Dawqdaq 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Zaqsiq Tsawrganr-euq Yawmuiq

¹ Zaqsiq tsawrganr kurluf-eu maqngeur-a lor? Ghovshaw nya-eu jeq tersar lavkhav-awr ngaeqluf-eu maqngeur-a laq?

² Zaqsiq tsawrganr, garma gartsmr-euq gardzer jav-eu, Gawqjawq-euq uqdu yawfluf-eu mae.

³ Zaqsiq tsawrganr, meuq-euq maeqshi jav-eu meuq-euq lanrkhaeq, Hawr-eu urler-eu larghov-euq dawqpae gurluf-eu mae.

⁴ Aqyawf aer-eu: “Tsawrhaqzaq-or! Ngar, nawmaf-anr kurluf ma. Ngaq-euq tersar lavkhav-awr tsawrhaq-euq zaqdeuq-anr kurluf-eu ma.

⁵ Maqdzaw-euq zaqdeuq-or! Noeqdanr doenya lar-awq. Aqdzawq argan deuq-or! Nuima ghovshawnya lar-awq.

⁶ Narhaq sher-eq! Aqjeq mirnae aernar-aq, Ngar poeq duidui-eu jeq ngaeq-eu laer ghae-awr, Ngaq-euq maeqluq ghawrnga ngae, Dawrcoeni ghae-eu jeq dovle taef-a.

⁷ Ngaq-euq khaqmae yawtsaq yawdawr jeq ngaeq-awr, Ngaq-euq maeqluq-aq, yawcawv jeq-anr nuidav dav-eu ma.

⁸ Ngaq-euq khaqmae-anr nae dovle-euq dawq dawqtawvluf, Tsaq-awr dawr-eu dawq pyeuf-awr, Dawq khoerdeuq-euq lafkhoer, Yawngof jeq hawr-eu yurpyawv-eu jeq tiqjeq-iq maqanr.

⁹ Dawq heudeuq-aq, ghovshaw nya-eu deuq-euq gharduq dawrler-awr, Siqnya-eu tsawrganr povmawr-euq deuq-euq gharduq-aq tsaq-eu mae.

¹⁰ Pyur-anr navmaqtser, ngaq-euq maeqdawq tsovdawq-anr hageuf-awr, Muiq-eu shuir-anr navmaqtser, siqnya-eu tsawrganr-anr hageuf-awq.

¹¹ Aqjeq mirnae aernar-aq, Zaqsiq tsawrganr-aq, nertseuvni ghae-eu khaqlo saer navmaqtser muiq-awr, Nawr geufmawf-eu yawqjeq navluf sawxgawf khawf, Zaqsiq tsawrganr-anr ciqcaevnyaf maqnyeuv-a.

¹² “Ngar-aq, zaqsiq tsawrganr ma. Ngar noeqdanr doe-eu jeq naeq-aer jawr-awr, Siqnya-eu tsawrganr hawr-eu noeqsiq noeqmawr nya-eu jeq povmawr-euq ma.

¹³ Ya’we Miqyaer-anr guv-eu jeq-aq, yawdoer jeq-anr byae-eu mae. Nuima huiq-eu, janrghae-eu, yawdoer-euq garma hawr-eu, Dawq yurpyawv-eu khaqmae-anr ngar byae-eu ma.

¹⁴ Ngar maeqbawq hawr-eu muiq-eu zaqsiq tsawrganr jav-awr, Ngar-aq, ghovshaw nya-eu jeq pyeuf-awr ghaq anr-eu ma.

¹⁵ Ngaq-anr ghoe-awr sanqpaq deuq dzoeqdzaq mr-awr, Uvlanr-eu deuq tsaq-awr dawr-eu dawqtsaev bi dovlar-eu mae.

¹⁶ Ngaq-anr ghoe-awr zawr tsaq-eu yarkhaq dar-eu tsawrhaq dawqtawvluf, Dzoeqda deuq hawr-eu tsawrhuiq tsawrma deuq uvlanr-eu mae.

¹⁷ Ngaq-anr gaq-eu tsawrhaq-anr ngar gaq-awr, Laejae-awr ngaq-anr pov-eu deuq, Ngaq-anr povmawr taef-a.

¹⁸ Smrmuiq muiq-eu jeq hawr-eu taqhuiq taqmanr-eu jeq, ngaq naeq-aer jav-awr, Zif-awr gmq-eu smrmuiq muiq-eu jeq hawr-eu tsaq-awr dawr-eu jeq khawf, ngaq naeq-aer jav-eu mae.

¹⁹ Ngaq-euq arsiq-aq, shuir navmaqtser muiq-awr, Muiq-eu shuir navmaqtser muiq-eu uqtaf, Poeq-eu pyur navmaqtser jirjeuq baw-eu mae.

²⁰ Ngar-aq, tsaq-awr dawr-eu garma-anr can-awr, Dawr-awr tsaq-eu cankawv-euq ghanrcae can-eu ma.

²¹ Ngar, ngaq-anr gaq-eu deuq-anr smrmuiq muiq-eu jeqbir biof-awr, Ngar, aqyawf maf-euq myawqganq taqduq bi byanlar ma.

²² “Aqyawf-euq garma ardanq baelar ngae, Arhu, aqyawf gar maqmr-euq minav-aer, Ya’we Miqyaer, ngaq-anr za-euq mae.

²³ Ardanqbae ngae, mirtsaq tanqkhawr maq javlar-euq minav-aer, Mqmaq maqbyav yarzir-anr nae, ngaq-anr bi dovlar-euq mae.

²⁴ Naf-eu iqmalavshav maq javlar-euq minav-aer, Ircuf ghawqmya’ni dov-eu cuq maq javlar-euq minav-aer, Ngaq-anr bi daefle naeqlaf-euq mae.

²⁵ Gawqjawq hawr-eu gawqdur maq javlar-euq minav-aer, Ngaq-anr bi daefle naeqlaf-euq mae.

²⁶ Miqyaer, mirtsaq hawr-eu daega-anr maqbae-euq minav-aer, Mirtsaq khaqlaer maq javle-euq minav-aer, Ngaq-anr bi daefle naeqlaf-euq mae.

²⁷ Miqyaer, mq bi javlar ngae, ngar khoergar jawr-awr, Naf-eu iqmalavshav-euq khoertav kawvjawq ngae, ngar jawr-euq ma.

²⁸ Miqyaer, mq-anr mqdmr bi javlar-awr, Naf-eu iqmalavshav-euq irbyoe lavzif ngae, ngar jawr-euq ma.

²⁹ Miqyaer nae biftaq-euq dawq-anr ircuf maqbi khandzeur-eu gharduq, Iqmalavshav-anr mirkaq lavbaw naeq-awr, Mirtsaq tanqkhawr-euq dawqpaeq lavbaw ngae, ngar jawr-euq ma.

³⁰ Khoerngae, lafmyawq lafmuv mr-eu yawsanr tiq ghaq lof-aer, Ngar, Miqyaer-euq dawqpae jawr-awr, Nan-anr nae ngar-aq, aqyawf-euq laqkhaq caer-eu jeq pyeuf-eu uqtaf, Ngar, aqyawf-euq maeqshi aqmyanluf laqkhaq caer-euq ma.

³¹ Jawrduq pyeuf-eu aqyawf-euq mirtsaq tanqkhawr-anr laqkhaq caer-awr, Tsawrhaq-euq zaqdeuq-aq, ngaq-euq nuikhanr shirduq pyeuf-eu ma.

³² “Khoermirnae, ngaq-euq zaqdeuq-or! Nymq-mr, ngaq-anr narhaq-awq. Aqjeq mirnae aernar-aq, Ngaq-euq garma-anr can-eu tsawrhaq-aq, guiqlanqhuiq taef-a.

³³ Maeqdawq tsovdawq-anr maq hawdzeurni, Narhaq-awr tsawrganr anrlar-awq.

³⁴ Ngaq-anr narhaq-eu laer nan-anr nae, ngaq-euq ghovkhaeq-anr haw-awr, Ngaq-euq larghov baq-anr lof-eu tsawrhaq-aq, guiqlanqhuiq taef-a.

³⁵ Aqjeq mirnae aernar-aq, Ngaq-anr povmawr-euq tsawrhaq-aq, daef-eu jeq povmawr-awr, Ya’we Miqyaer nuima tsaq-eu jeq za-euq mae.

³⁶ Aerkhawf, ngaq-anr iqbax mr-eu tsawrhaq-aq, Yawqha-euq nuima saflar-anr yawqha mrbanq-euq mae. Ngaq-anr kharbyae-eu tsawrhaq-aq, shir-eu jeq-anr gaq-eu mae.”