Dawqdaq 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Nan-anr Nae Yawdaef Daef-eu

¹ Ngaq-euq zaqyo-or! Nawq-euq cawq-euq gharduq kamq-awr, Nawr lafma daeq-awr maqsiq maqsux-eu tsawrhaq naeq-aer sarjax dzaq nar-aq,

² Nawq-euq khaqmae-euq dawq, nawq-anr lanrju khmrlar-awr, Nawq-euq khaqmae-euq dawq, nawq-anr paflar taef-a.

³ Nawr, nawq-euq cawq-euq aqlaf-anr anrler dzeur-euq nar-aq, Ngaq-euq zaqyo-or! Nymq-mr heulof-aer janr-awr yawqhar yawqha bibuq-ir-awq; Le-awr, yawqhar yawqha taqnyir-awr, nawq-euq cawq-anr yawkhav-aer tanqshar ler-awq.

⁴ Nawq-euq myavnuiv-anr taqbi yufkhav, Nawq-euq myavnuiv myavkhov-anr yufyoer taqbi ngeur.

⁵ Cirhaq, shaqtae tae-eu tsawrhaq-euq aqlaf-anr nae yadzeur-ir ni laejae-awr, Arjir, shaq beuv-eu tsawrhaq-euq aqlaf-anr nae yadzeur-ir ni laejae-eu lof-aer, Nawr khawf, yawqha yabuq-ir ni khoerlof-aer janr-awq.

⁶ Yawdoer doer-eu tsawrhaq-or! Arho jawr-eu gar ir-awr, Arho-euq garma-euq garkawv sharnoeq sharsawx-awr tsawrganr anrlar-awq.

⁷ Aqyawfmaf, dzoeqda maqjawr-aer, Aqyuif aqtsu geuf-awr, uvlanr-eu ghaq khawf maqjawr-a.

⁸ Aerkhawf, jawrla yamq-anr, aqyawfmaf dzaqdzaq dawrdawr laeqhmq taq-awr, Sanqlanq ghawqdar yuruiq-eu yamq-anr, aqyawf-euq dzar povuiq taq-eu siqnya-eu mae.

⁹ Yawdoer doer-eu tsawrhaq-or! Nawr aqmyan keuvni yuf-eu laer ghae-eu le? Yufkhav taq-euq gar nae nawr aqmyan turlar-eu laer ghae-eu le?

¹⁰ Tiqkhaeq yuf-awr, tiqkhaeq ngeur-eu uqtaf, tiqkhaeq lafpyaef pyaef-awr naq-eu mirnae,

¹¹ Irshaq shaq-eu jeq, nawr jawr-eu gar tanrjoe lof-aer oe-awr, Nawr mawf-eu jeq, nawr jawr-eu gar, guirdeuv keuka bafluf-eu tsawrhaq lof-aer oe taef-a.

¹² Gardanr maqtsoeq-eu tsawrhaq pyeuf-eu tsawrcawv-aq, Khaqmae, dawq yurpyawv yurpyawv-aer can-eu mae.

¹³ Aqyawf, myavnuiv khovtaev taev-awr, Aqkuir nae dzawr-eu uqtaf, aqyawf-euq lafnoer nae toeq-eu mae.

¹⁴ Aqyawf-euq nuima-euq lafkhoer yurpyawv-eu jeq anr-awr, Aqmyanluf bawqtov yawdoer tov-eu uqtaf, Pyaer-awr cae-eu jeq saeq-eu mae.

¹⁵ Khoermirnae, aqyawf-euq khoertav shaqzanq japyuqni keuvle-awr, Tiqpov taef-aer aqyawf maq lavsavtaq nya’ni, khaef-ir khoev-ir taef-a.

¹⁶ Ya’we Miqyaer byae-eu kof jeq jav-awr, Aqyawf nuidav dav-eu shif jeq jav-eu mae.

¹⁷ Janrghae-eu myavnuiv, jaqmyawf myawf-eu maeqlar, Hawr-eu tiqjeq-iq maqbanq-eu tsawrhaq-euq shiq lavdov-eu aqlaf,

¹⁸ Yawcawv bawqtov noeq-awr tov-eu nuima, Yawdoer jeq jav-eu gar, kawr-aer caevghae-eu aqkuir,

¹⁹ Jaqmyawf myawf-eu dawq ngaeq-eu maqtsaq maqdawr-eu tsawrkaq hawr-eu, Maernmr deuq-euq ghanrcae, maqtsaq maq dzoerler-eu jeq saeq-eu tsawrhaq.

Aqcawq-anr Taqbanq Taqjoe

²⁰ Ngaq-euq zaqyo-or! Nawqda-euq khaerdawq jeqhmq-awr, Nawqma-euq zanrdawq-anr taq byaerdzae.

²¹ Dawq khoerdeuq aqmyanluf, Nawq-euq nuima-anr paftawf-awr, Nawq-euq kawqlanr-anr dan-awq.

²² Nawr garma-anr can ngae, dawq khoerdeuq nawq-anr sheuqghae-awr, Nawr yufkhav ngae, nawq-anr lofpir-eu uqtaf, Nawr noeqlar ngae, nawq-anr ngaeqcawq naeqlaf taef-a.

²³ Aqjeq mirnae aernar-aq, zanrdawq khofdawq-aq, tsirkhmq pyeuf-awr, Zanrdawq-aq, yawshaef pyeuf-eu mae. Maeqpar naeqlaf-eu maeqdawq tsovdawq-aq, daef-eu jeq bif-eu garma mae.

²⁴ Dawq heudeuq-aq, maqmuiq-eu zaqmiq aqbur-anr nae hawpir naeq-awr, Dawqja nya-eu, banq-awr joe-eu zaqmiq aqbur-euq maeqlar-anr nae bikaq-ir-eu mae.

²⁵ Nawq-euq nuima-euq lafkhoer, aqyawf-euq arghaer muiq-eu jeq-anr nuikhanr taqjav. Aqyawf-euq myavnuiv khovtaev nae nawq-anr taqbi nyaefza.

²⁶ Mawrdo anq-eu zaqmiq aqbur tiq ghaq-euq baqda’nae, Zaqyo aqli tiq ghaq-anr kaqmur tiq siq-euq arpoeq taef-aer bi dzerlar nya-eu mae. Banq-awr joe-eu zaqmiq aqbur-aq, zaqyo aqli-euq poeq-eu nuima saflar-anr taedzaq-eu mae.

²⁷ Tsawrhaq tiq ghaq, yawqha-euq khanq-anr miqdzaq tsidav ngae, Aqyawf-euq maeqtsoeq maqbi puivdzaqni ghaenya taef-a laq?

²⁸ Tsawrhaq tiq ghaq nerhoqni dof-eu miqdzaq miqdziv-euq khoertav can ngae, Aqyawf-euq aqkuir-anr maqbi puivnarni janrnya mae lor?

²⁹ Yawqha-euq dawqpae jawr-eu tsawrhaq-euq miqzaq jawr-eu gar ir-eu tsawrhaq khawf, khoerlof-aer dur-eu mae. Aqyawf-anr khar toeqciv-eu tsawrhaq-aq, aerkhar maqza-eu tsawrhaq maqpar ngeur mae.

³⁰ Smrkhoeq tiq ghaq maef-eu mirnae, Aqyawf, ya dzaqdaevni khoeq-euq gar-aq, maq hawdoer-a.

³¹ Aerkhawf, smrkhoeq khoerghaq bi nyaefza ngae, Aqyawf shif myav byanni ya tsoeqkhof-eu mirnae, Aqyawf-euq nymrkhanq-euq lafkhoer kharjav-eu yawqjeq navluf khawf ya bifjir-eu mae.

³² Aqyawf naeq-aer banq-awr joe-eu aqsur ghaq maqkaq, ghovshaw nya-eu jeq maqanr-a, Khoerlof-aer mr-eu tsawrhaq-aq, Yawqha-euq nuima saflar-anr yawqha lavcawv-eu mae.

³³ Aqyawf, nargawr hawr-eu shafdawr-eu jeq za-awr, Aqyawf-euq daqga-eu jeq-anr maq sivdzae nya-a.

³⁴ Aqjeq mirnae aernar-aq, myavnav nav-eu jeq-aq, Khaqdzerzaq-euq nuipaer pyeuf-awr, Lafpov povkhof ngae nan, aqyawf maq taqnaeq laf-ar.

³⁵ Aqgeu jeq tsoeqkhofnaeq khawf, aqyawf maq hageuf-aer, Nawr lafsawq armyavni bifnaeq khawf, aqyawf-anr maq lavnaq nya-a.