Dawqdaq 24 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yanryanr-aer Daef-eu Maeqbawq

¹ Tsawrdoer deuq-anr myavnav taqnav. Aqyawfmaf naeq-aer khawf taq jawrtafmawf.

² Aqjeq mirnae aernar-aq, aqyawf maf-euq nuima, Aqcawq-anr coeqler civler-eu jeq tov-awr, Aqyawf maf-euq maeqluq, Gardzaq garkawv lavdov-eu jeq ngaeq-eu mae.

³ Nymr-aq, zaqsiq tsawrganr nae yatsov-awr, Ghovshaw-eu jeq nae ya lavzif-eu mae.

⁴ Siqnya-eu tsawrganr-euq baqda’nae, Nymr-euq arlawv deuq-euq lafkhoer, Arpoeq khav-awr hawmuiq-eu myawqganq deuq yurbyan taq-euq mae.

⁵ Tsawrganr anr-eu tsawrhaq-aq, Ghaq khav-awr, siqnya-eu tsawrganr anr-eu tsawrhaq khawf, Ghaq par anrdzaeq lar-eu mae.

⁶ Maeqbawq yawmuiq za-euq baqda’nae, Nawr guirdeuv deuvnya-awr, Maeqbawq bif-eu tsawrhaq ghawqmya’ni jawr nar-aq, ghaqlernya taef-a.

⁷ Zaqsiq tsawrganr-aq, Aqdzawq argan-euq gharduq, Ardzaeq-aer gor-eu jeq pyeuf-eu mae. Aqyawf, lanrkhaeq-anr jawr ngae, Dawq ngaeq-eu laer khaqmae maq mrnga-a.

⁸ Yawdoer jeq mr-eu laer tov-eu tsawrhaq-anr, Aqcawq, yawdoer jeq mr-eu bawqtov yawsanr laer kur taef-a.

⁹ Yawdzawq yawgan jeq noeqdov-eu-aq, iqbax pyeuf-eu mae. Aqjaf jaf-eu tsawrhaq-aq, Aqcawq-euq gharduq nuidav davlar paq-aer ghae-eu mae.

¹⁰ Shaqzanq puqle ngae, nawr coq-ir nar-aq, Nawr nuighaq baq-eu mae.

¹¹ Shirduq-anr bi tsanrghae luf-eu tsawrhaq-anr gheudov-awr, Bisaef-eu laer gacoq gacoq-aer canluf-eu tsawrhaq-anr gheukhof-awq.

¹² Nawr heulof-aer aernar-aq, “Hawsher-eq, nga’maf garkawv heu-anr maq siqnya-aq.” Nuima-anr savhaw-eu ghaq, garkawv heu-anr maq ghovshaw nya-a laq? Nawq-euq nuima saflar-anr hawpir-eu ghaq, garkawv heu-anr maq siqnya-a lor? Aqyawf, tsawrhaqzaq nae kharmr-euq lof-aer geuxni, maq janrkhof naeq-ar laq?

¹³ Ngaq-euq zaqyo-or! Byaquir-aq, yawmuiq mirnae dzaq-awq. Byaqyav-euq lafkhoer danq-eu byaquir-aq, Nawr myeufhaw ngae yawcoer mae.

¹⁴ Zaqsiq tsawrganr-anr siqnya-eu jeq khawf, Nawq-euq nuima saflar gharduq, khoerlof-aer dur taef-a. Nawr povmawr-euq nar-aq, Maeqhu paw yadaef-eu yawduq baw-awr, Nawq nae noeqtmq taq-euq jeq maqya bi deuvtsaev dzae-ar.

¹⁵ Tsawrcawv deuq-or! Tsaq-awr dawr-eu tsawrhaq-euq jawrduq-anr, Tanrjoe joe-eu laer taq dzurzaftaq. Aqyawf-euq ghaqnaq naqduq-anr taq daeler.

¹⁶ Aqjeq mirnae aernar-aq, Tsaq-awr dawr-eu tsawrhaq-aq, Shif pov coq-ir-euq khawf par turlar taef-a. Aerkhawf, tsawrcawv deuq-aq, Shaqzanq keuvle ngae, sanqtiftif taef-a.

¹⁷ Nawq-anr muir-eu tsawrhaq coq-ir ngae, laqkhaq taqcaer, Aqyawf sanqtiftif ngae, Nawq-euq nuima ardzaeq-aer laqkhaq taqcaer.

¹⁸ Maqngeur nar-aq, Ya’we Miqyaer mawr-awr, nuima maqmuiq-aer, Aqyawf-anr nuima maqpaerni, yurpyawr-eu baw-mr.

¹⁹ Yawdoer jeq mr-eu deuq-euq baqda’nae, nuima taqlanr, Tsawrcawv-anr myavnav khawf taqnav.

²⁰ Tsawrdoer deuq-aq, Maeqhu paw daefdav lef-eu gharduq yawduq maqbaw-a, Tsawrcawv deuq-euq tsirkhmq-aq, yabi bawmiv taef-a.

²¹ Ngaq-euq zaqyo-or! Ya’we Miqyaer hawr-eu sanqpaq-anr guv-awr, Puiq-eu tsawrhaq deuq naeq-aer taq gmler.

²² Aqjeq mirnae aernar-aq, Khoerlof-aer ghae-eu tsawrhaq deuq-euq khoertav, Tiqpov taef-aer shaqzanq keuvle taef-a. Ya’we Miqyaer hawr-eu, Sanqpaq-anr nae oe-eu lavcawv-eu jeq-anr aqsur ghaq siqnya-eu la?

Tsawrganr Bif-eu Dawqdaq Nuideuq

²³ Dawqdaq heudeuq khawf, tsawrganr anr-eu tsawrhaq-euq dawq mae. Yarkhaqdar ngae, myavpyawq huiqnyir tser-eu-aq maqmuiq-a.

²⁴ Tsawrcawv-anr, “Nawr-aq, tsaq-awr dawr-eu tsawrhaq mae” laer aer-eu tsawrhaq-anr, Aqcawq yaqkhaer yaq-awr, tsawrjeuq tsawrca deuq khawf byae taef-a.

²⁵ Aerkhawf, tsawrcawv-anr ngeur-eu lof-aer maeqpar naeq-eu tsawrhaq deuq-anr, Nuikhanr shir-awr, aqyawf maf-euq khoertav muiq-eu guiqlanq keuvle taef-a.

²⁶ Tsaq-eu jeq, aerkhof naeq-eu tsawrhaq-aq, Maeqluq-anr maeqcur cur-eu gar dur-eu mae.

²⁷ Lafnyir jav-eu nawq-euq gar, laeqhmq ghaq-awr, Yawqha-euq yar mrluiv ghaq-euq mirtsa taef-aer, Nawq-euq nymr tsov-awq.

²⁸ Tiqjeq-iq maqngeur-eu gar, Dawqpae jawr-eu tsawrhaq-anr coeqler paq-aer sarkir taqkamq. Nawq-euq maeqluq nae khawf maershuir taqshuir.

²⁹ Heulof-aer taqaer, “Aqyawf, ngaq-anr janrnaeq laf-euq lof-aer, Ngar, aqyawf-anr janrkhofnaeq ma. Ngar, aqyawf nae mr-euq lof-aer geuxni, janrkhof ma.”

³⁰ Ngar, nymrgawq yawdoer tiq ghaq-euq daeyar-anr cantsaev-euq ma. Ghovshaw nya-eu jeq maqanr-eu tsawrhaq tiq ghaq-euq aqgaf yarkmr-anr khawf, cantsaev-euq ma.

³¹ Khoergar, aqgan bawduv daeftsanq taq-awr, Pafdaeq arbawq uvtaeqjir taq-euq uqtaf, Yarkmr gawqlanr taq-euq khaqlo deuq khawf, gabyavjir taq-euq mae.

³² Ngar khoergar hawmawr-awr, Yawmuiq-aer sharnoeq sharsawx-euq ma. Ngar haw ngae, maeqdawq tsovdawq za-euq ma.

³³ Tiqkhaeq yufla siq. Uicuiv yufnirgha la. Lafpyaef pyaef-awr tiqkhaerkhaeq yufla siq.

³⁴ Khoer-euq baqda’nae, irshaq shaq-eu jeq, Nawr jawr-eu gar tanrjoe lof-aer oekeuv-awr, Nym-eu jeq, nawr jawr-eu gar guirdeuv keuka bafluf-eu tsawrhaq lof-aer oekeuv taef-a.