Dawqdaq 21 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daefzir-euq Mrjeq Cankawv

¹ Sanqpaq-euq nuima-aq, Ya’we Miqyaer-euq aqlaf-euq lafkhoer, Yoerluf-eu ircuf lawrgawv-anr dur-awr, Ya’we Miqyaer khar yurpyawr mawf-eu paw ir-eu mae.

² Tsawrhaqzaq-euq garma dawqtawvluf, Yawqha-euq myavnuiv-euq gharduq yawtsaq mae. Aerkhawf, Ya’we Miqyaer-aq, nuima-anr savhaw-eu mae.

³ Ya’we Miqyaer-aq, lawr-eu jeq-anr navmaqtser, Tsaq-awr dawr-eu jeq hawr-eu dawr-awr tsaq-eu jeq mr-eu gar nuikhanr shirdzaeq-eu mae.

⁴ Nuima huiq-awr janrghae-eu myavnuiv, Hawr-eu tsawrcawv-euq tsirkhmq-aq, iqbax mae.

⁵ Yawbym bym-eu tsawrhaq-euq bawqtov-aq, Yawduq bawni jeuqle ovle-eu mae. Aerkhawf, taeqtsar khartsar-eu tsawrhaq-aq, Yawduq bawni irshaq yashaq-ir taef-a.

⁶ Jaqmyawf myawf-eu maeqlar nae, Za-euq pyurshuir myawqganq-aq, Tiqkhaeq larkhaeq-euq lafkhoer, Byov-ir nya-eu ircuf-euq safkhoeq lof-aer dur-awr, Shir-eu jeq-anr pov-eu mae.

⁷ Aqyawfmaf, dawr-awr tsaq-eu jeq, Tiqjox-aer ghaenae-iq maqmr-eu mirnae, Tsawrcawv-euq coeqler civler-eu jeq, Aqyawf maf-anr lavcawv taef-a.

⁸ Yawlaeq tsawrhaq-euq garma-aq, Birpyawv-aer ghae-eu mae. Aerkhawf, yawshawr tsawrhaq mr-eu jeq-aq yawtsaq mae.

⁹ Caecawq shar-eu zaqmiq aqbur naeq-aer, Irkanr-euq lafkhoer jawr-eu navmaqtser, Nymrmq-euq lafcoer-anr davjawr ler-eu-aq, ghaqdzaeq-eu mae.

¹⁰ Tsawrcawv-euq nuima saflar-aq, yawdoer jeq geufmawf-awr, Dawqpae jawr-eu tsawrhaq, aqyawf-euq myavnuiv-euq lafkhoer, Ghoer mr-eu jeq maqya mawr-a.

¹¹ Aqjaf jaf-eu tsawrhaq-anr khaeqnaeq ngae, Maqdzaw-euq zaq-anr bi ganrlar-eu mae. Aerkhawf, tsawrganr anr-eu tsawrhaq-anr maeqnaeq tsovnaeq ngae, Siqnya-eu tsawrganr za-eu mae.

¹² Tsaq-awr dawr-eu Miqyaer-aq, Tsawrganr zmq-awr tsawrcawv-euq nymrkhanq-euq lafkhoer, Pyeufluf-eu jeq sharsawx-awr, Aqyawf maf-euq yawdoer yawcawv-euq baqda’nae daeqcoqnaeq taef-a.

¹³ Irshaqzaq-euq gurdawq-anr naqbawr daeqkaq-eu tsawrhaq-aq, Aqyawf gur ngae, aqcawq-anr maq gaqler-ar.

¹⁴ Yawzaf zaf-aer lafsawq bif-eu-aq, Nuipaer bishuf-ir nya-awr, Narkhan paw lafnmf nmf-eu jeq-aq, Nuima yawkhav-aer paer-eu jeq bishuf-ir nya-eu mae.

¹⁵ Tsaq-awr dawr-eu tsawrhaq-aq, Dawr-awr tsaq-eu jeq mr-eu gar laqkhaq caer-eu mae. Aerkhawf, yawlaeq yawca jeq mr-eu deuq-euq khoertav, Cawv-ir-eu jeq keuvle taef-a.

¹⁶ Ghovshaw nya-eu jeq-euq garma-anr nae, Canbyov ghae-euq tsawrhaq-aq, Shir-euq deuq uiqler duq-anr ya’naq-ir taef-a.

¹⁷ Caergha-eu gar gaq-eu tsawrhaq-aq, Irshaq shaq-ir-awr, Jirbaq hawr-eu tsir-anr gaq-eu tsawrhaq-aq, Smrmuiq maq muiqlar nya-a.

¹⁸ Tsawrcawv-aq, tsaq-awr dawr-eu tsawrhaq-anr, Kakhof-eu arpoeq pyeuf-awr, Yawbanq yawlaeq mr-eu tsawrhaq-aq, Dawrcoeni ghae-eu tsawrhaq-anr, Kakhof-eu arpoeq yapyeuf taef-a.

¹⁹ Nuima paercoer-awr cae-eu taef-aer pyawq-eu zaqmiq aqbur naeq-aer jawr-eu navmaqtser, Bawrtsanq bawrdanr-anr jawr-eu-aq, muiqdzaeq-eu mae.

²⁰ Tsawrganr anr-eu tsawrhaq-euq jawrduq-anr, Yaler paq-aer ghae-eu myawqganq hawr-eu tsir jav-eu mae. Aerkhawf, aqdzawq argan-aq, dzaqbyov jir-eu mae.

²¹ Tsaq-awr dawr-eu jeq hawr-eu, Ghawqshaq gaq-eu jeq-anr cantae-eu tsawrhaq-aq, Daef-eu jeq, tsaq-awr dawr-eu jeq hawr-eu khanqsaer ya’mawr taef-a.

²² Tsawrganr anr-eu tsawrhaq-aq, Ghaq khav-eu tsawrhaq-euq meuq-anr davur lef-awr, Aqyawf maf-euq ghoeduq pyeuf-eu lofpir duq-anr deuvbyav taef-a.

²³ Yawqha-euq khaqmae hawr-eu, Maeqlar-anr hawpir nya-eu tsawrhaq-aq, Yawqha-euq nuima saflar-anr hawpir-awr, Shaqzanq-anr nae bidzeur-ir nya taef-a.

²⁴ Nuima huiq-awr janrghae-eu tsawrhaq-euq tsawrmyanr-aq, “Aqjaf jaf-eu ghaq” laer mae. Aqyawf, nuima huiq-eu lafkhoer, Janrghae-eu jeq mrdov laf-eu mae.

²⁵ Nymrgawq yawdoer tsawrhaq-aq, Yawqha geufmawf-eu jeq nae yabi saef taef-a. Aqjeq mirnae aernar-aq, Aqyawf, yawqha-euq aqlaf nae, Tiqjox-aer ghaenae-iq maq mrmawf-a.

²⁶ Nan’ga-i aqyawf geufmawf-eu yawlof maqbaw-a. Aerkhawf, tsaq-awr dawr-eu tsawrhaq-aq, Tsawrtsir maqtsirni bifdov ghae-eu mae.

²⁷ Tsawrcawv nae lawr-euq jeq-aq, Nuidav davlar paq-aer ghae-eu jeq pyeuf-awr, Nuima doer-eu lafkhoer dirdaq-aer yurlaf-euq jeq ngeurdzaeq, Arnavni byaelar paq-aer ghae-eu nga.

²⁸ Maqtsaq maqdawr-eu tsawrkaq-aq, yacawv-ir taef-a. Aerkhawf, aqyawf-anr narhaq-eu tsawrhaq-aq, Ngaeqsaq-eu maqbaw-ar.

²⁹ Tsawrcawv-aq, yawqha-euq narkhawr lavghanr-eu mae. Aerkhawf, dawrcoerni ghae-eu tsawrhaq-aq, Yawqha-euq garma lavzif-eu mae.

³⁰ Ya’we Miqyaer-anr lavtsoeq nya-eu, zaqsiq tsawrganr, Ghovshaw nya-eu jeq hawr-eu maeqbawq maqjav-a.

³¹ Guirdeuv deuv-eu arnan-euq gharduq, Manqdeuq laeqhmqtaq nya-eu mae. Aerkhawf, bi ghaqler-eu ghaq-aq, Ya’we Miqyaer mae.