Gʼaˬkʼehˇ 14 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Irgawrnir-anr Maeq-euq

¹ Aqyawfnyaf Irgawrnir-anr jawr-awr, Yurdav tsawrhaq-euq zanrdawq khawqnymr-anr tiqkawv lof-aer davler-euq mae. Khoergar dawqmaeq maeqnaeq-euq mirnae, Yurdav tsawrhaq hawr-eu Heqlaqsar tsawrhaq armaf mafma janlar-euq mae.

² Aerkhawf, aqyuif aqnyir deuq-anr muirni, maqjan-eu Yurdav tsawrhaq deuq-aq, aqcawq tsawrjeuq tsawrca-anr lavteuv-awr, aqyawf maf-euq nuinoeq-anr dzardof dawv-euq mae.

³ Aqyawfnyaf khoergar ghawqmyanrni jawr-awr, Sanqpaq Miqyaer-euq lafkhoer khaqduqni ngaeq-euq mae. Aqyawfnyaf ngaeqluf-eu aqyawf-euq guiqlanq yawdzanr-euq dawq khoer-anr sarkir bipyeuf-eu gharduq, aqyawf nyaf-euq aqlaf-anr ghoe-awr, bisiq bimawr-eu jeq hawr-eu zanqler paq-aer ghae-eu jeq ghawqmya jeq mr-euq mae.

⁴ Aerkhawf, meuq khoermeuq-anr jawr-eu tsawrhaq armaf deuq nyiq mur pav-ir-euq mae. Tiqpav-aq, Yurdav tsawrhaq jawr-eu paw pyawq-awr, tiqpav-aq, ghaqkhaer deuq jawr-eu paw pyawq-euq mae.

⁵ Khoerngae, aqcawq tsawrjeuq tsawrca hawr-eu Yurdav tsawrhaq deuq, aqyawf maf-euq aqyuif aqtsu deuq naeq-aer, ghaqkhaer khoer nyiq ghaq-anr yaeqbawq saerlu-aer janrnaeq-awr, khaqlo nae biq-eu laer ghae-euq mae.

⁶ Aqyawfnyaf garkawv khoer-anr yasiq ngae, Lurgawrnir mirkhanq-anr jav-eu Lurdaqlar meuq, Deqbeq hawr-eu jawqlaw jawrlawr jav-eu jawrkhanq-anr caev-ir-euq mae.

⁷ Khoergar khawf, aqyawfnyaf guiqlanqdawq maeq-euq mae.

Lurdaqlar Meuq-anr Maeq-euq

⁸ Khoerngae, Lurdaqlar meuq-anr daefle ngae nae aqkuir yawcawv mirnae aqkuir ghaq maqanr-aer, garma tiqtof-iq maq canhaw-euq tsawrhaq tiq ghaq nuirluf-eu mae.

⁹ Aqyawf, Pawrluv ngaeq-eu gar narhaq luf-eu mae. Pawrluv, aqyawf-anr hawtsov taq-awr, aqyawf taqlerni jan-eu nuima anr-eu nga laer hawsiq ngae,

¹⁰ Pawrluv tersar yawkhav-aer aer-eu, “Nawr tsawqtur-awr dawrcoeni yawf-awq.” Khoerngae, khoerghaq tsawqtur-awr garma can-eu mae.

¹¹ Khoernar-aq, mirkhanqzaq, Pawrluv khoerlof-aer janr-eu gar ya’mawr ngae, Lurgawrnir-euq dawq nae gur-eu, “Miqyaer deuq, tsawrhaq lof-aer pyeuf-awr, aqdui jawr-eu gar zafka le-euq nga!”

¹² Aqyawfmaf, Baqnaqbar-anr Jursav laer kur-awr, Pawrluv-anr-aq, dawq ngaeqmyaq dzaeq-eu mirnae, Heqmeq laer kur-eu mae.

¹³ Khoerngae, meuq-euq meuqdzer jav-eu Jursav-euq uqduq tanqnymr-anr jawr-eu pirma, mawrner tsanr-awr, aryaev lanrdan yur-awr, meuq-euq lanrkhaeq-anr lar-euq mae. Aqyawf, tsawrhaq armaf mafma deuq naeq-aer lawrnaeq-eu laer lar-euq mae.

¹⁴ Aerkhawf, ghaqkhaer Baqnaqbar hawr-eu Pawrluv garkawv khoer-anr yagaq ngae, paerkhanq gheupyaq-awr, tsawrhaq armaf mafma-euq ghanrcae caevur ghae-awr gurgur-aer,

¹⁵ heulof-aer aer-eu mae: “Aqyuif aqnyir deuq-or! Aqjeq mirnae teulof-aer janr-eu le? Nga’nyaf khawf nawmaf lof-aer dur-eu tsawrhaqzaq pyeuf-eu ma. Nga’nyaf, nawmaf-anr dawqmaeq maeqle-euq heu-aq, nawmaf gardanr maqtsoeq-eu teudeuq-anr byaerdzae-awr, mq hawr-eu mir, iqmalavshav hawr-eu kharjawr kharjav-eu jeq dawqtawv luf-anr bae-euq ghaq pyeuf-eu, daefluf-eu Miqyaer jawr-eu paw bi ghofpyawr lar-eu gharduq ma.

¹⁶ Dzeurlaf-euq aryamq-euq lafkhoer, mirkhanq-euq tsawrjeuq dawqtawv luf-anr yawqha-euq nuinoeq nuidur lof-aer daefni, Miqyaer pyaeq-euq mae.

¹⁷ Aqjox-aer law-awr khawf, aqyawf yawmuiq jeq mr-euq mae laer aqyawf-euq gharduq sarkir maqbi jawr-aer maqbyaerni, aqyawf, aqdui-anr mq-anr nae uqyaer bif-awr, yamqlaw tsaqni dzaqla ghovcaer bibaw bi zale-eu mae. Khoer-aq, aqdui-euq nuima-anr dzaqdzaq dawrdawr hawr-eu laqkhaq caer-eu jeq bibyan-eu gharduq mae.”

¹⁸ Aqyawfnyaf khoerlof-aer aer-awr nae mirtsa, aqyawf nyaf-anr lawrnaeq-eu laer ghae-eu tsawrhaq armaf-anr, maqghaq maqnav-aer lavnaq nya-euq mae.

¹⁹ Khoerngae, Yurdav tsawrhaq Aqdirawq hawr-eu Irgawrnir-anr nae khoergar oe-euq mae. Aqyawfmaf, tsawrhaq armaf mafma-anr gheupyawr nya-awr, Pawrluv-anr khaqlo bibiq-euq mae. Aqyawf shir-euq jeq nga laer noeq-awr, meuq-euq lafnyir gheudzae-ir-euq mae.

²⁰ Aerkhawf, zaqlanr deuq, aqyawf ga-eu tiqjawq yawfluf ngae, aqyawf turlar-awr, meuq-anr urler-euq mae. Nishawq ngae nan, Baqnaqbar naeq-aer Deqbeq-anr ir-euq mae.

Janlar-euq Deuq-anr Ghaq Bif-euq

²¹ Aqyawfmaf, Deqbeq-anr jawr-eu tsawrhaq-anr guiqlanqdawq maeqnaeq-awr, tsawrhaq ghawqmya ghaq zaqlanr pyeuflarni mryaf-euq mae. Khoernar-aq, aqyawfnyaf, Lurdaqlar, Irgawrnir hawr-eu Aqdirawq meuq-anr ghofler-euq mae.

²² Zaqlanr deuq nuima saflar, ghaq khavlarni, aqmyanluf jan-awr nuima zifdanni jawr-awq laer ghaq bifnaeq-eu lafkhoer aer-eu, “Aqdui, Miqyaer uvlanr-eu jeq-anr urler nya’ni, shaqzanq ghawqmya jeq-anr ya tanqpuq-eu mae.”

²³ Aqyawfnyaf, Kalizaq armur yawqmur navluf-anr, aqyuif aqtsu tserdov naeq-awr, dzardzaq sheuq-awr guiqlanq shar-eu lafkhoer, aqyawfmaf janluf-eu Sanqpaq Miqyaer-euq aqlaf-euq lafkhoer a’naeq yaf-euq mae.

²⁴ Aqyawfnyaf, Birsirdir mirkhanq-anr cantsaev-awr, Paqburlir mirkhanq-anr irkeuv-euq mae.

²⁵ Beqlaqgeq meuq-anr Yaerdawq maeqnaeq-awr, Aqdaqlir meuq-anr ir-euq mae.

²⁶ Khoergar nae nar-aq, lawq dziq-awr Aqdirawq-anr ghofkeuv-ir-euq mae. Yawbae, meuq khoermeuq-euq lafkhoer jawr ngae, aqyawfnyaf, Miqyaer-euq gar mr-eu gharduq, aqcawq, aqyawf nyaf-anr Miqyaer-euq guiqlanq yawdzanr-euq lafkhoer a’naeq-euq mae. Nymq-mr aqyawfnyaf gar khoer-anr mrluiv-euq mae.

²⁷ Aqyawfnyaf ghofkeuvle ngae, Kalizaq armur-anr tiqgar kuruiq-awr, Miqyaer, aqyawf nyaf-anr ghoe-awr kharmr kharshar-euq garkawv hawr-eu, aqcawq tsawrjeuq tsawrca, Kali-anr janlarni Miqyaer larghov aqjox-aer pannaeq-euq garkawv, aqyawf maf-anr dzawrnaeq-euq mae.

²⁸ Aqyawfnyaf khoergar zaqlanr deuq naeq-aer ghawqmyanrni jawr-euq mae.