Dawqdaq 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Maqmuiq-eu Zaqmiq Aqbur-anr Yanr

¹ Ngaq-euq zaqyo-or! Ngaq-euq dawqdeuq jeqhmq-awr, Ngaq-euq khaerdawq, nawq-euq lafkhoer juiruiq taq-awq.

² Ngaq-euq khaerdawq-anr mrcaw-awr yawdaef daef-awq. Nawq-euq myavnuiv myavsiq-anr lavsav-eu lof-aer, Ngaq-euq zanrdawq-anr lavsav-awq.

³ Dawq khoerdeuq, nawq-euq lafnoer-anr paftawf taq-awr, Nawq-euq nuima-euq terbyaf-anr bofmyanq taq-awq.

⁴ Zaqsiq tsawrganr-anr, “Nawr-aq, ngaq-euq dmrma ma” laer aernaeq-awr, Ghovshaw nya-eu jeq-anr paedzaeq dzaeq-eu aqyuif aqnyir laer kur-awq.

⁵ Khorlof-aer janr nar-aq, banq-awr joe-eu zaqmiq aqbur-anr nae, Nawq-anr hawpir naeqlaf-awr, Aqyawf-euq dawqja nya-eu jeq hawr-eu, Murjur jurlar-eu jeq-anr nae bidzeur-ir naeqlaf taef-a.

⁶ Ngar, ngaq-euq nymr-euq lafkhoer larghovzaq-anr jawr-awr, Larghovzaq-euq kater-anr nae, ngar hawghae ngae,

⁷ Maqdzaw-euq zaqdeuq-euq ghanrcae hawghae-awr, Zaqguq baqmaf-euq ghanrcae haw ngae, Ngar, ghovshaw nya-eu jeq maqanr-eu zaqguq tiq ghaq-anr ya’mawr-euq ma.

⁸ Aqyawf, zaqmiq aqbur khoerghaq-euq nymr-euq lafcoer dawqpae jav-eu laevkawv cawcaw-aer cantsaev ghae-awr, Aqyawf, zaqmiq aqbur khoerghaq-euq nymr-anr ir-eu garma-anr can-eu mae.

⁹ Khoerngae-aq, uqcif uqtaw tawle-awr, zanrmoq zanrshaeq shaeqle ngae, Mq cifle-awr, zanrtsuini ghae-eu ngae mir mae.

¹⁰ Hawsher-eq, zaqmiq aqbur tiq ghaq, aqyawf-anr dzoerle-euq mae. Zaqmiq aqbur khoerghaq mawrdo anq-eu maeqtsoeq dm-awr, Jaqmyawf maershuir-euq nuima piluf-eu mae.

¹¹ Aqyawf tersar khav-awr, narkhawr ghanr-eu uqtaf, Aqyawf-euq aqkuir, irkanr-anr jawrnaq maq mrnya-a.

¹² Tiqpov nav-aq, aqyawf povka-anr jawr-awr, Tiqpov nav-aq, laevkawv-anr jawr-eu uqtaf, Lafcoer kharngeur-eu gar lofluf-eu mae.

¹³ Aqyawf, zaqguq khoerghaq-anr gheutaeq-awr maeqsaw saw-awr, Myavpyawq turdzawqni shafdawr maqbaw-aer, Aqyawf-anr heulof-aer aernaeq-eu mae:

¹⁴ “Ngar, tsaqler dzoerler-eu lawr-eu jeq jav-eu ma. Iqnan, ngar, ngaq nae kamq-euq jeq mrbyan-euq ma.

¹⁵ Khoermirnae, ngar oedov-awr nawq-anr dzoerle-euq ma. Ngar, nawq-euq myavpyawq-anr yawkhav-aer sharpov-euq lof-aer, Ngar, nawq-anr povmawr-euq ma.

¹⁶ Ngaq-euq yufzar-aq, doeq kuf-awr aryaev tsovtaq-euq khawqdaq-anr khawqdav-eu saqpar khawqtaq-euq ma. Irjirtuv-euq sheqsha saqpar khawqtaq-euq ma.

¹⁷ Ngar, ngaq-euq yufzar-anr murlaq, Aqloq hawr-eu siqnaqmoq nae lavsaw taq-euq ma.

¹⁸ Oe-awq, arnyaf gaq-eu jeq byan-eu khoer, Uqbya byalar ngae keuvni dawr-awr, Gaq-eu jeq nae arnyaf, yawqhar yawqha laqkhaq lavcaer kar-eur.

¹⁹ Aqjeq mirnae aernar-aq, ngaq-euq khaqdzerzaq, irkanr maqjawr-a, Aqyawf ghawqmanr kaq-eu gar garma dov-ir-euq mae.

²⁰ Aqyawf, pyur pawqbaev pi-awr dov-ir-euq mae. Toftaq-euq arnan-anr maqngeur nar-aq, aqyawf irkanr maq ghoflar-a.”

²¹ Zaqmiq aqbur khoerghaq tawvler paq-aer ghae-eu dawq nae, Zaqguq khoerghaq-anr jatawv-awr, Aqyawf-euq dawqja nya-eu maeqluq nae khoerghaq-anr cawq-euq mae.

²² Tiqpov taef-aer, aqyawf, zaqmiq aqbur khoerghaq-euq maeqnan cantae ghae-euq mae. Khoer-aq, aqdzawq argan tiq ghaq shmrcav daq-awr bimaeq bitsov-ir-eu gar dur-awr, Mawrner mawrgaw, jeqzaq saefduq-anr irluf-eu gar dur-eu mae.

²³ Aqyawf-euq shaqtsanq-anr kavmyaq nae, maqbi beuvbyoe-euq khoerkeuvni, Saeqtov-anr pafler-eu laer taeq-eu arjir lof-aer, aqyawf ir-euq mae. Khoerlof-aer janr-eu-aq, aqyawf, yawqha-euq daefzir yasmq-a laer maq siqnya-a.

²⁴ Khoermirnae, ngaq-euq zaqdeuq-or! Ngaq-anr narhaq sher-eq. Ngaq-euq khaqmae-anr nae dovle-euq dawq-anr yawmuiq-aer narhaq-awq.

²⁵ Nawq-euq nuima, aqyawf-euq garma-anr taq ciqpyawr ghae. Aqyawf-euq cankawv-anr taq canbanq ghae.

²⁶ Aqjeq mirnae aernar-aq, Aqyawf nae lavnar-euq tsawrhaq ghawqmya ghaq-anr bicoq-ir-awr, Aqyawf nae saef-euq deuq-aq, ghaq khav-eu zaqyo aqli deuq taef mae.

²⁷ Aqyawf-euq nymr-aq, shiqbuir lanma-anr ir-eu garma pyeuf-awr, Shir-euq deuq-euq jawrduq-anr sheuqka-iq-eu garma mae.