2 Tiˆmoˇseˬ 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yeqsur Kali-euq Muiq-eu Guirzaq

¹ Khoermirnae, ngaqli-or! Nawr, Yeqsur Kali-euq guiqlanq yawdzanr-euq lafkhoer ghaq khavlar-awq.

² Tsawrkaq ghawqmya ghaq-euq maeqshi, ngaq nae maeqnaeq tsovnaeq-euq gar nawr yagaq-euq khoerdeuq, sarjax zif-awr aqcawq-anr maeqnaeq tsovnaeq nya-eu tsawrhaq deuq-anr khawf a’naeq-awq.

³ Yeqsur Kali-euq zawr muiq-eu guirzaq lof-aer, nawr, ngaq naeq-aer khaeq-awr khav-eu jeq-anr daq-awq.

⁴ Guirzaq geuf-eu aqgeu ghaq maqkaq, guirdzoeq aqyuif ghaq-euq nuikhanr shirni mr-eu gharduq, yawqha-euq gardeuq yawqha-euq daefzir-anr maqbi banqni ya byaerdzae-eu mae.

⁵ Nirgha caecae-eu tiq ghaq nirgha caecae ngae, zanr jav-eu lof-aer maq nirgha nar-aq, ghaqler-euq uqdzanq maq za’nya-a.

⁶ Yar mr-eu yawbym tiq ghaq-aq, sanqlanq ghawqdar aqcawq-euq jeqhu nae za taef-a.

⁷ Ngar aerluf-eu dawq heudeuq-anr nawr yawmuiq paq-aer sharnoeq de-eq. Aqjeq mirnae aernar-aq, nawr yawqjeq navluf-anr ghovshawnya larni, Sanqpaq Yeqsur, nawq-anr zaqsiq tsawrganr bifnaeqlaf taef-a.

⁸ Yeqsur Kali-aq, Daqbir-euq aryoeq pyeuf-awr, shir-euq gar nae ghofdaef lar-euq mae laer taqngaer de-eq. Heu-aq, ngaq nae guiqlanqdawq maeq-euq gar tsaq-eu mae.

⁹ Guiqlanqdawq heu baqda’nae, yawdoer jeq mr-euq tsawrhaq tiq ghaq-anr shmrcav nae paf-eu lof-aer, ngaq-anr paf-awr, ngar shaq-awr zanq-eu jeq-anr ya daqluf-eu ma. Aerkhawf, Miqyaer-euq dawq-anr shmrcav nae maq paftawf nya-a.

¹⁰ Khoermirnae, tserdov taq-euq tsawrhaq deuq khawf, Yeqsur Kali-euq lafkhoer anr-eu kakhof-eu jeq za’ni, ngar yawqjeq navluf-anr orluf-eu ma. Kakhof-eu jeq khoer naeq-aer tiqkawv lof-aer li-eu maqbawni zif-eu yawshaef khanqsaer khawf za taef-a.

¹¹ Dawq heudawq-aq, jancoer paq-aer ghae-eu mae: Aqdui Kali naeq-aer shir nar-aq, Kali naeq-aer yadaef taef-a.

¹² Aqdui daqcoer orcoer nar-aq, aqyawf naeq-aer tiqkawv lof-aer dzoeqdzaq ya’mr taef-a. Aqdui, aqyawf-anr maq hageuf nar-aq, aqyawf khawf aqdui-anr maq hageuf-ar.

¹³ Aqdui sarjax maqzif khawf, aqyawf-aq, sarjax zif-eu mae. Aqjeq mirnae aernar-aq, aqyawf-euq sarjax-anr aqyawf maq byaerdzae-ar.

Miqyaer Nuikhanr Shir-eu Gar Mrzaq

¹⁴ Garkawv heudeuq nawr, tsawrhaq yawqghaq navluf-anr ja’noeq naeq-awq. Dawqdeuq-euq garkawv tsawrpyaer taqpyaer laer, Miqyaer-euq maeqshi nawr, aqyawf maf-anr yawkhav khav-aer maeqnaeq-awq. Khoerlof-aer pyaer-eu-aq, yawmuiq tiqjeq-iq maq dovlar-eu uqtaf, yagaq-euq tsawrhaq deuq-anr bicawv-ir-eu taef mae.

¹⁵ Nawr, Miqyaer-euq maeqshi, tsermr haw-eu jeq-anr daqdzeur nya-eu tsawrhaq, shafdawr khar maqza-eu gar mrzaq hawr-eu yawtsaq yawdawr-euq dawq-anr dawrcoeni maeqnaeq nya-eu tsawrhaq pyeuflarni laejae duidui-awq.

¹⁶ Miqyaer-anr yawzeu maqbawni aernirgha-eu dawq-anr garjaw jaw-awq. Aqjeq mirnae aernar-aq, khoerlof-aer aernirgha-eu tsawrhaq-aq, Miqyaer-anr yawzeu maqbaw-eu nuima ngaeq-aer nar-aq ngaeq-aer anrdzaeqlar taef-a.

¹⁷ Aqyawf maf-euq dawq-aq, awq-ir ya-ir-eu marnar-anr dur-eu mae. Aqyawf maf-euq lafkhoer, Huqmiqnaer hawr-eu Pirlaer khawf keuq-eu mae.

¹⁸ Aqyawfnyaf, “Ghofdaef lar-eu laer aer-eu jeq-aq dzeur-euq mae” laer aeraer-aer, yawtsaq yawdawr jeq-anr garbanq banq-awr, tsawrhaq ghawqmya ghaq-euq jan-eu nuima-anr lavcawv luf-eu mae.

¹⁹ Aerkhawf, Miqyaer nae zeurdanr danrtaq-euq jeq-aq, zifdanni javluf-eu mae. Zeurdanr-euq khoertav jmq heulof-aer diqtaq-euq mae: “Sanqpaq Miqyaer-aq, aqyawf-euq tsawrhaq deuq-anr siqnya-eu mae,” (Bts 16:5) hawr-eu, “Kali-euq tsawrmyanr-anr kharkur-eu tsawrhaq yawqghaq navluf, maqtsaq maqdawr-eu jeq-anr aqdir byaerdzae-awq” laer boftaq-euq mae.

²⁰ Nymr nymrma tiq nymr-euq lafkhoer, pyur hawr-eu shuir nae taevtaq-euq keuka taef-aer jav-eu maqngeur-a. Darkawq nae janrtaq-euq hawr-eu mirtsaq nae taevtaq-euq deuq khawf jav-eu mae. Tiqpavnav deuq-aq, yawbuibui ngae zmq-awr, tiqpavnav deuq-aq, kharngeur ngae zmq-eu mae.

²¹ Tsawrhaq tiq ghaq maqtsaq maqdawr-eu khoerdeuq-anr yawqhar yawqha tsiqshawr nar-aq, yawsanr ghaq zmqnya-eu lavshawr-euq, poeq-awr lawq-eu keuka pyeuflar-awr, yawmuiq yawqjeq navluf mr-eu gharduq laeqhmqdan taq-eu jeq pyeuf-eu mae.

²² Nawr zaqguq-euq nuikhanr jav-eu jeq-anr garjaw jaw-awq. Shawrjaevni ghae-eu nuima anr-eu lafkhoer Sanqpaq Yeqsur-anr tanqshar-eu tsawrhaq deuq naeq-aer tsaq-awr dawr-eu jeq, jan-eu jeq, gaq-eu jeq hawr-eu tsaqler dzoerler-eu jeq heudeuq-anr laejae-awq.

²³ Aerkhawf, zaqsiq tsawrganr maqanr-aer, tiqjeq-iq gardanr maqtsoeq-eu tsawrpyaer pyaer-eu jeq-anr garjaw jaw-awq. Aqjeq mirnae aernar-aq, khoerdeuq-aq, caedzaq-eu jeq bi dovlar-eu taef mae laer nawr siqnya-eu mae.

²⁴ Sanqpaq Yeqsur-euq zaqkhav-aq, aqcawq naeq-aer maqya cae-a. Aqyawf-aq, yawqghaq navluf-euq khoertav nuima nanqyuni taq-awr, aqcawq-anr maeqnaeq tsovnaeq nya-eu uqtaf, ornya-eu tsawrhaq yapyeuf-eu mae.

²⁵ Maeq-eu gar pyaerlar-eu tsawrhaq-anr nuinanq nuiyu anr-awr maeqnaeq nya-eu tsawrhaq khawf yapyeuf-eu mae. Khoerlof-aer janr nar-aq, aqyawfmaf yawtsaq yawdawr-anr siqnya larni, Miqyaer, aqyawf maf-anr bi noeqpov bi noeqpar lar-eu baw-mr.

²⁶ Khoerngaejawr, aqyawf-euq nuinoeq bigeuf-eu laer naef sanqpaq nae khoerdeuq-anr khmrpaf taq-euq khawf, noeqbeur lar-awr, aqyawf-euq lanrju-anr nae yabuq-ir taef-a.