Eˇpeˇsu 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq Yawdzanr Baqda’nae

¹ Dzeurlaf ngae, nawmaf yawbanq yawlaeq hawr-eu iqbax-euq lafkhoer shir-euq khawf, aqyawf, nawmaf-anr bi ghofdaef lar-euq mae.

² Khoerngae, nawmaf-aq, mirtsaq heu-anr taf-eu canjeq cankawv-euq lafkhoer daef-awr, mq-anr aryaq jav-eu mqsanr-euq maeqnan can-euq mae. Nymq-mr uvlanr-eu saflar heu, maq narhaq geuf-eu tsawrhaq-euq lafkhoer gar mrluf-eu mae.

³ Khoerngae, aqdui khawf aqyawf maf-euq lafkhoer keuq-awr, shiqshaq-euq nuikhanr tiqshir mr-awr, nuinoeq hawr-eu shiqshaq khar lovlar-eu jeq mr-euq ma. Aqdui khawf aqcawq kharpyeuf-eu jeq pyeuf-awr, nuima paer-eu jeq-euq zaq pyeufyaf-euq ma.

⁴ Aerkhawf, ghawqshaq gaq-eu jeq sanr-eu Miqyaer-aq, aqyawf-euq huiq duidui-eu gaq-eu jeq nae aqdui-anr gaqnaeq laf-awr,

⁵ aqdui mrbanq lavbanq-euq lafkhoer shirdzeur-euq khawf, aqyawf, aqdui-anr Kali naeq-aer yawdaef bi daeflar naeqlaf-euq mae. Guiqlanq yawdzanr baqda’nae, nawmaf kakhof-eu jeq za-euq mae.

⁶ Miqyaer, aqdui-anr Kali naeq-aer tiqkawv lof-aer bi ghofdaef lar-awr, Yeqsur Kali-euq lafkhoer, mq-euq khoertav aqyawf naeq-aer tiqkawv lof-aer binuir naeqlaf-euq mae.

⁷ Yeqsur Kali-euq lafkhoer, aqyawf, aqdui-anr ghawqshaq gaqnaeq laf-awr, aqyawf-euq guiqlanq yawdzanr arnavni sanr-eu nga laer, aqkar keuvle-eu zir-anr bisiq bimawr-eu laer, Miqyaer khoerlof-aer janrnaeq laf-euq mae.

⁸ Nawmaf jan-eu lafkhoer, guiqlanq yawdzanr baqda’nae kakhof-eu jeq za-euq mae. Yawqha-euq baqda’nae maqngeur-aer, Miqyaer nae bifnaeq-euq lafsawq pyeuf-eu mae.

⁹ Mr-awr shar-euq baqda’nae za-euq maqngeur-eu mirnae, tsawrhaq tiqghaq-iq khanqsaer jaevkhar maqza-a.

¹⁰ Aqdui-aq, Miqyaer-euq lafzar ma. Yawbae ngae nae aqdui-anr bimr-eu laer laeqhmq taq-euq yawmuiq jeq-anr, aqdui mrmr-aer daefni, Yeqsur Kali-euq lafkhoer aqdui-anr bae naeqlaf-euq mae.

Dawqpae Sheuqpae Laf-euq

¹¹ Khoermirnae, nawmaf taqngaer de-eq. Dzeurlaf ngae, nawmaf-aq, shiqshaq paw aqcawq tsawrjeuq tsawrca pyeuf-awr, bawkhov maeqdzaq maqyaeq-euq tsawrhaq laer bikur-euq mae. Bawkhov maeqdzaq yaeq-eu khoer-aq, aqlaf nae shiqshaq paw yaeq-eu taef mae.

¹² Khoerngae, nawmaf, Kali-anr maq siqnya-aer, Irsaqleqlav tsawrhaq-anr maqtaf-eu tsawrhaq pyeuf-euq uqtaf, dawqma sarjax-anr maqsiq maqsux-eu tsawrhaq pyeuf-euq mirnae, nawmaf noeqtmqkhar maqza-aer, mirtsaq-euq khoertav Miqyaer-anr maq siqnya’ni daef-euq mae.

¹³ Dzeurlaf ngae, nawmaf garmanr kaq-eu gar jawr-euq khawf, nymq-mr-aq, Yeqsur Kali-euq lafkhoer, Kali-euq shiq-anr ghoe-awr nae dawqpae sheuqpae laf-euq mae.

¹⁴ Aqjeq mirnae aernar-aq, Kali, aqdui-euq tsaqler dzoerler-eu jeq pyeuf-eu lafkhoer, aqdui, tsawrjeuq nyiq jeuq pyeuf-euq khawf, tiq jeuq taef-aer bi pyeuflar-awr, yawkaq-anr tawpav taq-euq karpyawr-anr pyavdzae-euq mae.

¹⁵ Aqyawf-euq lafkhoer, tsawrhaq nyiq ghaq pyeuf-eu khawf, tsawrshuif tiq ghaq taef-aer bi pyeuflar-awr, bitsaq bi dzoerler-eu laer, zanrdawq-euq lafkhoer anr-eu zanrdawq khofdawq-euq zanrtaq khoftaq-anr taf-eu, tiqghaq tirghaq muir-eu jeq-anr, aqyawf-euq shiqshaq nae lavbyov-euq mae.

¹⁶ Kali, lafyaq-anr ghoe-awr, tsawrjeuq nyiq jeuqluf Miqyaer naeq-aer bitsaq bi dzoerler-euq lafkhoer, mawrdo tiq do taef-aer bi pyeuflarni, tiqjeuq tirjeuq muir-eu jeq-anr lavbyov-euq mae.

¹⁷ Kali oe-awr, garmanr kaq-eu gar jawr-eu nawmaf-anr hawr-eu dawqpae jawr-eu deuq-anr khawf, tsaqler dzoerler-eu jeq dawqmaeq maeqle-euq mae.

¹⁸ Aqjeq mirnae aernar-aq, Kali-euq baqda’nae aqdui tsawrjeuq nyiq jeuqluf, muiq-eu Saflar, aqyawf tiqghaq-anr ghoe-awr, Aqda jawr-eu gar urlernya lar-euq ma.

¹⁹ Khoermirnae, nawmaf-aq, yawqkhanq yawqmir yawq-euq tsawrhaq hawr-eu, maqsiq maqsux-eu tsawrhaq maqpar ngeur mae. Tsawrshawr deuq naeq-aer mirkhanq tiq khanq-euq tsawrhaq hawr-eu, Miqyaer-euq nymrkhanq-euq zaq pyeuflar-euq mae.

²⁰ Nawmaf-aq, ghaqkhaer deuq hawr-eu Miqyaer gharduq ngaeqdan-eu deuq nae dawqpaeq baetaq-euq gar tsovtsaf davlef-euq nymr mae. Yeqsur Kali-aq, lafcoer-euq lozif pyeuf-eu mae.

²¹ Aqyawf-anr ghoe-awr nymr nymrlanni tiqgar gheutsaftsaq taq-awr, Sanqpaq Miqyaer-euq lafkhoer, shawr-eu uqduq tanqnymr nymrma pyeuflarni huiqlar luf-eu mae.

²² Aqyawf, nawmaf-anr khawf, Miqyaer-euq jawrduq pyeuflarni, muiq-eu Saflar-anr ghoeghoe-aer, aqyawf-euq lafkhoer tsovanr luf-eu mae.