Eˇpeˇsu 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Gaq-eu Lafkhoer Daef-awq

¹ Nawmaf-aq, Miqyaer zawr gaq-eu zaqdeuq pyeuf-eu mirnae, Miqyaer mr-eu lof-aer mrcaw-eu tsawrhaq pyeuflar-awq.

² Kali, aqdui-anr gaq-awr, aqyawf-euq mawrdo, Miqyaer-anr damqnaeq-eu jeq hawr-eu lawrnaeq-eu yawsaw jeq lof-aer aqdui-anr bifnaeq laf-euq mae. Khoermirnae, nawmaf khawf gaq-eu lafkhoer daef-awq.

³ Nawmaf-aq, tsawrshawr pyeuf-eu gar tsaqni, aqcawq-euq myawq-anr maerjuir juir-eu, maqshawr-eu yawqjeq navluf hawr-eu, banq-awr muv-eu garkawv, nawmaf-euq yawkaq ja-eu taef-aer khawf taq jadov.

⁴ Jawflafni ghae-eu dawq, aqdzawq argan-euq dawq hawr-eu caeflaefka nirgha-eu dawq heudeuq, nawmaf tiqpawf-iq ngaeq-eu maqtsaq-a. Miqyaer-anr jaceuq-eu dawq taef-aer ngaeq-eu tsaq mae.

⁵ Aqjeq mirnae aernar-aq, banq-awr joe-eu tsawrhaq, maqshawr-eu tsawrhaq, maerjuir juir-eu tsawrhaq hawr-eu, tanqpanq aqma mawrkawr-anr uqduq tanq-eu tsawrhaq-aq, Kali hawr-eu Miqyaer uvlanr-eu lafkhoer jeqbir maq za’nya-a laer nawmaf siqnya-eu mae.

⁶ Gardanr maqtsoeq-eu dawq zmq-awr tiqghaq nae-iq nawmaf-anr maershuir taqbi shuirtawvlar. Aqjeq mirnae aernar-aq, heudeuq-euq baqda’nae, Miqyaer nuima paer duidui-eu jeq, maq narhaq geuf-eu tsawrhaq-euq khoertav keuvle taef-a.

⁷ Khoermirnae, nawmaf khoerlof-aer ghae-eu tsawrhaq naeq-aer taq gmler.

Yawshaef-euq Lafkhoer Daef-awq

⁸ Dzeurlaf ngae, nawmaf yawzanr pyeuf-eu khawf, nymq-mr-aq, Sanqpaq Miqyaer-euq lafkhoer yawshaef pyeuflar-euq mae. Khoermirnae, yawshaef-euq zaq lof-aer daef-awq.

⁹ (Aqjeq mirnae aernar-aq, muiq-eu Saflar-euq arsiq-aq, tsaq-awr dawr-eu jeq, yawtsaq yawdawr jeq hawr-eu yawmuiq jeq dawqtawv luf-euq lafkhoer anr-eu mae).

¹⁰ Nawmaf, Sanqpaq Miqyaer nuima tsaq-eu jeq aqjeq nga laer povduq-awq.

¹¹ Yawzanr jeq naeq-aer gardanr maqtsoeq-eu gar mr-eu gar maq gmler-aer, gar khoer yawbya-anr bi dovlar-awq.

¹² Aqyawfmaf barzaf-anr mrkhoeq luf-eu khoerdeuq-aq, ngaeqkeuv-eu taef-aer khawf, shafdawrlar paq-aer ghae-eu mae.

¹³ Aerkhawf, yawbya-anr bi dovlar-euq yawqjeq navluf, yawshaef-euq baqda’nae byacaevni mawrlar-eu mae. Aqjeq mirnae aernar-aq, byacaevni bi mawrlar-eu jeq-aq, yawshaef mae.

¹⁴ Khoermirnae, aqyawf aer-eu, “Yufkhav taq-euq tsawrhaq-or! Noeqlar-awr, shir-euq gar nae ghofdaef lar-awq. Kali, nawmaf-anr yawshaef bya’naeqlaf taef-a.”

Zaqsiq Tsawrganr Anr-awr Daef-awq

¹⁵ Khoermirnae, nawmaf yanryanr-aer daef-awq. Aqdzawq argan lof-aer maqngeur-eu, zaqsiq tsawrganr anr-eu tsawrhaq lof-aer daef-awq.

¹⁶ Nymq-mr-euq arnan aryamq-aq, doer duidui-eu mirnae, aryamq-anr dzoeqdzaq yawmuiq-aer mr-awq.

¹⁷ Khoermirnae, maqganr-eu tsawrhaq taqgeuf. Sanqpaq Miqyaer nuima tsaq-eu aqjeq nga laer ghovshaw nya-awq.

¹⁸ Jirbaq taq dawryaef. Dawryaef nar-aq, yawuq uq-ir nya-eu mae. Aerkhawf, nawmaf-euq lafkhoer muiq-eu Saflar bi byanlar-awq.

¹⁹ Nawmaf, tiqghaq tirghaq ngaeqcawq ngae, jaceuq-eu dawq, jaceuq-eu cardawq hawr-eu saflar paw-euq cardawq nae ngaeqcawq-awq. Nuima-euq lafkhoer keuvni carcar-aer Sanqpaq Miqyaer-anr jaceuq-awq.

²⁰ Aqdui-euq Sanqpaq Yeqsur Kali-euq tsawrmyanr-anr ghoe-awr, aqmyanluf yawqjeq navluf-euq lafkhoer, Aqda Miqyaer-anr jaceuq-awq.

Miqzaq Yozaq-euq Garkawv

²¹ Miqyaer-anr yawzeu baw-eu lafkhoer, tiq ghaq-euq lafov tiq ghaq yawmuiq-aer jawr-awq.

²² Miqzaq deuq-or! Sanqpaq Miqyaer-euq uqmov jawr-eu lof-aer yawqha-euq khaqdzerzaq-euq lafov yawmuiq-aer jawr-awq.

²³ Aqjeq mirnae aernar-aq, Kali-aq, Kalizaq armur-euq uqduq pyeuf-awr, aqyawf-euq mawrdo pyeuf-eu Kalizaq armur-anr Kakhof-eu ghaq pyeuf-eu lof-aer, khaqdzerzaq-aq, miqzaq deuq-euq uqduq pyeuf-eu mae.

²⁴ Khoermirnae, Kalizaq armur, Kali-euq uqmov jawr-eu lof-aer, miqzaq deuq khawf, yawqjeq navluf-euq lafkhoer, yawqha-euq khaqdzerzaq-euq lafov yajawr-eu mae.

²⁵ Khaqdzerzaq deuq-or! Kali, Kalizaq armur-anr gaq-awr, aqyawf-euq mawrdo bifnaeq-euq lof-aer, yawqha-euq miqzaq-anr gaq-awq.

²⁶ Kali, Kalizaq armur-anr lavshawr-awr tsiqshawr-eu laer, ircuf nae tsiqshawr-eu lof-aer Yaerdawq-anr ghoe-awr nae lavshawr-eu mae.

²⁷ Khoer-aq, marbyawf maqbaw-aer, aerkhar maqza-eu uqtaf, shawrjaevni ghae-awr, yawshaef khanqsaer byan-eu Kalizaq armur bi pyeuflar-awr, aqyawf-anr bi a’naeq-eu gharduq mae.

²⁸ Khoerlof-aer durni, khaqdzerzaq deuq khawf, yawqha-euq mawrdo-anr gaq-eu lof-aer, yawqha-euq miqzaq-anr gaq-eu tsaq mae. Yawqha-euq miqzaq-anr gaq nar-aq, yawqhar yawqha gaq-eu mae.

²⁹ Tsawrhaq tiqghaq-iq yawqha-euq mawrdo-anr maqbyae-eu uqtaf, yawmuiq-aer bidzaq bidawr-awr ngaeqghae-eu mae. Sanqpaq Yeqsur khawf, khoerlof-aer durni, Kalizaq armur-anr bosav-eu mae.

³⁰ Aqjeq mirnae aernar-aq, aqdui-aq, aqyawf-euq mawrdo-euq arsaer pyeuf-awr, aqyawf-euq shiqshaq hawr-eu aqyawf-euq shaqyoeq deuq ma.

³¹ “Khoermirnae, khaqdzerzaq-aq, yawqha-euq aqma aqda-anr nae ghawq-ir-awr, yawqha-euq miqzaq naeq-aer gawf-ir-eu lafkhoer, nyiq ghaq khawf tiq ghaq taef-aer pyeuflar-eu mae.” (Adb 2:24)

³² Heu-aq, zaftaq-euq huiq duidui-eu tiqjeq pyeuf-eu mae. Aerkhawf, ngar-aq, Kali hawr-eu Kalizaq armur-anr taf-eu garkawv aermawf-eu ma.

³³ Khoerlof-aer law khawf, nawmaf yawqghaq navluf yawqha-euq mawrdo-anr gaq-eu lof-aer, yawqha-euq miqzaq-anr gaq-awq. Miqzaq deuq khawf, yawqha-euq khaqdzerzaq-anr yawzeu baw-eu tsaq mae.