Dawqdaq 30 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aqgurla-euq Dawq

¹ Dawq heudeuq-aq, Yaqkhae-euq zaqyo Aqgurla nae ngaeqtaq-euq dawq mae. Heughaq nae Irtiqlar-anr, Irtiqlar hawr-eu Urkaq-anr dzawrnaeq-euq dawq mae.

² Ngar-aq, aqdir tsawrhaq nuideuq taf-aer lafdzaeq mir-a. Tsawrhaq-euq ghovshaw nya-eu jeq maqanr nya.

³ Ngar, zaqsiq tsawrganr maqya dzawhaw-aer, Yawshawr ghaq-euq garkawv-anr taf-eu siqnya-eu tsawrganr khawf maqanr nya.

⁴ Mqtav mirkhanq-anr ledav-awr zafka le-euq aqsur ghaq-a? Laftuv-euq lafkhoer, jaqlaer nyaefuiq taq-euq aqsur ghaq la? Ircuf-anr paerkhanq nae cu-euq aqsur ghaq-a? Mirma oeqcoer oeqbawq lavzif-euq aqsur ghaq la? Aqyawf-euq tsawrmyanr aqjeq laer kur-awr, Aqyawf-euq Zaqyo-euq tsawrmyanr aqjeq laer la? Nawr siqnya ma lor?

⁵ Miqyaer-euq dawq yawqdawq navluf, shawrjaevni ghae-eu mae. Aqyawf-euq lafkhoer, khar caevzaf ler-eu tsawrhaq deuq-euq gharduq, daeqdaqduq pyeuf-eu mae.

⁶ Yaerdawq-anr tiqjeq-iq taq dawvlanq. Maqngeur nar-aq, Miqyaer, nawq-anr maeqparlar ngae, Nawr-aq, jaqmyawf nga laer dovlar taef-a.

⁷ Miqyaer-or! Ngar, nawq-anr heu nyiq jeq shar ma. Ngar maqshir-euq minav-aer, maqbif-aer taqghae naeqlaf.

⁸ Ngaq-anr nae jaqmyawf hawr-eu maqtsaq-eu jeq, Garmanr kaq-eu gar yurdzae naeqlaf. Ngaq-anr smrmuiqzaq maqngeur nar-aq, irshaqzaq taqbi pyeufnaeqlaf. Ngar daefnya’ni, mawf-eu dzaqdzaq dawrdawr bifnaeq laf-awq.

⁹ Maqngeur nar-aq, ngar dzaqdaevnya lar-awr, “Ya’we Miqyaer aqsur ghaq la?” laer aer-awr, Nawq-anr byaernya-eu baw-mr. Ngar irshaqshaq nar-aq khawf, smrkhoeq khoeq-awr, Ngaq-euq Miqyaer-euq tsawrmyanr-anr lavcawv-eu baw-mr.

¹⁰ Yawsanr ghaq-euq maeqshi, kuirlaf zaqkhav-anr taq jadoer. Maqngeur nar-aq, nawq-euq yawlaeq dovlar-awr, Aqyawf, nawq-anr yaqkhaeryaq lar-eu baw-mr.

¹¹ Yawqha-euq aqda-anr, yaqkhaer yaq-awr, Yawqha-euq aqma-anr dawq maq ngaeqghae naeq-eu tsawrhaq tsawrtsuif jawr-eu mae.

¹² Yawqha-euq yawjawf maqbi tsiqshawr-euq khawf, Yawqhar yawqha, yawshawr ma laer noeq-eu tsawrhaq tsawrtsuif jawr-eu mae.

¹³ Yawqhar yawqha, maqgar duidui ma laer noeq-awr, Janrghae-eu myavnuiv tsof-eu tsawrhaq tsawrtsuif jawr-eu mae.

¹⁴ Shaqzaq zanqzaq, tsawrhaqzaq-anr nae bibyov-ir-awr, Irshaqzaq mirtsaq-anr nae dzaqbyov-eu laer, Seuq-aq, micaer jirbav-anr dur-awr, Juir-aq, tawvzaq lof-aer dur-eu tsawrhaq tsawrtsuif jawr-eu mae.

¹⁵ Yaeftov aqma zaqmiq nyiq miq jawr-awr, “Bifnaeqlaf, bifnaeqlaf!” laer gur-eu mae. Dzaqdaev dawrdaev-eu maqbaw-eu smr jeq jav-awr, Tiqjawr-iq, “Ghaq ma!” laer maq aerhaw-euq oeq jeq jav-eu mae.

¹⁶ Lmqbymr hawr-eu maqbaw-eu aqma-euq zaq-euq jawrdaq, Ircuf maqdaev-eu mirtsaq hawr-eu miqdzaq, “Ghaq ma!” laer maq aerhaw-aq.

¹⁷ Yawqha-euq aqda-anr aqjaf jafdoer-awr, aqma-anr hawdoer-awr, Aerdawq maq narhaq geuf-eu tsawrhaq-euq myavnuiv-aq, Ghaqlawq-anr jawr-eu awf-af nae yabi tovdov-awr, Khaqdzer zaqguq nae yabi dzaq taef-a.

¹⁸ Ngaq-euq gharduq zanq duidui ler-eu smr jeq jav-awr, Ngar maq ghovshaw nya-eu oeq jeq jav-eu mae;

¹⁹ Mq-anr zaw-eu khaqdzer-euq garma, Logur-anr joe-eu arlawr-euq garma, Iqmalavshav-euq ghanrcae can-eu lawq-euq garma hawr-eu, Aqbur zaqguq-anr cawq cawq-eu aqli zaqguq-euq garma.

²⁰ Aqcawq naeq-aer banq-awr joe-eu zaqmiq aqbur-euq garma-aq heulof-aer mae; Aqyawf dzaqghaq-awr khaqmae sivshawr-euq nar-aq, “Ngar yawlaeq yawca tiqjeq-iq maqmr-aq!” laer aer-eu mae.

²¹ Mirtsaq-anr gheunyae lar-eu smr jeq jav-awr, Maq daqcoer paq-aer ghae-eu oeq jeq jav-eu mae.

²² Kuirlaf zaqkhav uvlanr-eu dzoeqdzaq za ngae, Aqdzawq argan maqdzaq maqdawr jircoerni javlar ngae,

²³ Aqcawq byae-eu zaqmiq aqbur ya danqdzaq-ir ngae hawr-eu, Aqbur zaqkhav, nymrsanr aqma-euq jawrzar za ngae.

²⁴ Mirtsaq-euq khoertav mawrdo yawnyir khawf, Tsawrganr yawkhav-aer anr-eu armawr oeq jeq jawr-eu mae;

²⁵ Arho-aq, ghaq maqkhav-eu armawr pyeuf-eu khawf, Jawrla yamq-anr dzaqdzaq dawrdawr povuiq taq-eu mae.

²⁶ Logur pyaqiq-aq, nanqjawvni ghae-eu jeqzaq pyeuf-eu khawf, Logur baqgha-anr khaqlo yawpav-euq lafkhoer banqbanq-awr jawr-eu mae.

²⁷ Nyaevbanr-aq, sanqpaq maqbaw-eu khawf, Baqmaf maf-awr cannya-eu mae.

²⁸ Gharghawq-aq, aqlaf nae nyaefza nya-eu khawf, Sanqpaq-euq nymr-anr jawr-eu mae.

²⁹ Kuirtof ciq ngae, hawmuiq-eu smr jeq jawr-awr, Garma can ngae hawmuiq-eu oeq jeq jawr-eu mae;

³⁰ Arlaqjaqshir-aq, jeqzaq dawqtawv luf-euq lafkhoer, Aqcawq navmaqtser ghaq khavdzaeq-awr, Tiqjeq-anr-iq maq yanrpawr-a.

³¹ Mrzeuv mrzeuv-aer can-eu yaciv yapoer, Cifmyaef cifbuq hawr-eu guirmaf naeq-aer can-eu sanqpaq.

³² Nawr, aqdzawq argan gan-awr, yawqhar yawqha ciqpoeq-awr, Yawcawv jeq mr-eu laer tov-euq ngeur nar-aq, Nawq-euq aqlaf nae, yawqha-euq khaqmae-anr khawvkaq-awq.

³³ Aqjeq mirnae aernar-aq, Mawrner aqcoer-anr kawv nar-aq, aqcoer ymrler-awr, Narmaer-anr yeuf nar-aq, narmaer shiq dovle-eu lof-aer, Nuima lavpaer nar-aq, iqdaeq iqcae dovlar-eu mae.