Dawqdaq 20 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daefzir-euq Mrjeq Cankawv

¹ Jirbaq-aq, aqjaf bi dovlar-awr, Dawryaef-eu jeq-aq, ngaeqdzaq-eu jeq bi dovlar-eu mae. Tsawrganr maqanr-eu tsawrhaq-aq, Jirbaq nae bi sheuqbanq ghae-eu mae.

² Sanqpaq nuima paerlar nar-aq, Joeqluf-eu arlaqjaqshir-anr dur-eu mae. Aqyawf-anr nuima khar lavpaer-eu tsawrhaq-aq, Yawqha-euq daefzir-anr yawqha iqbax mr-eu mae.

³ Iqdaeq iqcae-anr maqbi keuvlerni, Lavnaq nya-eu tsawrhaq-aq, taqhuiq-eu jeq za taef-a. Aerkhawf, aqdzawq argan aqgeu ghaq maqkaq, Caedanqbae nya-eu mae.

⁴ Nymrgawq yawdoer-aq, tsaeqyamq-anr maqtsaeq-aer, Yaeqyamq-anr tiqjeq-iq dzaq-eu maqjav-aer, Sharshar-aer yashaq-eu mae.

⁵ Tsawrhaq-euq nuima-euq lafkhoer anr-eu maeqbawq, Ircuf tmqnaf-anr dur-eu khawf, Ghovshaw nya-eu tsawrhaq gheudovlaf nya-eu mae.

⁶ Tsawrhaq myaqni-aq, yawqha yawmuiq ma laer taef-aer aer-eu mae. Aerkhawf, sarjax zif-eu tsawrhaq-anr aqsur ghaq povmawr nya-eu?

⁷ Dawrcoeni daef-eu tsaq-awr dawr-eu tsawrhaq-aq, Aqyawf-euq maeqnan jawryaf-eu zaqdeuq-anr, Guiqlanq pyeuf-eu mae.

⁸ Yarkhaq dar-eu nuirmanq-euq khoertav nuir-eu sanqpaq, Aqyawf-euq myavnuiv nae yawdoer jeq dawqtawv luf-anr taebyav jir-eu mae.

⁹ “Ngar, ngaq-euq nuima lavshawr jir-euq ma. Ngar-aq, iqbax maqanrni shawrjaevni ghae-eu ma” laer aqsur ghaq aernya nmr-mq?

¹⁰ Maqbyan-eu darsav losiq hawr-eu maqtsaq-eu kuqpaeq heu nyiq jeq luf-anr, Ya’we Miqyaer nuidav dav-eu mae.

¹¹ Zaq pyeuf-eu law-awr khawf, aqyawf aqjox-aer ghae-eu nga laer, Mrdov shardov laf-eu gar nae siqlar-eu mae. Aqyawf mr-eu jeq shawr-awr tsaq nga laq laer siqlar-eu mae.

¹² Gaqnya-eu naqbawr hawr-eu mawrnya-eu myavnuiv, Heu nyiq jeq luf, Ya’we Miqyaer nae bae-euq mae.

¹³ Yuf-eu gar taqgaq, irshaq shaq-ir-eu baw-mr. Myavnuiv mrbyae-awq, nawr tiqdaev dzaq-eu jeq javlar taef-a.

¹⁴ Zeur-eu tsawrhaq gur-eu, “Doer-eu laer-aq, doer-eu laer-aq.” Aerkhawf, zeurza-awr irdzeur-euq nar-aq, khanqsaer jaev-eu mae.

¹⁵ Shuir khawf jav-awr, khaqlo saer khawf ghawqmya’ni jav-eu mae. Aerkhawf, siqnya-eu tsawrganr anr-eu maeqluq-aq, Poeq-eu saer pyeuf-eu mae.

¹⁶ Boermiq siqkhaq-anr kamqnaeq-eu tsawrhaq-euq maeqtsoeq yurtaq-awr, Maqsiq maqsux-eu tsawrhaq-anr, Kamqnaeq-eu tsawrhaq-euq kamq-eu myawqganq lof-aer nyaeftaeq taq-awq.

¹⁷ Maershuir shuirza-euq dzaqdzaq dawrdawr-aq, Coerovni ghae-eu mae. Aerkhawf, arsaq saqlar ngae-aq, Aqyawf-euq khaqmae kharshuif khaqlo byan taef-a.

¹⁸ Maeqbawq-euq baqda’nae bawqtov dovlar-eu mae. Maeqbawq yawmuiq za-awr nae taef-aer guirdeuv deuv-awq.

¹⁹ Dawqdoer jaja-aer can-eu tsawrhaq-aq, Zaftaq-euq jeq jakhawq-eu mae. Khoermirnae, yawqha-euq maeqluq nae, Japoeq-eu janrgeuf-eu tsawrhaq-anr cawq taqcawq.

²⁰ Yawqha-euq aqma aqda-anr yaqkhaer yaq-eu tsawrhaq-aq, Zanrtsuini ghae-eu yamq-anr, aqyawf-euq tsirkhmq miv-ir taef-a.

²¹ Ardanqbae ngae, yaw’awq-aer za-euq jeqbir-aq, Arsaq saqlar ngae, guiqlanq maqpyeuf-a.

²² Heulof-aer taqaer, “Ngar yawdoer jeq-anr lafpov povkhof ma.” Ya’we Miqyaer-anr dawq-awq, Aqyawf, nawq-anr bibuq-ir taef-a.

²³ Ya’we Miqyaer, maqbyan-eu darsav losiq-anr nuidav dav-eu mae. Maqtsaq-eu pavyawq khawf maqmuiq-a.

²⁴ Tsawrhaqzaq kuirtof kharciq-eu, Ya’we Miqyaer navni jav-eu mae. Khoerlof-aer ngeur nar-aq, Tsawrhaqzaq, yawha-euq garma ghovshaw nya-eu aqsur ghaq jawr-eu la?

²⁵ Arsaq saqlar ngae, maqkamq lawnmr-aq, ghaq mir-a laer noeqlar paq-aer, Yawshawr jeq lof-aer lawrnaeq ma laer yawkawr-aer aer-eu-aq, Yawqhar yawqha lanrju khmr-eu jeq pyeuf-eu mae.

²⁶ Tsawrganr byan-eu sanqpaq-aq, Tsawrcawv-anr zardzae-awr, Aqyawf maf-anr lolaeq-euq arbeuv nae laeqnaeq taef-a.

²⁷ Tsawrhaqzaq-euq saflar-aq, Ya’we Miqyaer-euq tsirkhmq pyeuf-awr, Tsawrhaq-euq lafkhoer kharanr-eu jeq-anr povtser haw-eu mae.

²⁸ Ghawqshaq gaq-eu jeq hawr-eu, Yawtsaq yawdawr jeq, sanqpaq-anr hawpir-awr, Ghawqshaq gaq-eu jeq-euq baqda’nae, Aqyawf-euq nuirmanq zifnya-eu mae.

²⁹ Zaqguq deuq-euq ghaq-aq, Aqyawf maf-euq khanqsaer mae. Tsawrmawq deuq-euq uqpyur-aq, Aqyawf maf-euq jaqlaq mae.

³⁰ Diq-awr nae narler-euq khoer-aq, Yawdoer jeq-anr tsiqshawr-awr, Juifnaeq-euq baqda’nae, Lafkhoer paw anr-eu jeq shawrlar-eu mae.