Dawqdaq 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaqsiq Tsawrganr-euq Garma

¹ Zaqsiq tsawrganr, aqyawf-euq nymr tsov-euq mae. Aqyawf, aqyawf-euq khawrzeur shif zeur pyaf-euq mae.

² Aqyawf, aqyawf-euq jeqzaq saef-awr, Aqyawf-euq aqgaf dzaruir keuq-euq uqtaf, Aqyawf-euq hawqje shardanr taq-euq mae.

³ Aqyawf, aqyawf-euq aqbur zaqkhav deuq khaerdov ghae-awr, Meuq-euq lafkhoer gordzaeq dzaeq-eu jawrduq-anr nae aqyawf gur-eu,

⁴ “Maqdzaw-euq zaq aqgeu ghaq maqkaq, Heupaw bi ciqpyawr laf-awq!” Ghovshaw nya-eu jeq maqanr-eu tsawrhaq-anr aqyawf aer-eu,

⁵ “Lar-awq, ngaq-euq kaqmur dzaqlar-awr, Ngaq nae keuqtaq-euq aqgaf dzaruir dawrlar-awq.

⁶ Yawdzawq yawgan jeq byaerdzae-awr, yawdaef daef-awq. Ghovshaw-eu garma-anr can’ghae-awq.”

⁷ Aqjaf jaf-eu tsawrhaq-anr dzawpar-eu ghaq-aq, daq yaga-awr, Tsawrcawv-anr maeqpar-eu ghaq-aq, marbyawf yadaq-eu mae.

⁸ Aqjaf jaf-eu tsawrhaq-anr maeqpar-eu laer taqghae. Khoerlof-aer janr nar-aq, aqyawf, nawq-anr byae taef-a. Tsawrganr anr-eu tsawrhaq-anr dzawpar naeq-awq. Khoerlof-aer janr nar-aq, aqyawf, nawq-anr gaq taef-a.

⁹ Tsawrganr anr-eu tsawrhaq-anr maeqdawq tsovdawq bif nar-aq, Tsawrganr par anrdzaeq lar-eu mae. Tsaq-awr dawr-eu tsawrhaq-anr maeqnaeq nar-aq, Par siqnya dzaeqlar-eu mae.

¹⁰ Ya’we Miqyaer-anr guv-eu jeq-aq, Zaqsiq tsawrganr-euq ardanq baeduq mae. Yawshawr ghaq-anr siqnya-eu tsawrganr anr-eu-aq, Ghovshaw nya-eu jeq pyeuf-eu mae.

¹¹ Zaqsiq tsawrganr-euq baqda’nae nawq-euq arnan myaqdzaeq lar-awr, Nawq-euq daefzir-euq arkhof manrdzaeqlar taef-a.

¹² Nawr, tsawrganr anr nar-aq, Yawqha-euq gharduq ganr-eu mae. Nawr aqjafjaf nar-aq, yawqha taef-aer yadaq taef-a.

Maqdzaw-euq Zaq-euq Garma

¹³ Aqbyanq byanq-eu zaqmiq aqbur-aq, dawqja myaq-awr, Tiqjeq-iq maq siqnya-eu maqdzaw-euq zaqmiq aqbur pyeuf-eu mae.

¹⁴ Aqyawf, aqyawf-euq nymr-euq ghovkhaeq-anr nuir-awr, Meuq-euq lafkhoer gordzaeq dzaeq-eu nuirduq-anr nuir-awr nae,

¹⁵ Yawqha-euq garma-anr yawqha can-awr, Irtsaev lartsaev luf-eu tsawrhaq deuq-anr kur-eu,

¹⁶ “Maqdzaw-euq zaq aqgeu ghaq maqkaq, Heupaw bi ciqpyawr laf-awq!” Ghovshaw nya-eu jeq maqanr-eu tsawrhaq-anr, aqyawf aer-eu,

¹⁷ “Khoeqdawr-euq ircuf-aq, yawcoer mae. Yawzaf-anr dzaqkhoeq-euq kaqmur-aq, yawkuir mae.”

¹⁸ Aerkhawf, aqyawf, khoergar-aq, shir-euq tsawrhaq taef-aer jawr-awr, Zaqmiq aqbur heughaq-euq daqyan-aq, Naf-eu shiqbuir lanma-euq lafkhoer jawrluf-a laer maq siqnya-a.