Eˇpeˇsu 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaftaq-euq Jeq Panmaeq-eu

¹ Ngar-aq, aqcawq tsawrjeuq tsawrca pyeuf-eu nawmaf-euq gharduq, Yeqsur Kali-euq baqda’nae, kuv-anr bi nyaefur taq-euq Pawrluv ma.

² Miqyaer-euq guiqlanq yawdzanr baqda’nae, nawmaf-euq gharduq gar mrni, ngaq-anr khaerdar taq-euq mae laer nawmaf yagaq-euq mae.

³ Miqyaer, aqyawf nae zaftaq-euq jeq ngaq-anr aqjox-aer panmaeq naeqlaf-awr bi siqnya naeqlaf-euq garkawv, dzeurlaf ngae, ngar, nawmaf-anr sanqbof yawnymr nymr-aer bofanr lef-euq lof-aer ma.

⁴ Nawmaf gui-euq nar-aq, ngar, Kali-anr taf-eu zaftaq-euq jeq-anr ngaq-euq siqnya-eu tsawrganr garkawv, nawmaf ghovshaw nyalar taef-a.

⁵ Dzeurlaf-euq zir-anr zaftaq-euq jeq khoer, tsawrhaqzaq-anr maqbi siqnya-aq. Aerkhawf, nymq-mr-aq, muiq-eu Saflar-anr ghoe-awr, aqyawf-euq shawr-eu ghaqkhaer deuq hawr-eu, aqyawf-euq gharduq ngaeqdan-eu deuq-anr panmaeq naeq-euq mae.

⁶ Zaftaq-euq khoer-aq heulof-aer mae: guiqlanqdawq baqda’nae aqcawq tsawrjeuq tsawrca khawf, Kali-euq lafkhoer Yurdav tsawrhaq naeq-aer tiqkawv lof-aer jeqbir of-awr, mawrdo tiq do taef-aer pyeuflar-euq uqtaf, aqyawf-euq sarjax-anr khawf tiqkawv lof-aer za-euq mae.

Zaftaq-euq Jeq-euq Arpyar

⁷ Miqyaer-euq baoq gar mr-eu lafkhoer, Miqyaer, ngaq-anr lafsawq lof-aer, aqyawf-euq guiqlanq yawdzanr bifnaeq laf-euq mirnae, ngar kuirlaf zaqkhav geuflar-euq ma.

⁸ Kali-euq lafkhoer anr-eu, maq povmawr jircoerni sanr-eu guiqlanq deuq, aqcawq tsawrjeuq tsawrca-anr dawqmaeq bimaeq-ir-eu gharduq, tsawrshawr dawqtawv luf-anr nae teqdzaeq dzaeq-eu ghaq pyeuf-eu ngaq-anr, guiqlanq yawdzanr khoer bifnaeq laf-euq mae.

⁹ Khoeruqtaf, Yeqsur Kali-anr ghoe-awr dawqtawv luf-anr bae-euq Miqyaer-euq lafkhoer, ardanqbae ngae nae daeqkaq taq-euq jeq-anr taf-eu zaftaq-euq jeq-euq lafkhoer, cawq cawqtaf-eu jeq aqjox-aer ghae-eu nga laer, tsawrhaq dawqtawv luf-anr bimawrni khawf bi mrnaeq laf-euq mae.

¹⁰ Khoer-aq, nymq-mr Kalizaq armur-anr ghoe-awr, Miqyaer-euq zaqsiq tsawrganr ghawqmya jeq, mq-euq khoertav-euq mqsanr deuq hawr-eu mq-euq khoertav-euq aryaq jav-eu deuq-anr bisiq-eu laer laeqhmq taq-euq mae.

¹¹ Miqyaer nae mqmaq maqbyav yarzir noeqtsaev taq-euq lof-aer, aqdui-euq Sanqpaq Yeqsur Kali-euq lafkhoer bi byanlar-euq mae.

¹² Aqdui, Yeqsur-euq lafkhoer nuima khaqduqni taq-awr, aqyawf-anr jan-awr yawduq baw-eu mirnae, Miqyaer-euq maeqshi urler nya-eu ma.

¹³ Khoermirnae, ngar, nawmaf-euq gharduq shaq-awr zanq-eu jeq ya daqluf-eu baqda’nae, nuighaq taqbaq laer ngar, nawmaf-anr shar-eu ma. Heu-aq, nawmaf-euq gharduq yawshaef khanqsaer pyeuf-eu mae.

Kali-euq Gaq-eu Jeq

¹⁴ Garkawv heudeuq-euq baqda’nae, ngar, aqdui-euq Sanqpaq Yeqsur Kali-euq Aqda Miqyaer-euq maeqshi, pawqtsuif pawqdmq dmq-awr guiqlanq sharluf-eu ma.

¹⁵ Mq hawr-eu mirtsaq-euq khoertav jawr-eu arjeuq arca dawqtawv luf-euq tsawrmyanr-aq, aqyawf nae biftaq-euq taef mae.

¹⁶ Ngar guiqlanq heulof-aer shar-eu ma: Miqyaer-euq yawshaef khanqsaer sanr duidui-eu gar geuxni, aqyawf-euq Saflar-anr ghoe-awr, nawmaf-euq nuima, ghaq bi anrlar-awr ghaq bi khavlar law.

¹⁷ Nawmaf jan-eu mirnae, Kali, nawmaf-euq nuima-euq lafkhoer jawrle-eu uqtaf, nawmaf gaq-eu jeq-euq lafkhoer, duqcir ka’naf ghae-awr, dawqpaeq bi ziflar law.

¹⁸ Nawmaf, tsawrshawr dawqtawvluf naeq-aer, Kali-euq gaq-eu jeq, arnavni jer-awr arnavni manr-eu, arnavni naf-awr, arnavni gor-eu nga laer bi ghovshaw nyalar law.

¹⁹ Khoeruqtaf, tsawrhaqzaq-euq siqnya-eu tsawrganr taf-aer dzaeq-eu, Kali-euq gaq-eu jeq-anr nawmaf siqnya lar-awr, Miqyaer-euq lafkhoer byan-eu yawqjeq navluf, nawmaf-euq lafkhoer bi byanlar law.

²⁰ Aqdui-euq lafkhoer gar mrluf-eu aqyawf-euq baoq-anr ghoe-awr, aqdui sharnoeq-awr tanqshar nya-eu navmaqtser, ardzaeq paw-aer tiqbyan tiqlof mrpyeuf nya-eu Miqyaer-anr taqhuiq taqmanr kar-eur.

²¹ Yeqsur Kali-anr ghoe-awr, Kalizaq armur-euq lafkhoer tiqzir sair tiqzir, li-eu maqbawni Miqyaer-euq yawshaef khanqsaer huiq luf-ur. Aqmeq.