Dawqdaq 14 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Tsawrganr anr-eu zaqmiq aqbur-aq, Yawqha-euq nymr tsovdov laf-eu mae. Aerkhawf, aqbyanq deuq-aq, aqyawf-euq aqlaf nae, Yawqha-euq nymr-anr gheupyav-eu mae.

² Ya’we Miqyaer-anr guv-eu tsawrhaq-aq, Dawrcoeni daef-eu mae. Aerkhawf, Miqyaer-anr hawdoer-eu tsawrhaq-aq, Yawqha-euq garma biryawf-aer can-eu mae.

³ Aqdzawq argan-euq khaqmae-euq lafkhoer, Nuima huiq-eu darcuir anrluf-eu mae. Aerkhawf, tsawrganr anr-eu tsawrhaq-euq maeqluq-aq, Aqyawf maf-anr hawpirnaeq taef-a.

⁴ Mawrner maqjawr-eu mawrner kuv-aq, yawshawr mae. Aerkhawf, mawrner-euq ghaq baqda’nae, Dzaqla ghovcaer ghawqmya’ni za’myaq dzaeqlar-eu mae.

⁵ Sarjax zif-eu tsawrkaq-aq, jaqmyawf maqmyawf-a. Aerkhawf, maqtsaq maqdawr-eu tsawrkaq-aq, Aqjeq ngaeqlar khawf jaqmyawf mae.

⁶ Aqjaf jaf-eu tsawrhaq-aq, zaqsiq tsawrganr pov khawf maq povmawr nya-a. Aerkhawf, ghovshaw nya-eu tsawrhaq-aq, Siqnya-eu tsawrganr za-eu yaw’awq mae.

⁷ Aqdzawq argan-euq maeqshi nae can’ghawq-awq. Aqjeq mirnae aernar-aq, nawr, aqyawf-euq maeqluq-anr nae, Siqnya-eu tsawrganr anr-eu jeq maqya hawdov-ar.

⁸ Noeqsiq noeqmawr nya-eu tsawrhaq-euq zaqsiq tsawrganr-aq, Yawqha-euq garma bi ghovshaw-eu gharduq mae. Aerkhawf, aqdzawq argan-euq yawdzawq yawgan-aq, Jaqmyawf maershuir mae.

⁹ Aqdzawq argan-aq, iqbax-anr aqjaf jafdoer-eu mae. Aerkhawf, dawrcoeni ghae-eu tsawrhaq-aq, Aqcawq nuima tsaq-eu gar laqkhaq caer-eu mae.

¹⁰ Nuima-aq, yawqha-euq khaqjawfni ghae-eu nuijav siqnya-awr, Yawqha laqkhaqcaer ngae, maqsiq maqsux-eu tsawrhaq, Laqkhaq maqbi cawcaer lar-a.

¹¹ Tsawrcawv-euq nymr-aq, yacoq yapyav-ir-eu mae. Aerkhawf, dawrcoeni ghae-eu tsawrhaq-euq saeqghawv-aq, Muiqlar sanrlar taef-a.

¹² Tsawrhaqzaq-euq gharduq, tsaq-eu gar dur-eu garma tiq kanr jav-eu mae. Aerkhawf, arsaqsaq ngae-aq, shir-eu gar saqler-eu garma mae.

¹³ Uir-eu lafkhoer khawf, ghawqshar shaq-aer ghaenya-awr, Lurgha caergha-eu jeq saq ngae, nuima cawvnya-eu mae.

¹⁴ Nuima-euq lafkhoer jan-eu jeq byaerdzae-euq tsawrhaq-aq, Yawqha-euq garma-anr nuikhanr shir-awr, Tsawrmuiq-aq, yawqha-euq garma-anr, Nuima tmqjawvni ghae taef-a.

¹⁵ Maqdzaw-euq zaq-aq, yawqdawq navluf-anr jan-eu mae. Aerkhawf, noeqsiq noeqmawr nya-eu tsawrhaq-aq, Yawqha-euq kuirtof ciq-eu garkawv sharnoeq sharsawx-eu mae.

¹⁶ Tsawrganr anr-eu tsawrhaq-aq, guv-eu siqnya-awr yawdoer jeq-anr jawdzeur-eu mae. Aerkhawf, aqdzawq argan-aq, yawqhar yawqha yawduq baw-awr maqyanr-a.

¹⁷ Nuima paer-eu yawkawr tsawrhaq-aq, yawdzawq yawgan jeq mrdov laf-awr, Yawdoer jeq tov-eu tsawrhaq-anr-aq, aqcawq byae-eu mae.

¹⁸ Maqdzaw-euq zaq-anr yawdzawq yawgan jeq of taef-a. Aerkhawf, noeqsiq noeqmawr nya-eu tsawrhaq-aq, Uqkhov lof-aer siqnya-eu tsawrganr yakhov taef-a.

¹⁹ Tsawrdoer-aq, tsawrmuiq-euq maeqshi ya awbyav-awr, Tsawrcawv-aq, tsaq-awr dawr-eu tsawrhaq-euq kmrkhaeq-anr ya awbyav taef-a.

²⁰ Irshaqzaq-anr-aq, aqyawf-euq dawqpae jawr-eu tsawrhaq khawf byae-eu mae. Aerkhawf, smrmuiqzaq-aq, cawq ghawqmya’ni jawr-eu mae.

²¹ Yawqha-euq dawqpae jawr-eu tsawrhaq-anr, Hawdoer-eu tsawrhaq-aq, iqbax mr-euq mae. Aerkhawf, irshaqzaq-anr ghawqshaq gaq-eu tsawrhaq-aq, guiqlanqhuiq taef-a.

²² Yawdoer jeq tov-eu tsawrhaq garbanq banq-ir-euq maqngeur nga laq? Aerkhawf, yawmuiq jeq tov-eu tsawrhaq-aq, Ghawqshaq gaq-eu jeq hawr-eu, Yawtsaq yawdawr jeq ya’mawr taef-a.

²³ Laejae-awr kharmr-euq jeq jirjeuq baw-eu mae. Aerkhawf, maeqlawf-aq, irshaq bishaq-ir-eu mae.

²⁴ Smrmuiq muiq-eu jeq-aq, tsawrganr anr-eu deuq-euq shuir uqkhov mae. Aerkhawf, aqdzawq argan-euq yawdzawq yawgan-aq, Yawdzawq yawgan jeq bi dovlar-eu mae.

²⁵ Dawrcoerni ngaeq-eu tsawrkaq-aq, Aqcawq-euq daefzir-anr bibuq-ir nya-eu mae. Aerkhawf, jaqmyawf ngaeq-eu tsawrkaq-aq, maershuir mae.

²⁶ Ya’we Miqyaer-anr guv-eu jeq-euq lafkhoer, Tsawrhaq tiq ghaq, zifdanni ghae-eu yawduq baw-eu jeq jav-awr, Aqyawf-euq zaqdeuq caevzafkhar za-eu mae.

²⁷ Ya’we Miqyaer-anr guv-eu jeq-aq, Daef-eu jeq bif-eu cuq pyeuf-awr, Shir-eu lanrju-anr nae garjaw sheuqjaw nya-eu mae.

²⁸ Tsawrhaq myaq-eu baqda’nae, sanqpaq khanqsaer za-eu mae. Aerkhawf, tsawrhaq maqmyaq nar-aq, dzoeqda yacoq-ir taef-a.

²⁹ Zawr-aer ghovshaw nya-eu tsawrhaq-aq, Nuima paerlar-eu maqkawr-a. Aerkhawf, nuima suq-eu tsawrhaq-aq, Yawdzawq yawgan-anr taqhuiq-eu mae.

³⁰ Nuima muiq-eu-aq, shiqshaq-anr daef-eu jeq bif-eu mae. Aerkhawf, myavnav nav-eu jeq-aq, Shaqyoeq-anr bipeuq-ir-eu mae.

³¹ Irshaqzaq-anr khaeq-eu tsawrhaq-aq, Aqyawf-anr bae-euq ghaq-anr hawdoer-eu jeq pyeuf-eu mae. Aerkhawf, yawshaqzaq-anr ghawqshaq gaq-eu-aq, Aqyawf-anr taqhuiq-eu jeq pyeuf-eu mae.

³² Tsawrcawv-aq, yawqha-euq yawdoer-euq baqda’nae, Yabi taedzae-eu mae. Aerkhawf, tsaq-awr dawr-eu tsawrhaq-aq, Shir ngae khawf caevzafkhar za-eu mae.

³³ Zaqsiq tsawrganr-aq, ghovshaw nya-eu jeq anr-eu tsawrhaq-euq nuima-euq lafkhoer javluf-eu mae. Aerkhawf, aqdzawq argan deuq-euq nuima-euq lafkhoer, aqjeq anr-eu la laer bisiq laf-eu mae.

³⁴ Tsaq-awr dawr-eu jeq-aq, tsawrjeuq tsawrca-anr ciqgor-eu mae. Aerkhawf, iqbax-aq, mirkhanqzaq-euq daqga-eu jeq pyeuf-eu mae.

³⁵ Tsawrganr anr-eu lafkhoer mr-eu kuirlaf-anr sanqpaq ghoer mr-eu mae. Aerkhawf, daqga paq-aer ghae-eu jeq mrdov laf-eu tsawrhaq-euq khoertav, Aqyawf-euq nuima dav-eu jeq keuvle taef-a.