Dawqdaq 28 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Aernoeq-awr Maeqbawq Bif-eu

¹ Tsawrcawv-aq, aqcawq tiqghaq-iq maqtae-eu gar guvguv-aer caev-eu mae. Aerkhawf, tsaq-awr dawr-eu tsawrhaq-aq, Arlaqjaqshir lof-aer khaqduqni ghae-eu mae.

² Mirkhanq tiq khanq-euq lafkhoer, Yawbanq yawlaeq jeq mr-eu baqda’nae, Dzoeqda ghawqmya ghaq dovlar nya-eu mae. Aerkhawf, ghovshaw-awr siqnya-eu tsawrganr anr-eu tsawrhaq-euq baqda’nae zifnya-eu mae.

³ Yawshaqzaq-anr nyaefsuf-eu irshaqzaq-aq, Sanqlanq ghawqdar-anr daecawv-eu, uqyaer banqma-anr dur-eu mae.

⁴ Zanrdawq-anr byaerdzae-eu tsawrhaq-aq, Tsawrcawv deuq-anr jaceuq-eu mae. Aerkhawf, zanrdawq-anr cantae-eu tsawrhaq-aq, Aqyawf maf-anr lavtsoeq ler-eu mae.

⁵ Tsawrdoer deuq-aq, dawr-awr tsaq-eu jeq-anr maq ghovshaw nya-a. Aerkhawf, Ya’we Miqyaer-anr pov-eu tsawrhaq deuq-aq, Dawqtawvluf ghovshaw nya-eu mae.

⁶ Garma birpyawv-aer can-eu smrmuiqzaq navmaqtser, Dawrcoeni can-eu irshaqzaq-aq, muiqdzaeq-eu mae.

⁷ Zanrdawq-anr cantae-eu tsawrhaq-aq, Ghovshaw nya-eu zaqyo mae. Aerkhawf, dzaqdaev dawrdaev-eu maqbaw-eu deuq naeq-aer cawq cawq-eu ghaq-aq, Yawqha-euq aqda, daqgaqlar paq-aer janrnaeq-eu jeq pyeuf-eu mae.

⁸ Yawqha-euq myawqganq deuq myaqlarni, Jirjeuq ardzaeq-aer sawx-awr, Arpoeq ardzaeq yurdzeur-eu tsawrhaq-aq, Irshaqzaq-anr ghawqshaq gaqnya-eu tsawrhaq tiq ghaq-euq gharduq, Povuiq taq-eu jeq pyeuf-eu mae.

⁹ Yawqha-euq naqbawr zanrdawq-anr maq narhaqni, Yawqpawyawq ciqpyawr-eu tsawrhaq-aq, Aqyawf-euq guiqlanq shardawq khawf, Nuidav davlar paq-aer ghae-eu mae.

¹⁰ Dawrcoeni daef-eu tsawrhaq-anr, Garma yawdoer kanr-anr canbanq ghaeni sheuqbanq-euq tsawrhaq-aq, Yawqha nae duq-euq duqkhanq-anr ya ga’anrghae taef-a. Aerkhawf, dawrcoeni daef-eu tsawrhaq-aq, muiq-eu jeqbir of taef-a.

¹¹ Smrmuiqzaq-aq, yawqha-euq myavnuiv nae haw ngae, Yawqhar yawqha yawganr ma laer noeq-eu mae. Aerkhawf, ghovshaw nya-eu irshaqzaq-aq, Aqyawf-anr yawmuiq-aer hawdov nya-eu mae.

¹² Tsaq-awr dawr-eu tsawrhaq laqkhaqcaer ngae, Yawshaef khanqsaer huiq-eu mae. Aerkhawf, tsawrcawv turlar ngae, tsawrhaq caevzaf byov-eu mae.

¹³ Yawqha-euq yawbanq yawlaeq daeqkaq-eu laer laejae-eu tsawrhaq-aq, Tiqjawr-iq maq daefdzaq lar-a. Aerkhawf, yawqha-euq yawbanq yawlaeq aerdov-awr, Byaerdzae-eu tsawrhaq-aq, ghawqshaq gaq-eu jeq za taef-a.

¹⁴ Aqmyanluf, Ya’we Miqyaer-anr guv-eu tsawrhaq-aq, guiqlanqhuiq taef-a. Aerkhawf, nuima lavghanr-eu tsawrhaq-aq, Lavbyov lavbyav-eu jeq-anr ga’anr taef-a.

¹⁵ Tsawrcawv, irshaqzaq-anr uvlanr-eu-aq, Joeqjoeq-aer can-eu arlaqjaqshir hawr-eu, Tsawqdawf lar-eu khaqhmr-anr dur-eu mae.

¹⁶ Ghovshaw nya-eu jeq, maqanr-eu uvlanr-eu tsawrhaq-aq, Yawkhav-aer khaeq-awr khav-eu tsawrhaq pyeuf-eu mae. Aerkhawf, maerjuir juir-eu jeq-anr byae-eu tsawrhaq-aq, zir baw-eu mae.

¹⁷ Aqcawq-euq shiq lavdov-euq mirnae, guqler-euq tsawrhaq-aq, Duqkhanq-anr caevghae luf-eu mae. Aqyawf-anr tiqghaq-iq taq cawba’naeq.

¹⁸ Dawrcoeni daef-eu tsawrhaq-aq, yabuq-ir taef-a. Aerkhawf, garma birpyawv-aer can-eu tsawrhaq-aq, Tiqpov taef-aer yacoq-ir taef-a.

¹⁹ Yawqha-euq mirtsaq-anr duqduq-aer mr-euq tsawrhaq-aq, Dzaqdzaq dawrdawr ghawqmya’ni jav taef-a. Aerkhawf, gardanr maqtsoeq-eu jeq-anr cantae-eu tsawrhaq-aq, Irshaq ya shaqsaef taef-a.

²⁰ Sarjax zif-eu tsawrhaq-aq, Guiqlanq tiqbyan tiqlof za taef-a. Aerkhawf, yawkawr-aer smrmuiq muiqlar mawf-eu tsawrhaq-aq, Maqbi dar-aer maqdzeur-ir nya-ar.

²¹ Myavpyawq huiqnyir tser-eu-aq, maqmuiq-a. Aerkhawf, tiqghaqnav, kaqmur tiq pyaeq-euq baqda’nae, Yawbanq yawlaeq mrnya-eu mae.

²² Myavnav nav-eu tsawrhaq-aq, Smrmuiq yawkawr-aer muiqlarni laejae-awr, Yawqha irshaq yashaq-ir-a laer, Tiqpawf-iq maq sharnoeq maq sharsawx-a.

²³ Arsaq saqlar ngae-aq, Dawqja nya-eu maeqlar tsof-eu ghaq-anr navmaqtser, Maeqpar naeq-eu ghaq-anr noeqmuiq dzaeq-eu gar ya’mawr taef-a.

²⁴ Yawqha-euq aqda aqma-euq myawq khoeq-awr, “Heu-aq, yawbanq yawlaeq maqngeur-a” laer aer-eu tsawrhaq-aq, Lavcawv-eu tsawrhaq-euq cawq-anr dur-eu mae.

²⁵ Nuima huiq-eu tsawrhaq-aq, Iqdaeq iqcae lavdov-eu mae. Aerkhawf, Ya’we Miqyaer-anr ghoe-eu tsawrhaq-aq, bawle zale taef-a.

²⁶ Yawqha-euq nuima-anr ghoe-eu tsawrhaq-aq, aqdzawq argan mae. Aerkhawf, yawganr ganr-aer daef-eu tsawrhaq-aq, yabuq-ir taef-a.

²⁷ Irshaqzaq-anr bif-eu tsawrhaq-aq, nym-eu maqbaw-ar. Aerkhawf, yawqha-euq myavnuiv awzaf-eu tsawrhaq-aq, Yaqkhaer yaq-eu dawq, ghawqmya’ni yadaq taef-a.

²⁸ Tsawrcawv turlar ngae, mirkhanqzaq caevzaf-eu mae. Aerkhawf, tsawrcawv deuq byov-ir ngae, Tsaq-awr dawr-eu tsawrhaq myaqlar-eu mae.