Dawqdaq 25 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Sorlaqmoq-euq Dawqdaq Nuideuq

¹ Dawqdaq heudeuq khawf, Yurdav sanqpaq Heqzeqkir-euq tsawrhaq nae haw-awr bofdov taq-euq Sorlaqmoq-euq dawqdaq deuq mae.

² Kharngeur-eu jeq zaftaq-eu-aq, Miqyaer-euq yawshaef khanqsaer pyeuf-eu mae. Aerkhawf, kharngeur-eu jeq povmawr nya-eu-aq, Sanqpaq deuq-euq khanqsaer pyeuf-eu mae.

³ Mq gor-awr mirtsaq naf-eu lof-aer durni, Sanqpaq deuq-euq nuima-anr pov ngae, maq povduq nya-a.

⁴ Pyur-euq lafkhoer anr-eu maqmuiq-eu jeq, kharshawrdov ngae, Pyur taev-eu bajiq-aq, pyur khoer nae mrmyawq taevdovlaf nya-eu mae.

⁵ Sanqpaq-euq maeqshi nae tsawrcawv gheudovdzae ngae, Sanqpaq-euq nuirmanq, tsaq-awr dawr-eu lafkhoer zifnya-eu mae.

⁶ Sanqpaq-euq maeqshi, yawqhar yawqha taq ciqpoeq, Tsawrhuiq tsawrma-euq yawfduq-anr taqyawf.

⁷ Nawq-euq myavnuiv nae ya’mawr-euq dzoeqda-euq maeqshi, bi gheuka-eu navmaqtser, Sanqpaq nae, “Heugar nuirdav lar-awq” laer bi’aer-eu-aq, ghaqdzaeq-eu mae.

⁸ Yarkhaq darduq-anr yarkhaq ja-ir-eu taqtaeq. Maqngeur nar-aq, arsaq saqlar ngae, Nawq-euq dawqpae jawr-eu tsawrhaq, Nawr daqgalar paq-aer janrnaeqlaf nar-aq, aqjox-aer ghae nmr-mq?

⁹ Nawq-euq dawqpae jawr-eu tsawrhaq naeq-aer, Garkawv jav ngae, jasawx geuf-awr, Aqcawq-euq garkawv zaftaq-eu jeq taq jadov.

¹⁰ Maqngeur nar-aq, aqcawq yagaq-awr, Nawr daqgalar paq-aer ghae-eu jeq jakhawq ghae-awr, Arsaq saq-eu maqbawni nawq-euq tsawrmyanr cawv taef-a.

¹¹ Yamqlaw-anr ngaeqtsaq-euq dawq-aq, Pyur khmqmaq-anr dawvanr taq-euq, shuir-euq arsiq-anr dur-eu mae.

¹² Narhaq geuf-eu naqbawr-euq gharduq, Tsawrganr maeqpar naeq-eu jeq-aq, Muiq-eu shuir nae janr-euq myawqgur, Hawr-eu shuir nae janr-euq naqbawr-anr geuf-eu naqyov-anr dur-eu mae.

¹³ Mrkar lavluiv-eu yamq-anr, ircuf yawtsaef yadawr-euq lof-aer, Sarjax zif-eu ghaqzaq ghaqkhaer tiq ghaq-anr, Khaerghae-euq ghaq-euq nuima-anr shiqkheurni bi ghaeler-eu mae.

¹⁴ Yawqha lafsawq maqbif nya-eu gar keuvni, Khanqsaer jaev-eu tsawrhaq-aq, Uqyaer maqanr-eu mqdmr hawr-eu jaqlaer-anr dur-eu mae.

¹⁵ Orcoer-eu jeq-aq, dzoeqda-euq nuima-anr tsanrpyawr nya-awr, Nanqyuni ghae-eu maeqlar-aq, shaqyoeq-anr ngawqkhaef nya-eu mae.

¹⁶ Nawr, byaquir ya’mawr-euq le laq? Nawr tsaqtsaqni taef-aer dzaq-awq. Maqngeur nar-aq, ardzaeq-aer daevlar-awr, Uqpaef ya paefdzae-eu baw-mr.

¹⁷ Nawq-euq dawqpae jawr-eu tsawrhaq-euq nymr-anr, Tiqkhaeq maqtaqni kuirtof taq ciqanr-ir. Maqngeur nar-aq, aqyawf, nawq-anr mawrdaev-awr, byaelar-eu baw-mr.

¹⁸ Yawqha-euq dawqpae jawr-eu tsawrhaq-euq garkawv, Maqtsaq maqdawr-eu tsawrkaq geuf-awr ngaeq-eu-aq, Diqkawq, micaer hawr-eu tav duidui-eu kavmyaq lof-aer dur-eu mae.

¹⁹ Gardzaq garkawv keuvle ngae, Sarjax maqzif-eu tsawrhaq-anr ghoe-eu-aq, Seuq khaef-ir-euq hawr-eu kuirmyavpur puir-ir-euq lof-aer doer-eu mae.

²⁰ Nuima cawvluf-eu tsawrhaq-anr dawqcar carnaeq-eu-aq, Tsanqgav yamq-anr maeqtsoeq gheudzae naeq-awr, Marnar-anr, dzaruircaer shaevdav naeq-eu gar dur-eu mae.

²¹ Nawq-anr muir-eu tsawrhaq, Hawq maef nar-aq, dzaq-eu jeq bifnaeq-awr bidzaq-awq. Ircuf maef nar-aq, ircuf ciqnaeq-awr bidawr-awq.

²² Khoerlof-aer janrnaeq-eu-aq, Aqyawf-euq uqduq-euq khoertav, Miqdzaq dof-eu khaqgheuq tsidav naeq-euq gar dur-awr, Sanqpaq Miqyaer, nawq-anr mrpoeq lafsawq bifnaeqlaf taef-a.

²³ Laftav paw nae bawghae lef-eu jaqlaer-aq, uqyaer bi yaerle-eu lof-aer, Jadoer-eu maeqlar-aq, nuima bi paerlar-awr, myavpyawq bizanr-ir-eu mae.

²⁴ Caecawq shar-eu, zaqmiq aqbur naeq-aer irkanr-euq lafkhoer jawr-eu navmaqtser, Nymrmq-euq lafcoer-anr davjawr ler-eu ghaqdzaeq-eu mae.

²⁵ Garmanr kaq-eu mirkhanq-anr nae, Bi gaqlar-euq dawqmuiq-aq, Nuima saflar ghaq baq ngae, yadawr-euq ircuf irtsaef-anr dur-eu mae.

²⁶ Tsaq-awr dawr-eu tsawrhaq tiq ghaq, tsawrcawv-anr gatsaq-eu-aq, Jawflafni ghae-eu cuq hawr-eu, lavjawf taq-euq landuq-anr dur-eu mae.

²⁷ Byaquir ardzaeq dzaqdzeur-eu maqmuiq-eu lof-aer durni, Yawqha khanqsaer za’ni, sharpov-eu khawf maqmuiq-a.

²⁸ Yawqha-euq nuima-anr maq uvlanr nya-eu tsawrhaq-aq, Meuqlanr maqjav-aer, bi deuvpyavjir taq-euq meuq-anr dur-eu mae.