Dawqdaq 19 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Daefzir-euq Mrjeq Cankawv

¹ Dawrcoeni daef-eu irshaqzaq-aq, Aqdzawq argan gan-awr dawq birpyawv-aer ngaeq-eu tsawrhaq navmaqtser, muiqdzaeq-eu mae.

² Siqnya-eu tsawrganr maqanr-eu nuima saflar-aq maqmuiq-a. Aqkuir kuirtof ciqkawr-euq khawf, iqbax mrnya-eu mae.

³ Yawqha-euq yawdzawq yawgan-euq baqda’nae, Yawqha-euq garma nanrpov-aer pyeuflar ngae, Aqyawf, Ya’we Miqyaer-anr nuima paer-eu mae.

⁴ Smrmuiqzaq-aq, cawq myaqlar-eu mae. Aerkhawf, irshaqzaq-aq, yawghoer ma laer aer-eu cawq khawf ghawq-ir-eu mae.

⁵ Maqtsaq maqdawr-eu tsawrkaq-aq, dar-eu gar maqya daq-aer maqdzeur-ir nya-ar. Jaqmyawf myawf-eu tsawrhaq khawf, maq caevdzeur nya-ar.

⁶ Tsawrhaq ghawqmya’ni, tsawrhuiq tsawrma-anr ya yur-awr, Lafsawq bif-eu tsawrhaq-anr, yawqghaq navluf cawq cawqmawf-eu mae.

⁷ Irshaqzaq-anr aqyawf-euq maernmr dawqtawvluf khawf, byae-eu ngeur nar-aq, Aqyawf-euq cawqdeuq ngeurdzaeq, armanni kaq-eu gar caevbyov-eu paq nga? Aqyawf tanqshar-eu dawq, ngaeqngaeq-aer cantae-eu khawf, Aqyawfmaf, aqyawf-anr myavhaw maq cawqnaeq-a.

⁸ Zaqsiq tsawrganr pov-eu tsawrhaq-aq, Yawqha-euq nuima saflar-anr gaq-awr, Ghovshaw nya-eu jeq-anr mrcaw-eu tsawrhaq-aq, Yawmuiq jeq ya povmawr taef-a.

⁹ Maqtsaq maqdawr-eu tsawrkaq-aq, dar-eu gar maqya daq-aer maqdzeur-ir nya-ar. Jaqmyawf myawf-eu tsawrhaq khawf yacawv-ir taef-a.

¹⁰ Aqdzawq argan, daefdzaq-eu tsawrhaq lof-aer daef-eu maqgeux-eu ngeur nar-aq; Zaqkhav, dzoeqda deuq-euq khoertav uvlanr-eu ngeurdzaeq maqtsaq-a.

¹¹ Noeqdanr doe-eu tsawrhaq-aq, Nuima paerlar-eu maqkawr-aer, Aqcawq-euq yawbanq yawlaeq hawdzeur nya-eu khoer-aq, Aqyawf-euq khanqsaer mae.

¹² Sanqpaq nuima paerlar nar-aq, Joeqluf-eu arlaqjaqshir-anr dur-eu mae. Aerkhawf, aqyawf-euq ghoer mr-eu jeq-aq, Yarmof-euq khoertav gadav le-euq ceuq-anr dur-eu mae.

¹³ Aqdzawq argan gan-eu zaqyo-aq, Yawqha-euq aqda-anr lavcawv-awr, Caecawq shar-eu zaqmiqzaq-aq, Maq tsirlerni ircuf irdzav dzav-eu gar dur-eu mae.

¹⁴ Pyurshuir myawqganq hawr-eu nymr-aq, Aqda-euq jeqbir mae. Aerkhawf, noeqdanr doe-eu zaqmiqzaq-aq, Ya’we Miqyaer-anr nae oe-euq mae.

¹⁵ Yawdoer doer-eu tsawrhaq-aq, yufdaev-eu maqbaw-aer, Nymrgawq gawq-eu tsawrhaq-aq, ya’maef taef-a.

¹⁶ Zanrdawq khofdawq-anr daefcaw-eu tsawrhaq-aq, Yawqha-euq daefzir-anr hawpirnya taef-a. Aerkhawf, yawqha-euq garma-anr hawdoer-eu tsawrhaq-aq, yashir taef-a.

¹⁷ Irshaqzaq-anr ghawqshaq gaq-eu tsawrhaq-aq, Ya’we Miqyaer-anr ngaqnaeq-eu jeq pyeuf-eu mae. Aqyawf nae mr-euq jeq-anr, Ya’we Miqyaer tsoeqkhofnaeq taef-a.

¹⁸ Noeqtmq-eu jeq jav ngae, Yawqha-euq zaq-anr maeqpar tsovpar-awq. Zaq cawv-ir paq-aer nawq-euq nuima ghaqbaf taqbaf.

¹⁹ Nuima yawkhav-aer paercoer-eu tsawrhaq-aq, Khaeq-awr khav-eu gar yadaq taef-a. Nawr, aqyawf-anr cawba le laer nar-aq, Tiqpov sair tiqpov ya cawba naeq-eu mae.

²⁰ Maeqbawq-anr narhaq-awr, Maeqdawq tsovdawq-anr hageuf-awq. Khoerlof-aer nar-aq, aqkar tiqnan nawr tsawrganr anrlar taef-a.

²¹ Tsawrhaqzaq-euq nuima-euq lafkhoer. Bawqtov ghawqmya’ni anr-eu law-awr khawf, Ya’we Miqyaer-euq maeqbawq taef-aer zifnya-eu mae.

²² Ghawqshaq gaq-eu jeq-aq, Tsawrhaqzaq tiq ghaq-euq lafkhoer nae, Aqcawq geufmawf dzaeqdzaeq-eu jeq pyeuf-eu mae. Irshaqzaq pyeuf-eu-aq, Jaqmyawf myawf-eu tsawrhaq pyeuf-eu navmaqtser muiqdzaeq-eu mae.

²³ Ya’we Miqyaer-anr guv-eu jeq-aq, Daef-eu jeq-anr sheuqghae lef-awr, Yawdoer jeq maqya mawr-aer, Nuima tmqjawvni yadaef taef-a.

²⁴ Nymrgawq yawdoer tsawrhaq-aq, Yawqha-euq aqlaf, hawqghawv-anr cawqanr-euq gar nae, Yawqha-euq khaqmae-anr dawvluv-eu aqlaf maq cawqkhof nanr-a.

²⁵ Aqjaf jaf-eu tsawrhaq-anr diq-awq, Maqdzaw-euq zaq yanrnyalar taef-a. Ghovshaw nya-eu tsawrhaq-anr maeqpar-awq, Aqyawf siqnya-eu tsawrganr-anr tserpav birpav nyalar taef-a.

²⁶ Yawqha-euq aqda-anr yaeqbawq-aer ghaenaeq-awr, Aqma-anr taedzae-eu zaqyo-aq, Shafdawr paq-aer ghae-eu jeq mr-awr, Daqga-eu jeq bi keuvle-eu mae.

²⁷ Ngaq-euq zaqyo-or! Maeqdawq tsovdawq-anr maq narhaqni byaer nar-aq, Nawr siqnya-eu tsawrganr-euq dawq-anr nae, Garbanq banq-ir taef-a.

²⁸ Doertsaev taq-euq tsawrkaq-aq, Dawr-awr tsaq-eu jeq-anr aqjaf jaf-awr, Tsawrcawv-euq khaqmae-aq, yawlaeq yawca myeufanr-eu mae.

²⁹ Aqjaf jaf-eu tsawrhaq-anr, Yarkhaq dar-eu laer laeqhmq taq-awr, Aqdzawq argan deuq-euq narkhan, Diq-eu laer laeqhmq taq-euq mae.