2 Tiˆmoˇseˬ 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Arsaq Saq-eu Aryamq-euq Tsawrhaq

¹ Arsaqsaq ngae, shaqdui zanq duidui-eu aryamq keuvle taef-a laer siqnya-awq.

² Khoerngae yamq-anr tsawrhaqzaq heulof-aer pyeuflar taef-a. Yawqha-euq gharduq taef-aer sharnoeq-eu, pyurshuir-anr maerjuir juir-eu, janrghae-eu, nuima huiq-eu, yaeqbawq saerlu-aer ngaeq-eu, aqma aqda-euq dawq maq narhaq-eu, guiqlanq-anr maq noeqmawr-eu, maqshawr-eu,

³ nuigaq maqanr-eu, iqbax maqpyaeq-eu, jabu jadoer-eu, yawqha-euq nuima-anr maq ghaqler-eu, dof duidui-eu, yawmuiq jeq-anr muir-eu,

⁴ yawqha-euq cawq-anr anqdzaq-eu, kharnoeq khar lovlar-eu jeq mr-eu, nuima huiq-eu, Miqyaer-anr maqgaq-aer lurgha caergha-eu jeq-anr gaq-eu tsawrhaq pyeuflar taef-a.

⁵ Aqyawfmaf, Miqyaer-anr yawzeu baw-eu janrgeuf-eu khawf, heu-euq baoq-anr maq hageuf-a. Khoerlof-aer ghae-eu tsawrhaq-anr garjaw jaw-awq.

⁶ Aqyawf maf-euq lafkhoer tiqpavnav deuq-aq, aqcawq-euq nymr-anr urkhoeq ler-awr, zaqsiq tsawrganr maqanr-eu zaqmiq aqbur deuq-anr shuirtawv-euq mae. Zaqmiq aqbur khoerdeuq-aq, iqbax-euq khavbaev kan-awr, nuikhanr ghawqmya jeq-euq maeqnan cantae luf-eu mae.

⁷ Aqyawf maf-aq, aqmyanluf dzawluf-eu khawf, yawtsaq yawdawr jeq-anr tiqjawr-iq maq siqnya lar-a.

⁸ Arhuba, Yaqneq hawr-eu Yaqbeq, Morseq maeq-eu dawq-anr lavtsoeq-euq lof-aer, tsawrhaq heudeuq khawf, yawtsaq yawdawr jeq-anr lavtsoeq luf-eu mae. Aqyawf maf-euq sharnoeq sharsawx-eu nuima kafduiqni pyeuf-ir-awr, aqyawf maf-euq jan-eu jeq tsermr haw-eu gar maq daqcoer-a.

⁹ Aerkhawf, aqyawfmaf maeqhu paw maq irganr nya-a. Aqjeq mirnae aernar-aq, tsawrhaq khoer nyiq ghaq zaqsiq tsawrganr maqanr nga laer tsawrhaq dawqtawv luf-euq maeqshi byacaevni dovlar-euq lof-aer, tsawrhaq heudeuq khawf, zaqsiq tsawrganr maqanr nga laer byacaevni dovlar taef-a.

Miqyaer Nae Bi Noeqdov-euq Yaerdawq

¹⁰ Aerkhawf, nawr-aq, ngaq-euq dawqmaeq dawqtsov, mr-awr shar-eu, noeqtmq-eu, jan-eu, nuinoeq ghawqmanrni noeq-eu, gaq-eu, or-eu nuima anr-eu, heudeuq-anr yawmuiq-aer cantae-euq mae.

¹¹ Khoeruqtaf, khaeq-awr khav-eu jeq hawr-eu shaqzanq nargawr daqgar khawf nawr yawmuiq-aer cantae-euq mae. Aqdirawq, Irgawrnir hawr-eu Lurdaqlar-anr jawr ngae, ngar yadaq duidui-euq ma. Aerkhawf, khaeq-awr khav-eu khoerdeuq dawqtawv luf-euq lafkhoer nae, Sanqpaq Yeqsur, ngaq-anr bibuq-ir naeqlaf-euq mae.

¹² Aqdir aernar-aq, Yeqsur Kali-euq lafkhoer Miqyaer-anr yawzeu bawbaw-aer khar daefmawf-eu tsawrhaq yawqghaq navluf, khaeq-awr khav-eu jeq-anr yadaq taef-a.

¹³ Aerkhawf, yawdoer jeq mr-eu tsawrhaq hawr-eu jaqmyawf maershuir shuir-eu tsawrhaq deuq-aq, ngaeq-aer nar-aq ngaeq-aer doerdzaeqlar taef-a. Aqyawfmaf, aqcawq-anr maershuir shuir-eu lof-aer, aqcawq khawf aqyawf maf-anr maershuirshuir taef-a.

¹⁴ Aerkhawf, nawr-aq, nawq nae yadzaw-awr, yawmuiq-aer janluf-eu deuq-anr zifdanni janzif taq-awq. Aqjeq mirnae aernar-aq, nawr aqsur ghaq-anr dzaw-euq le laer nawr siqnya-eu mae.

¹⁵ Khoeruqtaf, nawr-aq, nyir ngae nae Yawshawr Yaerbof-anr siqnya luf-eu mae. Yaerbof khoer-aq, nawr, Yeqsur Kali-anr jan-eu mirnae, kakhof-eu jeq za’nya-eu zaqsiq tsawrganr bifnya-eu mae.

¹⁶ Yaerbof dawqtawvluf Miqyaer nae bi noeqdov-awr boftaq-euq mae. Yaerbof-aq, gardanr heulof-aer tsoeq-eu mae: maeqnaeq tsovnaeq-eu, yawlaeq toeqmaeq-eu, maeqpar tsovpar-eu hawr-eu tsaq-awr dawr-eu lafkhoer daefni maeqbym-eu uqtaf,

¹⁷ Miqyaer-euq tsawrhaq deuq byanlar kuflar-awr, yawmuiq yawqjeq navluf mrnya larni laeqhmq-eu gharduq mae.