Dawqdaq 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqma Aqda-euq Maeqdawq Tsovdawq

¹ Ngaq-euq zaqdeuq-or! Aqda maeqpar-eu gar narhaq sher-eq. Ghovshaw nya-eu jeq-anr siqnya larni yawmuiq-aer narhaq-awq.

² Aqjeq mirnae aernar-aq, Ngar, nawq-anr muiq-eu dawqmaeq dawqtsov bifnaeq nyar. Nawmaf, ngaq-euq zanrdawq-anr taq byaerdzae.

³ Ngar, ngaqda-euq zaqyo pyeuf-awr, Ngaqma-euq maeqshi nanqjawvni ghae-eu, aqyawf-euq zaqgaq tiq ghaq taef-aer pyeuf ngae,

⁴ Ngaqda, ngaq-anr maeq-awr ngaq-anr heulof-aer aer-eu mae: “Nawq-euq nuima-euq lafkhoer, ngaq-euq dawq nyaefzif taq-awr, Nawr yadaefni, ngaq-euq khaerdawq-anr mrcaw-awq.

⁵ Heu-anr taqngaer! Zaqsiq tsawrganr povza-awr, ghovshaw nya-eu jeq khawf povza-awq! Ngaq-euq khaqmae-anr nae dovle-euq dawq-anr nae taq ghawrpyawr.

⁶ Nawr zaqsiq tsawrganr-anr taq byaerdzae, Aqyawf, nawq-anr bosav naeqlaf taef-a. Nawr, aqyawf-anr gaq nar-aq, Aqyawf, nawq-anr hawpir naeqlaf taef-a.

⁷ Uqdzan jeq-aq, zaqsiq tsawrganr mae. Khoermirnae, zaqsiq tsawrganr-anr povza-awq. Nawr aqgeu jeq za-euq khawf, Ghovshaw nya-eu jeq zalarni laejae-awq.

⁸ Zaqsiq tsawrganr-anr ciqpoeq-awq. Aqyawf, nawq-anr ciqgor naeqlaf taef-a. Nawr, aqyawf-anr byarcuf nar-aq, Aqyawf, nawq-anr taqhuiq taqmanr naeqlaf taef-a.

⁹ Aqyawf, nawq-euq uqduq-anr hawmuiq-eu uqdzanq bidzanq naeqlaf-awr, Yawshaef khanqsaer-euq uqdzanq a’naeqlaf taef-a.”

¹⁰ Ngaq-euq zaqyo-or! Ngar ngaeq-eu jeq-anr narhaq-awr hageuf-awq. Khoerlof-aer janr nar-aq, nawr zirbaw zirza taef-a.

¹¹ Ngar, nawq-anr zaqsiq tsawrganr-euq garma maeqnaeq ghaq-awr, Ngar, nawq-anr tsaq-eu cankawv sheuqmaeqnaeq ghaq-euq ma.

¹² Nawr can ngae, nawq-euq kuirtof-anr gheunaq lar-eu jeq maqjav-aer, Nawr caevcoeqcoeq ngae, sanqtif maqtif-ar.

¹³ Maeqdawq tsovdawq-anr maq pyaeqdzae-aer, zifdanni nyaeftaeq taq-awq. Aqyawf, nawq-euq daefzir pyeuf-eu mirnae, aqyawf-anr mrcaw-awq.

¹⁴ Tsawrcawv deuq-euq cankawv-anr taq urler. Tsawrdoer-euq garma-anr taqcan-ir.

¹⁵ Garma khoerkanr-anr garjaw jaw-awr, garma khoerkanr-anr taqcan. Khoerkanr-anr nae ciqpyawr-awr candzeur ghae-awq.

¹⁶ Aqyawfmaf yawdoer jeq maqmr-euq khoerkeuvni, maq yufkhav ler-aer, Aqyawfmaf, aqcawq-anr maqya lavcoq-euq khoerkeuvni, maq yufkhav nya-a.

¹⁷ Aqjeq mirnae aernar-aq, Aqyawf maf-aq, yawcawv jeq, kaqmur lof-aer dzaq-awr, Coeqler deuqler-eu jeq, aqgaf dzaruir lof-aer dawr-eu taef mae.

¹⁸ Aerkhawf, tsaq-awr dawr-eu tsawrhaq-euq cankawv-aq, Yawshaef bya-eu nanrma-anr dur-awr, Yawshaef bya-eu khoer, nanlov ngaeq-aer caelar nar-aq, ngaeq-aer byadzaeq lar-eu mae.

¹⁹ Tsawrcawv-euq garma-aq, yawzanr-anr dur-awr, Aqyawfmaf aqjeq-anr paevtov-euq nya laer khawf maq siqnya-a.

²⁰ Ngaq-euq zaqyo-or! Ngaq-euq dawq-anr yawmuiq-aer narhaq-awr, Ngar aer-eu jeq-anr nawq-euq naqbawr ciqkhmr-awr narhaq-awq.

²¹ Dawq khoerdeuq nawq-euq myavnuiv-anr nae maqbi candzeur-aer, Dawq khoerdeuq, nawq-euq nuima-euq lafkhoer juiruiq taq-awq.

²² Aqjeq mirnae aernar-aq, Dawq khoerdeuq-anr povmawr-euq tsawrhaq deuq-euq gharduq, daef-eu jeq pyeuf-awr, Aqyawf maf-euq shiqshaq dawqtawv luf-anr jawrsar bidov-eu mae.

²³ Nawq-euq nuima-anr yawmuiq-aer hawlanr-awq. Aqjeq mirnae aernar-aq, daefzir-anr khartaf-eu jeq nuima-anr nae yoerdov lef-eu mae.

²⁴ Nawq-euq khaqmae-anr nae jaqmyawf maershuir byaerdzae-awr, Nawq-euq maeqluq-anr nae dawq lavpyawv-eu jeq bikaq-ir-awq.

²⁵ Nawq-euq myavnuiv maeqhu paw hawghae lef-awr, Nawq-euq myavnuiv maeqhu paw dawrcoeni hawtsov taq-awq.

²⁶ Nawq-euq aqkuir-euq cankawv-anr sharnoeq sharsawx-awr, Nawq-euq garma dawqtawvluf lavzif-awq.

²⁷ Arcar paw maqngeur nar-aq, armar paw maq ciqpyawr-aer, Nawq-euq aqkuir yawdoer jeq-anr nae ciqdov lef-awq.