Dawqdaq 22 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daefzir-euq Mrjeq Cankawv

¹ Smrmuiq zawr muiq-eu jeq-anr navmaqtser, Tsawrmyanr muiq-eu jeq-anr tsergeuf-awr, Pyur hawr-eu shuir-anr navmaqtser, Ghoer mr-eu jeq-anr noeqpoeq-awq.

² Tiqkawv lof-aer daeftaf luf-eu smrmuiq, Hawr-eu irshaqzaq nyiq ghaq-anr luf, Ya’we Miqyaer nae bae-euq mae.

³ Noeqsiq noeqmawr nya-eu tsawrhaq-aq, Yawcawv jeq oe nga laer hawmawr-awr caevzaf-eu mae. Aerkhawf, maqdzaw-euq zaq-aq, Maeqhu paw can’ur ghae-awr, Khaeq-eu gar yadaq-eu mae.

⁴ Nuinanq nuiyu anr-awr, Ya’we Miqyaer-anr guv-eu-aq, Daef-eu jeq hawr-eu khanqsaer za-awr, smrmuiq muiqlar-eu mae.

⁵ Birpyawv-aer ghae-eu tsawrhaq-euq garma-anr, Aqgan hawr-eu lanrju jav-awr, Yawqha-euq nuima saflar-anr, lofpir nya-eu tsawrhaq-aq, Khoerlof-aer ghae-eu garma-anr, yanrpawrnya taef-a.

⁶ Zaq can paq-aer ghae-eu garma maeqduq naeq-awq. Aqyawf arkhof lar ngae, garma heu-anr nae maqdov-ir-ar.

⁷ Smrmuiqzaq-aq, irshaqzaq-euq khoertav uvlanr-awr, Dzirdzov dav-eu tsawrhaq-aq, Parnaeq-euq ghaq-euq zaqkhav yageuf-eu mae.

⁸ Yawlaeq yawca saeq-eu tsawrhaq-aq, Nuima ghawqshaq-aer ghae-eu jeq yayaeq-awr, Aqyawf-euq nuima paer-eu gawqyoeq-aq, Gardanr maqtsoeq-eu jeq pyeuf-ir taef-a.

⁹ Nuijer jer-eu myavnuiv-aq, guiqlanq huiq-eu mae. Aqjeq mirnae aernar-aq, Aqyawf, irshaqzaq-anr aqyawf-euq kaqmur bifnaeq-eu mae.

¹⁰ Aqjaf jaf-eu tsawrhaq-anr taedzae-awq. Khoernar-aq, caedzaq-eu jeq naqler-awr, Tsawrpyaer pyaer-awr hawdoer-eu jeq khawf byov-ir taef-a.

¹¹ Nuima yawshawr-anr gaq-awr, Maeqluq guiqlanq yawdzanr byan-eu ghaq-aq, Sanqpaq, aqyawf-euq cawq pyeuf taef-a.

¹² Ya’we Miqyaer-euq myavnuiv-aq, Siqnya-eu tsawrganr jeqhmq-awr, Yawbanq yawlaeq mr-eu tsawrhaq-euq dawq lavbyov-eu mae.

¹³ Nymrgawq yawdoer tsawrhaq aer-eu, “Lafnyir paw arlaqjaqshir jawr-a! Ngar, garma-anr dov-ir nar-aq, Yabi kawfsaefdzaq mae.”

¹⁴ Maqmuiq-eu zaqmiq aqbur-euq khaqmae-aq, Naf-eu duqkhanq-anr dur-awr, Ya’we Miqyaer byae-eu tsawrhaq-aq, Khoergar ya ga’anrghae taef-a.

¹⁵ Yawdzawq yawgan jeq, zaq-euq nuima-anr paftawf taq-euq mae. Dzawpar-eu darcuir nae, garmanr kaq-eu gar taedzae nya-eu mae.

¹⁶ Smrmuiq muiqlarni, irshaqzaq-anr khavdzaq-eu tsawrhaq, Hawr-eu smrmuiq muiq-eu tsawrhaq-anr bif-eu ghaq-aq, Yawduq bawni irshaq shaq-ir taef-a.

Arpoeq Baw-eu Dawqdaq Deuq

¹⁷ Naqbawr ciqkhmr-awr, Tsawrganr anr-eu deuq-euq dawq-anr narhaq-awq. Ngaq-euq siqnya-eu tsawrganr-anr, Nuima pan-awr hageuf-awq.

¹⁸ Dawq heudeuq dawqtawvluf, Nawq-euq maeqluq-anr paftawf taq-awq. Nawr, nawq-euq lafkhoer jeqhmqtaq nar-aq, Nawq-euq gharduq nuikhanr shirlar-eu jeq pyeuf taef-a.

¹⁹ Nawr, Ya’we Miqyaer-anr bighoe-eu gharduq, Iqnan, ngar, nawq-anr maeqdawq tsovdawq bif-eu ma. Nawq-anr aerma, nawq-anr!

²⁰ Ngar, nawq-anr zawr muiq-eu maeqbawq bif-eu dawq, Hawr-eu siqnya-eu tsawrganr bofnaeq-euq maqngeur-a laq?

²¹ Heu-aq, ngar, nawq-anr yawtsaq yawdawr-euq dawq-euq yawduq bi siqnya-awr, Nawq-anr khaerghae-euq tsawrhaq-anr yawtsaq yawdawr-euq dawq, Bi aerkhof nya-eu gharduq maqngeur-a lor?

²² Irshaqzaq-anr tanrjoe taq daenaeq. Aqjeq mirnae aernar-aq, aqyawf-aq irshaq mae. Lanrkhaeq-anr shaqzanq daqluf-eu tsawrhaq-anr khawf, taqpar khaeqnaeq.

²³ Aqjeq mirnae aernar-aq, Ya’we Miqyaer, aqyawf maf-euq gharduq yarkhaq jadan naeq-awr, Aqyawf maf-anr yurgeuf naeq-euq deuq-euq daefzir-anr yur taef-a.

²⁴ Nuima paercoer-eu tsawrhaq naeq-aer cawq taqcawq, Nuima ardzaeq-aer paernya-eu tsawrhaq naeq-aer khawf taqcan.

²⁵ Maqngeur nar-aq, nawr, aqyawf-euq garma dzawgeuf-awr, Nawq-euq nuima saflar lanrju-anr pafler nya-eu baw-mr.

²⁶ Lafma daeq-awr kamq-eu tsawrhaq lof-aer taqjanr, Aqcawq-euq dzirdzov tsoeqnaeq ma laer tiqjawr-iq taqkamq.

²⁷ Nawr, aqyawf-anr dzirdzov tsoeqnaeq-eu tiqjeq-iq maqjav-eu ngeur nar-aq, Aqjeq mirnae, nawq-euq yufzar bi bafgeuf-eu laer ghae-eu le?

²⁸ Arhu, nawq-euq aqpoeq aqbawr deuq nae, Tsaqtsov taqyaf-euq mirkaq lotsov-anr taq lavjiv.

²⁹ Nawr, yawqha-euq gar yawmuiq-aer mrmuiq nya-eu tsawrhaq tiq ghaq-anr mawrluf ma laq? Aqyawf, tsawrmyanr maqdov-eu tsawrhaq-euq maeqshi maqngeur-eu, Sanqpaq-euq maeqshi yayawf taef-a.