Eˇpeˇsu 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqma Aqda Hawr-eu Zaq

¹ Zaqdeuq-or! Sanqpaq Miqyaer-euq lafkhoer yawqha-euq aqma aqda-euq aerdawq narhaq geuf-awq. Nawmaf khoerlof-aer mr-eu-aq tsaq-eu mae.

² “Nawqma nawqda-anr yawzeu baw-awq,” (Di 20:12) laer aertaq-euq zanrdawq khofdawq heudawq-aq, sarjax dzaqtaq-euq zanrdawq khofdawq yawbae dawq mae.

³ “Khoerlof-aer yawzeubaw nar-aq, nawq-euq gharduq yawqjeq navluf muiq-awr, mirtsaq-euq khoertav daef ngae zirbaw zirza taef-a.” (Di 5:16)

⁴ Aqda deuq-or! Nawmaf-euq zaqdeuq nuima paerlar paq-aer taqjanr. Nawmaf zaqciq zaqcu mr ngae, Sanqpaq Miqyaer nae maeqnaeq laf-euq lof-aer, aqyawf maf-anr maeqnaeq tsovnaeq-awr maeqbym naeq-awq.

Kuirlaf Zaqkhav Hawr-eu Yawsanr

⁵ Kuirlaf zaqkhav geufluf-eu deuq-or! Kali-euq aerdawq narhaq geuf-eu lof-aer, shiqshaq paw nawmaf-euq yawsanr-euq aerdawq-anr nuima shawrjaevni taq-awr, guv-awr yawdzuq dzuq-eu lafkhoer narhaq geuf-awq.

⁶ Tsawrhaqzaq nuikhanr bishir-eu laer, aqcawq mawr ngae taef-aer mr-eu jeq taqbi pyeuf. Kali-euq kuirlaf zaqkhav lof-aer, nuima-euq lafkhoer nae Miqyaer nuima tsaqni mr-eu jeq bipyeuf-awq.

⁷ Nawmaf, gar mr ngae, tsawrhaq-euq gharduq mrle laer maqngeur-eu, Sanqpaq Miqyaer-euq gharduq nuima keuv-awr mr-awq.

⁸ Aqjeq mirnae aernar-aq, zaqkhav khawf, buq-ir-euq tsawrhaq khawf, yawqha nae yawmuiq jeq mrtaq-euq lof-aer geuxni, Sanqpaq Miqyaer bifnaeq laf-eu gar za taef-a laer siqnya-awq.

⁹ Yawsanr deuq-or! Nawmaf khawf, aqyawf maf-anr tiqkawv lof-aer durni janrnaeq-awr, aqyawf maf-anr guvtsiq taqnyaef. Nawmaf-euq Yawsanr ghaq khawf, mq-euq khoertav jawr-awr myavpyawq huiqnyir maqtser-a laer siqnya-awq.

Miqyaer-euq Guirdeuv Keuka

¹⁰ Ngaq-euq aqyuif aqnyir deuq-or! Arsaq saq-eu dawq-aq heulof-aer ma. Nawmaf, Sanqpaq Miqyaer-euq lafkhoer, ghaq khav-eu aqyawf-euq baoq-anr ghoe-awr, ghaq khavlar-awq.

¹¹ Nawmaf, Miqyaer nae bifnaeq laf-euq guirdeuv keuka dawqtawv luf-anr dm-awr, naef sanqpaq-euq maershuir bawqtov-anr lavtsoeq nya’ni yawfzif taq-awq.

¹² Aqjeq mirnae aernar-aq, aqdui guirdeuv deuv-eu-aq, shiq hawr-eu shaqjir-anr deuvluf-eu maqngeur. Aqdui heudeuq-anr deuvluf-eu ma, mqsanr deuq, aryaq deuq, mirtsaq yawzanr-euq khoertav baoq jav-eu deuq hawr-eu, mq-anr jawr-eu yawcawv-euq saflar deuq-anr deuvluf-eu ma.

¹³ Khoermirnae, doer-eu arnan keuvle ngae ciqdaqnya paq-aer, Miqyaer nae bifnaeq laf-euq guirdeuv keuka dawqtawvluf dm-awq. Nawmaf, khar mrnya-eu yawqjeq navluf mr-euq nar-aq, zifdanni yawfnya taef-a.

¹⁴ Khoermirnae, jofpaf paf-eu lof-aer yawtsaq yawdawr paf-awr, khanq-anr daeqkaq-eu jeq lof-aer tsaq-awr dawr-eu jeq dm-awr zifdanni yawf-awq.

¹⁵ Aqkuir, saeqnawv nawq-eu lof-aer, tsaqler dzoerler-eu guiqlanqdawq nawq-awr laeqhmq taq-awq.

¹⁶ Khoeruqtaf, daeqdaq-eu jeq lof-aer jan-eu jeq-anr zifdanni tuvtaeq taq-awq. Jan-eu daeqdaq-eu jeq khoer-aq, yawcawv ghaq nae beuvlaf-euq miqdzaq dof-eu kavmyaq dawqtawv luf-anr lavmiv nya-eu mae.

¹⁷ Shmr uqkhov khov-eu lof-aer kakhof-eu jeq-anr khov-awr, micaer shaf-eu lof-aer muiq-eu Saflar-euq micaer pyeuf-eu Miqyaer-euq dawq-anr shaf-awq.

¹⁸ Nawmaf, ghaqpyawq dawqtawvluf zmq-awr aqmyanluf guiqlanq shar-awq. Muiq-eu Saflar-euq lafkhoer tanqshar-awq. Yawbeur beur-aer oror-aer guiqlanq shar-awq. Tsawrshawr dawqtawv luf-euq gharduq guiqlanq sharcaw naeq-awq.

¹⁹ Ngar guiqlanq dawq-anr taf-eu zaftaq-euq jeq-euq garkawv bisiqni, khaqmae mrnga-awr ngaeq-eu laer ghae ngae, Miqyaer, ngaq-anr dawq bifnaeq laf-awr, nuima khaqduqni maeqnya’ni, ngaq-euq gharduq khawf guiqlanq sharcaw naeqlaf-awq.

²⁰ Khoer-euq gharduq, ngar shmrcav daq-awr danzar danluf-eu ma. Ngar shmrcav daqluf-eu lafkhoer, nuima khaqduqni ngaeq paq-aer ghae-eu lof-aer ngaeqnya’ni khawf, guiqlanq sharcaw naeqlaf-awq.

Arsaq Saq-eu Dawq

²¹ Ngar aqjox-aer pyeufluf-awr, aqjox-aer mrluf sharluf-eu garkawv nawmaf yasiqni, sarjax zif-awr Sanqpaq Miqyaer-euq kuirlaf zaqkhav pyeuf-eu, ngar zawr gaq-eu maernmr Durjir, nawmaf-anr yawqjeq navluf ja’maeq naeqlaf taef-a.

²² Nga’maf aqjox-aer pyeufluf-eu garkawv nawmaf-anr bisiq-awr, nawmaf-euq nuima bi sarlar-eu gharduq, ngar, aqyawf-anr nawmaf jawr-eu gar khaerghae lef-euq ma.

²³ Aqda Miqyaer hawr-eu Sanqpaq Yeqsur Kali-anr nae oe-euq, nuisar of-eu jeq, gaq-eu jeq hawr-eu jan-eu jeq, aqyuif aqnyir deuq-euq khoertav jav luf-ur.

²⁴ Aqdui-euq Sanqpaq Yeqsur Kali-anr maqbyov-ir ni gaq-eu tsawrhaq yawqghaq navluf-euq khoertav, guiqlanq yawdzanr jav luf-ur. Aqmeq.