Dawqdaq 29 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aernoeq-awr Maeqbawq Bif-eu

¹ Maeqpar naeq-eu laer ghawqmya pov maeq-euq khawf, Kawqlanr mrghanr-eu tsawrhaq-aq, Maq lavsav nya-eu gar keuvni, Tiqpov taef-aer yakhaef-ir taef-a.

² Tsaq-awr dawr-eu tsawrhaq myaqlar ngae, Mirkhanqzaq laqkhaq caer-eu mae. Aerkhawf, tsawrcawv uvlanr ngae, mirkhanqzaq manr-eu mae.

³ Zaqsiq tsawrganr-anr gaq-eu tsawrhaq-aq, Yawqha-euq aqda-anr laqkhaq bi caerlar-eu mae. Aerkhawf, mawrdo anq-eu deuq naeq-aer cawq-eu tsawrhaq-aq, Aqyawf-euq pyurshuir lavdzae jir-eu mae.

⁴ Dawr-awr tsaq-eu jeq-euq baqda’nae, Sanqpaq mirkhanq lavzif-eu mae. Aerkhawf, lafnmf nmf-eu gar gaq-eu tsawrhaq-aq, Mirkhanq lavcawv-eu mae.

⁵ Yawqha-anr muiqni, Yawqha-euq dawqpae jawr-eu tsawrhaq-anr japoeq-eu tsawrhaq-aq, Yawqha-euq aqkuir-anr lanrju khmr-eu gar dur-eu mae.

⁶ Tsawrdoer-aq, yawqha-euq yawbanq yawlaeq-euq baqda’nae, Lanrju-anr pafler taef-a. Aerkhawf, tsaq-awr dawr-eu tsawrhaq-aq, Carcar-aer laqkhaq yacaer taef-a.

⁷ Tsaq-awr dawr-eu tsawrhaq, Irshaqzaq-euq gharduq sharnoeq sharsawx-eu mae. Aerkhawf, tsawrcawv-aq, Heulof-aer ghae-eu siqnya-eu tsawrganr-anr, Maq ghovshaw nya-a.

⁸ Aqjaf jaf-eu tsawrhaq-aq, Meuq meuqlan-aer miqdzaq keuqpuiv nya-eu mae. Aerkhawf, tsawrganr anr-eu deuq-aq, Nuima paer-eu jeq yurpyawrdzae nya-eu mae.

⁹ Tsawrganr anr-eu tsawrhaq, aqdzawq argan naeq-aer jadzaq ngae, cofngaerni maqghae-a. Aqjeq mirnae aernar-aq, aqdzawq argan-aq, maquir nar-aq, nuima paer-eu mae.

¹⁰ Shiq maef-eu tsawrhaq-aq, Aerkhar maqza’ni daef-eu tsawrhaq-anr byae-eu khawf, Dawrcoeni daef-eu tsawrhaq-aq, Cawba-eu laer laejae-eu mae.

¹¹ Aqdzawq argan-aq, nuima kharpaer-eu lof-aer bi dovlar-eu mae. Aerkhawf, tsawrganr anr-eu tsawrhaq-aq, Yawmuiq-aer nyaeftaeq nya-eu mae.

¹² Uvlanr-eu tsawrhaq tiq ghaq, Jaqmyawf-anr narhaq nar-aq, Aqyawf-euq kuirlaf zaqkhav dawqtawvluf, Tsawrcawv taef-aer pyeufjir-eu mae.

¹³ Tiqkawv lof-aer daeftaf luf-eu irshaqzaq, Hawr-eu nyaefsuf-eu tsawrhaq nyiq ghaq-anr luf, Ya’we Miqyaer nae, yawshaef-anr mawrnya-eu myavnuiv baetsof naeq-euq mae.

¹⁴ Irshaqzaq-anr yawtsaq yawdawr nae, Yarkhaq dar-eu sanqpaq-euq nuirmanq-aq, Arsaq saq-eu maqbawni zif taef-a.

¹⁵ Darcuir hawr-eu maeqpar-eu jeq-aq, zaqsiq tsawrganr bif-eu mae. Aerkhawf, zaq-anr khar daefmawf-eu lof-aer bidaef nar-aq, aqma daqga-eu mae.

¹⁶ Tsawrcawv deuq baerlar ngae, yawbanq yawlaeq jeq myaqlar-eu mae. Aerkhawf, tsaq-awr dawr-eu tsawrhaq, aqyawfmaf coq-ir gar ya’mawr taef-a.

¹⁷ Nawq-euq zaqyo-anr dzawpar naeq-awq. Khoerlof-aer janr nar-aq, nawq-anr ghaqnaq biza naeqlaf-awr, Nawq-euq nuima-anr laqkhaq bicaer naeqlaf taef-a.

¹⁸ Aqgeugar maqkaq, panmaeq-eu jeq maqjav nar-aq, Mirkhanqzaq khar daefmawf-eu lof-aer daef-eu mae. Aerkhawf, zanrdawq-anr cantae-eu tsawrhaq-aq, guiqlanqhuiq taef-a.

¹⁹ Kuirlaf zaqkhav-aq, dawq nae taef-aer maq dzawpar nya-a. Aqjeq mirnae aernar-aq, aqyawf ghovshaw-euq khawf maq mrcaw-a.

²⁰ Nawr, dawq ardzaeq-aer ngaeqdov kawr-eu tsawrhaq-anr mawrhaw-euq ma laq? Aqdzawq argan-anr-aq, heughaq-anr navmaqtser noeqtmqkhar za-eu mae.

²¹ Zaq-anr ngae nae, cuhuiq laf-euq kuirlaf zaqkhav-aq, Arsaq saqlar ngae, zaqyo tiq ghaq lof-aer durlar taef-a.

²² Nuima paer-eu tsawrhaq-aq, iqdaeq iqcae lavdov-awr, Nuima dav-eu tsawrhaq-euq yawbanq yawlaeq-aq, myaq duidui-eu mae.

²³ Tsawrhaq-euq nuima huiq-eu jeq, aqyawf-anr gheu’aw taef-a. Aerkhawf, nuinanq nuiyu anr-eu tsawrhaq-aq, taqhuiq taqmanr-eu jeq za taef-a.

²⁴ Smrkhoeq naeq-aer gm-eu tsawrhaq-aq, yawqha-euq daefzir-anr byae-eu mae. Aqyawf, yawtsaq yawdawr ngaeq-eu ma laer kamq-eu khawf, tiqjeq-iq maq pandov naeqlaf-a.

²⁵ Tsawrhaq-anr guv-eu jeq-aq, tanrpaf lar-eu lanrju pyeuf-eu mae. Aerkhawf, Ya’we Miqyaer-anr, ghoe-eu tsawrhaq-aq, yabuq-ir taef-a.

²⁶ Tsawrhaq ghawqmya’ni, uvlanr-eu tsawrhaq-euq ghoer mr-eu jeq za’ni sharpov-eu mae. Aerkhawf, tsawrhaqzaq-anr, dawr-awr tsaq-eu jeq bi keuvle-eu ghaq-aq, Ya’we Miqyaer mae.

²⁷ Tsaq-awr dawr-eu tsawrhaq-aq, maqtsaq maqdawr-eu tsawrhaq-anr nuidav dav-eu lof-aer, Tsawrcawv-aq, garma-anr nae dawrcoeni daef-eu tsawrhaq-anr nuidav dav-eu mae.