Dawqdaq 5 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Maqbanq Maqjoeni Yanr-awq

¹ Ngaq-euq zaqyo-or! Ngaq-euq zaqsiq tsawrganr-anr yawmuiq-aer narhaq-awq. Nawq-euq naqbawr, ngaq-euq ghovshaw nya-eu jeq-anr ciqkhmr taq-awq.

² Khoerlof-aer janr nar-aq, nawr noeqdanr doe-eu jeq-anr hawlanr nya-awr, Nawq-euq maeqluq siqnya-eu tsawrganr juiruiqnya taef-a.

³ Aqjeq mirnae aernar-aq, maqtsaq maqdawr-eu lafkhoer, Banq-awr joe-eu zaqmiq aqbur-euq maeqluq-aq, Byaqyav-anr danq-eu byaquir lof-aer dzav-awr, Aqyawf-euq khaqmae-aq, tsir navmaqtser jur-eu mae.

⁴ Aerkhawf, arsaq saqlar ngae-aq, Aqyawf, khaqjawfni ghae-eu shiqteuv lof-aer khaq-awr, Miseuq nyiq paw baw-eu micaer lof-aer tav-eu mae.

⁵ Aqyawf-euq aqkuir, shir-eu mirkhanq-anr irka-awr, Aqyawf-euq kuirtof shiqbuir lanma-anr dawrcoeni can’ghae-eu mae.

⁶ Aqyawf, yawqha daef-eu cankawv-anr yawmuiq-aer maq sharnoeq-a. Aqyawf-euq garma maqzif-a laer aqyawf maq siqnya-a.

⁷ Khoermirnae, ngaq-euq zaqdeuq-or! Nymq-mr ngaq-anr narhaq-awq. Ngaq-euq khaqmae-anr nae dovle-euq dawq-anr tiqjawr-iq taqghawq-ir.

⁸ Nawq-euq garma, aqyawf-anr nae irkaq-awr, Aqyawf-euq nymr larghov-euq dawqpae taqir.

⁹ Maqngeur nar-aq, nawq-euq khanqsaer aqcawq-anr bif-awr, Nawq-euq arkhof arla ghawqshaq maq gaqnya-eu tsawrhaq-anr yabif-eu baw-mr.

¹⁰ Maqngeur nar-aq, nawr sanr-eu jeq, Yawqkhanq yawqmir yawq-euq tsawrhaq-anr bi zabyan-awr, Nawq nae kharmr khar sharza-euq jeq, Boermiq siqkhaq-euq nymr-anr jav-ir taef-a.

¹¹ Nawq-euq daefzir arsaq saqlar-awr, Nawq-euq shiqshaq hawr-eu nawq-euq mawrdo byovjir ngae, Nawr tsawrngoer ya’ngoer taef-a.

¹² Khoerngae, nawr heulof-aer aer taef-a: “Aqjeq mirnae, ngar maeqdawq tsovdawq-anr byae-awr, Ngaq-euq nuima maeqpar-eu gar hawdoer-euq nya!

¹³ Ngar, ngaq-anr maeq-eu deuq-euq tersar-anr maq narhaq-aer, Ngaq-anr maeq-awr tsov-eu deuq-euq dawq-anr naqbawr maq ciqkhmr-euq nya!

¹⁴ Uiqler taq-euq tsawrhaq hawr-eu baqmaf-euq ghanrcae, Ngar-aq, yacawv-ir jir-eu gar keuvlaw ngar-a.”

¹⁵ Nawq-euq ircuf taqduq-anr nae ircuf dawr-awr, Nawq-euq landuq-anr nae yoerdov lef-euq ircuf dawr-awq.

¹⁶ Nawq-euq ircuf lawrgawv, laevkawv-anr biyoer-awr, Nawq-euq ircuf irbyoe, kharngeur-eu gar bi yoerdzae-eu tsaq taef-a laq?

¹⁷ Khoer-aq, nawq-euq taef-aer bipyeuf-awq. Nawr, maqsiq maqsux-eu tsawrhaq-anr maqya bif-a.

¹⁸ Nawq-euq cuq guiqlanq za luf-ur, Nawr zaqguq ngae nae yur-euq miqzaq-anr laqkhaq caer-awq.

¹⁹ Hawmuiq-eu khaqtsaev tsaevkhar hawr-eu yaler paq-aer ghae-eu cirhaq lof-aer, Yawqjawr navluf nawq-euq miqzaq-euq khanq-anr nuikhanr shir-awr, Aqmyanluf aqyawf-euq gaq-eu jeq nae, Nawq-anr byankhar-ir ngae keuvni laqkhaq bi lavcaer-awq.

²⁰ Ngaq-euq zaqyo-or! Aqjeq ghae-eu banq-awr joe-eu zaqmiq aqbur nae laqkhaq bi lavcaer-awr, Aqjeq mirnae maershuir shuirlar-eu zaqmiq aqbur-euq aqlaf nae bi byarcuf-eu le?

²¹ Aqjeq mirnae aernar-aq, tsawrhaqzaq-euq garma-aq, Ya’we Miqyaer-euq maeqshi javluf-awr, Tsawrhaq-euq cankawv dawqtawv luf-anr, aqyawf sharnoeq sharsawx-eu mae.

²² Tsawrcawv-euq yawlaeq yawca-aq, aqyawf-anr lanrju khmr-awr, Yawqha-euq iqbax arcav-anr yawqha teuvpaf-eu mae.

²³ Aqyawf maeqdawq tsovdawq maq hageuf-eu mirnae yashir-awr, Aqyawf, aqdzawq argan ganma mirnae, garbanq banq-ir taef-a.