Dawqdaq 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Tsawrmuiq, Tsawrdoer Beugar-eu

¹ Zaqyo yawganr-aq, yawqha-euq aqda-euq maeqdawq-anr narhaq-eu mae. Aerkhawf, aqjaf jaf-eu tsawrhaq-aq, maeqpar-eu gar maq narhaq-a.

² Tsawrhaq tiq ghaq, yawqha-euq khaqmae-euq arsiq-euq baqda’nae yawmuiq jeq yadzaq taef-a. Aerkhawf, sarjax maqzif-eu tsawrhaq-euq nuima saflar-aq, Coeqler deuqler-eu jeq-anr taef-aer nuikhanr jav-eu mae.

³ Yawqha-euq khaqmae-anr lofpir nya-eu tsawrhaq-aq, Yawqha-euq daefzir-anr bosav nya-eu mae. Aerkhawf, yawqha-euq maeqluq ghawqloeni mrnga taq-euq tsawrhaq-aq, yacawv-ir-eu mae.

⁴ Nymrgawq yawdoer tsawrhaq-euq nuima saflar-aq, Geufmawf-eu khawf tiqjeq-iq maqza-ar. Aerkhawf, yawbym tiq ghaq-euq nuima saflar-aq, Tiqbyan tiqlof nuikhanr yashir taef-a.

⁵ Tsaq-awr dawr-eu tsawrhaq-aq, Jaqmyawf myawf-eu gar byae-eu mae. Aerkhawf, tsawrcawv-aq, nuidav davlar paq-aer ghae-awr, Shafdawrlar paq-aer ghae-eu mae.

⁶ Aerkhar maqza-eu garma-anr, Can-eu tsawrhaq-anr tsaq-awr dawr-eu jeq lofpir taef-a. Aerkhawf, yawcawv jeq-aq, iqbaxzaq-anr gheucoq taef-a.

⁷ Tsawrhaq tiqghaq nav-aq, Smrmuiq janrgeuf-eu khawf tiqjeq-iq maqjav-a. Tiqghaq nav-aq, irshaq janrgeuf-eu khawf, Smrmuiqmuiq duidui-eu mae.

⁸ Tsawrhaq tiq ghaq-euq nuima saflar-anr kakhof-eu arpoeq-aq, Aqyawf-euq pyurshuir myawqganq mae. Aerkhawf, irshaqzaq-aq, guvtsiq nyaeflar-eu gar maqya gaq-ar.

⁹ Tsaq-awr dawr-eu tsawrhaq-euq yawshaef-aq, laqkhaq bi caerlar-eu mae. Aerkhawf, tsawrcawv-euq tsirkhmq-aq ya’miv-ir taef-a.

¹⁰ Nuima huiq-eu jeq-aq, iqdaeq iqcae taef-aer bi dovlar-eu mae. Aerkhawf, maeqbawq bif-eu gar hageuf-eu tsawrhaq-aq, Zaqsiq tsawrganr za-eu mae.

¹¹ Maqtsaq maqdawr-eu lafkhoer lavza-euq, Pyurshuir myawqganq-aq, teq-ir cuiv-ir-eu mae. Aerkhawf, ghaq shar-awr mrjav-euq jeq-aq, Lanqlar myaqlar-eu mae.

¹² Noeqtmq-eu jeq bi gheunaq ngae, nuima-anr narlar-eu mae. Aerkhawf, geufmawf-eu jeq za-eu-aq, Daef-eu jeq bif-eu arbawr pyeuf-eu mae.

¹³ Yaerdawq-anr hawdoer-eu tsawrhaq-aq, yacawv-ir-eu mae. Aerkhawf, zanrdawq khofdawq-anr guv-eu tsawrhaq-aq, lafsawq za-eu mae.

¹⁴ Tsawrganr anr-eu deuq-euq zanrdawq-aq, Daef-eu jeq bif-eu cuq-anr dur-awr, Shir-eu lanrju-anr nae sheuqpyawr nya-eu mae.

¹⁵ Yawmuiq-aer ghovshaw nya-eu baqda’nae, ghoer mr-eu jeq za-eu mae. Aerkhawf, sarjax maqzif-eu tsawrhaq-euq garma-aq yawshaq mae.

¹⁶ Noeqsiq noeqmawr nya-eu yawqghaq navluf, Siqnya-eu tsawrganr anr-eu lof-aer mr-eu mae. Aerkhawf, aqdzawq argan-aq, Yawqha-euq yawdzawq yawgan jakhawq-eu mae.

¹⁷ Ghaqzaq ghaqkhaer yawcawv-aq, shaqzanq-anr ga’anrghae taef-a. Aerkhawf, sarjax zif-eu danzar-aq, lavsavtaq nya-eu mae.

¹⁸ Maeqpar tsovpar-eu gar maq hageuf-eu tsawrhaq-anr, Irshaq shaq-eu jeq hawr-eu daqga-eu jeq keuvle taef-a. Aerkhawf, maeqpar-eu gar narhaq-eu tsawrhaq-aq, Taqhuiq-eu jeq za taef-a.

¹⁹ Yawqha geufmawf-eu lof-aer pyeufler-euq-aq, Nuima saflar-anr coerovni ghae-eu mae. Aerkhawf, aqdzawq argan deuq-euq gharduq-aq, Yawdoer jeq-anr byaer-eu khoer-aq, Nuidav davlar paq-aer ghae-eu jeq pyeuf-eu mae.

²⁰ Tsawrganr anr-eu deuq naeq-aer can-eu tsawrhaq-aq, tsawrganr anrlar-eu mae. Aerkhawf, aqdzawq argan deuq-euq cawq-aq, yacawv-ir taef-a.

²¹ Iqbaxzaq-euq maeqnan yawdoer jeq taeluf-eu mae. Aerkhawf, tsaq-awr dawr-eu tsawrhaq-aq, yawmuiq jeq za taef-a.

²² Tsawrmuiq-aq, yawqha-euq oeqpaq oeqma deuq-anr jeqbir taqyaf nya-eu mae. Aerkhawf, iqbaxzaq-euq pyurshuir myawqganq-aq, Tsaq-awr dawr-eu tsawrhaq-euq gharduq, jeqhmq taq-euq mae.

²³ Maq tsaeqtaq-euq irshaqzaq-euq mirtsaq-anr, Dzaq-eu jeq ghawqmya’ni zale-eu mae. Aerkhawf, maqtsaq maqdawr-eu jeq-euq baqda’nae, Dzaq-eu jeq yabi yavbyovjir taef-a.

²⁴ Darcuir maqzmq-eu tsawrhaq-aq, Yawqha-euq zaq-anr byae-eu mae. Aerkhawf, yawqha-euq zaq-anr gaq-eu tsawrhaq-aq, Maeqpar tsovpar-eu yawbym mae.

²⁵ Tsaq-awr dawr-eu tsawrhaq-aq, Aqyawf-euq nuikhanr tiqshir yadzaq taef-a. Aerkhawf, tsawrcawv-euq uqmav-aq, Maefmaef-aer yashaq taef-a.