqsur-euq tsawrmyanr-anr ghoeghoe-aer naef yawjawf ur-eu deuq-anr aernaeq-eu, “Nga’maf, Pawrluv dawqmaeq maeqluf-eu Yeqsur khoerghaq-euq tsawrmyanr-anr ghoe-awr, nawmaf dovle-awq laer dawq bif-eu ma.”

¹⁴ Khoerlof-aer mrluf-eu deuq-aq, Geqbar laer kur-eu Yurdav tsawrhaq-euq pirma aqyuif tiq ghaq-euq zaqyo shif ghaq mae.

¹⁵ Khoerngae, naef yawjawf, aqyawf maf-anr aerkhof naeq-eu, “Ngar, Yeqsur-anr siqnya-awr, Pawrluv-anr khawf siqnya ma. Aerkhawf, nawmaf teu, aqsur ghaq le?”

¹⁶ Khoernar-aq, naef yawjawf ur-eu khoerghaq, aqyawf maf-anr tsawqdawf lef-awr, aqyawf maf-anr khavghaq-awr, dawfghaq-euq mirnae, aqyawfmaf bi lavnar bi lavgawr-awr, nymr khoernymr-anr nae nermyawvni caevdovghae lef-euq mae.

¹⁷ Garkawv heu-aq, Erpersu-anr jawr-eu Yurdav tsawrhaq hawr-eu, Heqlaqsar tsawrhaq dawqtawvluf yasiq-euq mae. Aqyawfmaf dawqtawvluf guv duidui-awr, Sanqpaq Yeqsur-euq tsawrmyanr-anr yawkhav-aer ciqhuiq ciqmanr-eu mae.

¹⁸ Kali-anr janlar-euq tsawrhaq ghawqmya’ni lar-awr, yawqha nae mrlaeq taq-euq deuq aerdov aerdov-aer ja’naeq luf-eu mae.

¹⁹ Mawloq loqnya-eu tsawrhaq ghawqmya ghaq khawf, aqyawf maf-euq sanqbof pardmq bafuiq laf-awr, tsawrhaq dawqtawv luf-euq maeqshi keuqdzae-euq mae. Aqyawfmaf pardmq khoer-euq arpoeq sawxhaw ngae, pyur marbyav 50,000 byav poeq-eu mae.

²⁰ Khoermirnae, Sanqpaq Miqyaer-euq dawq-aq, ghaq khavlar luf-awr ghaqler luf-eu mae.

Erpersu-anr Luiqgha Lar-euq

²¹ Garkawv heudeuq pyeuflar dzeur-euq nar-aq, Pawrluv, Maqgeqdawrniv mirkhanq hawr-eu Aqgaqyar mirkhanq-anr irtsaev ghae-awr, Yeqlursaqlaeq-anr le ma laer muiq-eu Saflar-euq lafkhoer noeqtsaev-euq mae. Aqyawf aer-eu, “Ngar khoergar leghaq-euq nar-aq, Lormav meuq-anr khawf yale-a siq.”

²² Khoermirnae, aqyawf-anr cawba-eu deuq-euq lafkhoer nae, Tivmorseq hawr-eu Erlaqdur aqnyaf-anr Maqgeqdawrniv mirkhanq-anr bile-awr, aqyawf-aq, Aqsir mircoer-anr tiqkhaeq par jawryaf-euq mae.

²³ Khoerngae yamq-anr, Yeqsur-euq Garma-euq baqda’nae yawkhav-aer luiqgha lar-euq mae.

²⁴ Aqjeq mirnae aernar-aq, Deqmeqdeqlir laer kur-eu pyur taev-eu tiq ghaq jawr-eu mae. Aqyawf-aq, pyur yur-awr Aqdeqmir miqyaerma-euq lawrguir guirzaq taev-eu mae. Aqyawf-euq baqda’nae, lafmyawq lafmuv mr-eu tsawrhaq deuq jirjeuq ghawqmya’ni zaluf-eu mae.

²⁵ Aqyawf pyur taev-eu deuq hawr-eu khoerlof-aer ghae-eu gar mr-eu deuq-anr kuruiq-awr heulof-aer aer-eu mae, “Cawqdeuq-or! Gar heu-euq baqda’nae, aqdui smrmuiq muiqlar-euq ma laer nawmaf siqnya-eu mae.

²⁶ Aerkhawf, tsawrhaq-euq aqlaf nae taev-euq miqyaer deuq-aq, miqyaer maqngeur-a laer Pawrluv heughaq aeraer-aer, Erpersu-anr taef-aer maqngeur-eu, Aqsir mircoer yawqgar navluf aerghaqni, aqyawf, tsawrhaq ghawqmya ni-anr gheupyawr-awr nuima lavpar luf-eu gar nawmaf yagaq ya’mawr-euq mae.

²⁷ Khoermirnae, aqdui-euq gar heu tsawrmyanr cawv-ir-eu taef-aer maqngeur-eu, Aqsir mircoer hawr-eu mirtsaqzaq dawqtawvluf uqduq tanqluf-eu, khanqsaer huiq-eu Aqdeqmir miqyaerma-euq uqduq tanqnymr khawf, tiqjeq-iq gardanr maqtsoeq-eu lof-aer pyeuf-ir-awr, aqyawf-euq yawshaef khanqsaer khawf cawv-ir gar yaguv-eu mae.”

²⁸ Aqyawfmaf dawq khoerdawq-anr yagaq ngae, nuima yawkhav-aer paerlar-awr gur-eu, “Erpersu tsawrhaq-euq Aqdeqmir-aq, huiqdui manr duidui-eu mae!”

²⁹ Khoerngae, meuq meuqlan-aer luiqgha lar-euq mae. Aqyawfmaf, Pawrluv naeq-aer canluf-eu Maqgeqdawrniv mirkhanq-anr jawr-eu Gaqyur hawr-eu, Aqliqdaqgur-anr gheu-awr, meuq-euq yawbui buiduq-anr uiqler-euq mae.

³⁰ Pawrluv, tsawrhaq armaf mafma jawr-eu gar urler mawf-eu khawf, zaqlanr deuq, aqyawf-anr maqbi urler-a.

³¹ Pawrluv-euq cawq Aqsir mircoer-euq sanrmrzaq geuf-eu tiqpavnav deuq khawf, yawbui buiduq-anr urler-awr yawqha-anr taq lavshaq laer dawqtsaf tsafanr lef-awr aqyawf-anr shar-euq mae.

³² Khoergar uiqler taq-euq tsawrhaq deuq, aqyawfmaf myaqni tiqpav-aq, aqjeq mirnae uiqlar-euq le laer maq siqnya-aer, yawbanq yawlanr-aer ghaeluf-eu mirnae, tiqghaq tiqjeq-aer gur-eu mae.

³³ Khoerngae, aqcawq, Aqleqsaqdur-anr gheudov lef-awr, Yurdav tsawrhaq nae aqyawf-anr tsawrhaq khoerdeuq-euq maeqshi daeqdov ghae-euq mae. Khoernar-aq, Aqleqsaqdur, tsawrhaq armaf mafma deuq-anr garkawv jashawnaeq mawf-eu mirnae, aqlaf bafdir-euq mae.

³⁴ Aerkhawf, aqyawfmaf, heughaq-aq, Yurdav tsawrhaq nga laer yasiq ngae, naqliq nyiq laf aerghaqni, aqyawfmaf dawqtawvluf tiqkawv lof-aer heulof-aer gur-eu mae, “Erpersu tsawrhaq-euq Aqdeqmir-aq, huiqdui manr duidui-eu mae!”

³⁵ Khoerngae, meuq-anr sanrmr-eu aqyuif ghaq nae tsawrhaq armaf khoermaf-anr lavcof-awr heulof-aer aernaeq-euq mae, “Erpersu-anr jawr-eu tsawrhaq deuq-or! Erpersu-aq, huiq-awr manr-eu Aqdeqmir miqyaerma-euq uqduq tanqnymr-anr hawr-eu Jursav-anr nae gale-euq mawrkawr-anr hawpir-eu meuq mae laer maq siqnya-eu aqsur ghaq jawr-eu la?

³⁶ Garkawv heudeuq-anr tsawrpyaer pyaerkhar maqza-eu mirnae, maq sharnoeq-aer tiqjeq-iq taqjanr, nawmaf ciqcurni jawr-eu tsaq mae.

³⁷ Tsawrhaq heudeuq-aq, uqduq tanqnymr-anr tanrjoe dae-euq maqngeur-aer, aqdui maf-euq miqyaerma-anr yaeqbawq saerlu-aer aer-euq khawf maqngeur-eu gar nae, nawmaf, aqyawf maf-anr heugar sheuqlef-euq ngar-a.

³⁸ Khoermirnae, Deqmeqdeqlir hawr-eu aqyawf-euq cawq lafmyawq lafmuv mr-eu deuq, tiqghaqnav yarkhaq ja’mawf nar-aq, yarkhaq darduq pantaq-awr, sanrmr-eu deuq khawf jawr-eu mae. Aqyawf maf-euq yawkaq yarkhaq bija-awq.

³⁹ Aerkhawf, nawmaf garkawv yawqjeqyawq parjav nar-aq, zanr-anr tsaqler-eu lafkhoer uiqler ngae, nawmaf-euq garkawv bi dartsaev taef-a.

⁴⁰ Iqnan luiqgha lar-euq gar tafler-awr nae, aqcawq, aqdui-euq yawlaeq nyaeflar-eu gar khanqlanrkhar za-eu mae. Aqjeq mirnae heulof-aer uiqler-awr luiqgha banqgha luf-eu le laer aqcawq narhaqlar nar-aq, aqdui yawduq duq-aer tiqjeq-iq maq aerkhofnaeq nya-a.”

⁴¹ Aqyawf khoerlof-aer aernaeq ghaq-awr, uiqlar-euq tsawrhaq deuq-anr bighawq-ir-euq mae.