Dawqdaq 31 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sanqpaq Leqmeuqlar-euq Dawq

¹ Heu-aq, sanqpaq Leqmeuqlar-euq dawq mae: Aqyawf-euq aqma nae ngaeqngaeq-aer aqyawf-anr maeqnaeq tsovnaeq-euq dawq mae.

² Ngaq-euq zaqyo-or! Aqjeq janrluf-eu le? Ngaq nae baw-euq zaqyo-or! Aqjeq janrluf-eu le ler? Ngaq nae kamq-euq zaqyo-or! Aqjeq janrluf le laer aernar-aq?

³ Nawq-euq ghaq, zaqmiq aqbur-anr taqbif. Nawq-euq garma khawf, sanqpaq-anr lavcawv lar-eu tsawrhaq-anr taqbif.

⁴ Leqmeuqlar-or! Sanqpaq deuq, jirbaq dawr-eu maqtsaq-a. Dzoeqda deuq, jirbaq jirtav dawr-eu khawf maqtsaq-a. Sanqpaq deuq, heulof-aer mr paq-aer maqghae-a.

⁵ Maqngeur nar-aq, aqyawfmaf dawryaef ngae, zanrdawq-anr ngaerjir-awr, Shaqzanq daqluf-eu deuq-anr khartaf-eu dawr-awr tsaq-eu jeq, yurpyawv jirnya-eu mae.

⁶ Jirbaq jirtav-aq, shirler luf-eu deuq-anr bidawr-awr, Aqgaf jirbaq-aq, nuima khaqjawfni, shaqzanq daqluf-eu deuq-anr bidawr-awq.

⁷ Aqyawf-anr bidawr-awr, irshaq shaq-eu bingaer-awr, Aqyawf shaqzanq mr-eu bi ngaerbyovjir law.

⁸ Dawq maq ngaeqnya-eu deuq-euq gharduq, Nawq-euq khaqmae nae ngaeqdan naeq-awr, Yashir mae laer dartsaev taq-euq tsawrhaq deuq-anr, hawpir naeq-awq.

⁹ Nawq-euq khaqmae mrnga-awr, Tsaq-awr dawr-eu lafkhoer yarkhaq dar-awq. Irshaqzaq hawr-eu shaqzaq zanqzaq deuq-anr, ngaeqghae danteq naeq-awq.

Bym-eu Miqzaq

¹⁰ Bym-eu miqzaq aqsur ghaq povmawr nya-eu la? Aqyawf-aq, nertseuvni ghae-eu khaqlo saer navmaqtser, arpoeq khav-eu mae.

¹¹ Aqyawf-euq khaqdzerzaq-euq nuima-aq, aqyawf-anr ghoejir coer-eu mae. Khoermirnae, jirjeuq maqza-eu maqbaw-a.

¹² Aqyawf khardaef-eu tiqzir, khaqdzerzaq-anr muiqler-eu jeq taef-aer mr-awr, Yawdoer jeq maqmr-a.

¹³ Aqyawf, yawr cafhm hawr-eu jiq arbawr pov-awr, Nuima keuv-eu lafkhoer, aqyawf-euq aqlaf nae myawq mr-eu mae.

¹⁴ Aqyawf-aq, jeqgaf gaf-eu tsawrhaq-euq lawq lof-aer, Garmanr kaq-eu gar nae, dzaqdzaq dawrdawr irkanr yuranr laf-eu mae.

¹⁵ Aqyawf uqbya maqbya lar-euq minav-aer tur-awr, Nymrkhanq-euq zaqdeuq, dzaq-eu gharduq dzar lavsav-awr, Aqbur zaqkhav deuq-anr, gar daeqbir naeq-eu mae.

¹⁶ Aqyawf, mirtsaq-anr haw-awr, yawmuiq-aer sharsawx-awr zeur-eu mae. Khoernar-aq, aqyawf-euq aqlaf nae povza-euq jirjeuq yur-awr, aqgaf yarkmr mr-eu mae.

¹⁷ Aqyawf, yawqhar yawqha, ghaq nae jof-anr paf-awr, Aqyawf-euq aqlaf mrdeur-eu mae.

¹⁸ Aqyawf-euq jeqgaf jeqka mrmyawq, Jirjeuq zalar-eu hawmawr taq-euq mae. Uqcif paw, aqyawf-euq tsirkhmq, maqbi miv-ir ni gar mr-eu mae.

¹⁹ Aqyawf, aqyawf-euq aqlaf nae saqlaq ghawr-awr, Yawqha-euq aqlaf nae saqkanr shuir-eu mae.

²⁰ Aqyawf, irshaqzaq-anr aqlaf cawqdov naeq-awr, Aqyawf-euq aqlaf, shaqzaq zanqzaq-anr cawqja naeq-eu mae.

²¹ Aqyawf-euq nymrkhanqzaq-euq gharduq, Maeqtsoeq paerner yawlmr dmlof-eu mirnae, Ngaer ga ngae yamq-anr khawf maqguv-a.

²² Aqyawf, yawqha-euq gharduq, doeq kuf-awr aryaev tsovtaq-euq khawqdaq-anr khawqdav-eu saqpar zaf-awr, Aqyawf-euq maeqtsoeq-aq, nerpuir puir-awr sheqsha saqpar nae guftaq-eu mae.

²³ Aqyawf-euq khaqdzerzaq-aq, Meuq-euq lanrkhaeq-anr jawr-eu deuq siqnya-awr, Mirkhanq-euq aqyuif aqtsu deuq-euq ghanrcae nuir-eu mae.

²⁴ Aqyawf, jiq saqpar nae, dmghaq dmlmr guf-awr anq-eu uqtaf, Jofpaf khawf janr-awr, jeqgaf gaf-eu deuq-anr anqnaeq-eu mae.

²⁵ Ghaq hawr-eu khanqsaer-aq, Aqyawf-euq dmghaq dmlmr pyeuf-awr, Maeqhu paw keuvle-eu arnan-anr laqkhaq caer-eu mae.

²⁶ Aqyawf-euq khaqmae mrnga ngae, zaqsiq tsawrganr dovle-awr, Aqyawf-euq maeqlar-aq, ghawqshaq gaq-eu zanrdawq ngaeq-eu mae.

²⁷ Aqyawf, aqyawf-euq nymrkhanqzaq-euq garma, yawmuiq-aer hawnaeq-awr, Nymrgawq yawdoer-euq kaqmur maqdzaq-a.

²⁸ Aqyawf-euq zaqdeuq turlar-awr ciqpoeq-eu uqtaf, Aqyawf-euq khaqdzerzaq khawf, aqyawf-anr jaceuq-eu mae.

²⁹ Aqyawf-euq khaqdzerzaq aer-eu, “Bym-eu zaqmiq ghawqmya’ni jawr-eu mae. Aerkhawf, nawr-aq, aqcawq taf-aer bymdzaeq-eu mae.”

³⁰ Yaler paq-aer ghae-eu yawjaq-aq, jaqmyawf maershuir pyeuf-awr, Mawrlar-eu gar hawmuiq-eu jeq khawf maqgmq-a. Aerkhawf, Ya’we Miqyaer-anr guv-eu zaqmiq aqbur-aq, aqcawq jaceuq taef-a.

³¹ Aqyawf-euq aqlaf nae mrza-euq arsiq, aqyawf-anr bif-awr, Meuq-euq lanrkhaeq-anr aqyawf nae mr-awr shar-euq jeq, aqyawf-anr jaceuq luf-ur.