2 Gawˇliˬtu 9 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Kalizaq-euq Yawkaq Cawba-eu

¹ Tsawrshawr deuq-anr guiqlanq janrnaeq-eu garkawv, ngar, nawmaf-anr sanqbof maq bofanrlef khawf geufnya-eu mae.

² Aqjeq mirnae aernar-aq, nawmaf, aqcawq-anr cawba mawf-eu nuima anr-eu mae laer ngar siqnya ma. Khoermirnae, ngar, Maqgeqdawrniv mirkhanq-anr jawr-eu tsawrhaq deuq-anr, nawmaf nuima keuv-eu garkawv khanqsaer jaevluf-eu ma. Aqgaqyar mirkhanq-anr jawr-eu deuq laeqhmqdan taq-euq tiq khof byanlar-euq mae laer, ngar, aqyawf maf-anr aernaeq-euq ma. Nawmaf laejae duidui luf-eu baqda’nae, aqyawfmaf myaqni tiqpav-aq, mrmawf-eu nuima anrlar-euq mae.

³ Nawmaf mrluf-eu garkawv nga’maf khanqsaer jaevluf-eu heu, yawqngaef maqya pyeuf-ir-aer, ngaq nae aer-euq lof-aer nawmaf yawmuiq-aer laeqhmq taqni, ngar, maernmr heudeuq-anr khaerghae lef-euq ma.

⁴ Khoerlof-aer maqngeur nar-aq, Maqgeqdawrniv mirkhanq-anr jawr-eu tsawrhaq ngaq naeq-aer oe ngae, nawmaf maq laeqhmq taq-euq gar ya’mawr nar-aq, nga’maf nae nawmaf-anr yawduq baw-euq khoer-aq, shafdawr-eu jeq pyeuf-ir taef-a. Nawmaf ya shafdawr-eu gar ngeurdzaeq taqpar aerkeuv.

⁵ Khoermirnae, ngar maq oekeuv-euq minav-aer, nawmaf nae damq ma laer sarjax dzaqtaq-euq lof-aer yawmuiq-aer laeqhmq dantaq nya’ni, maernmr khoerdeuq-anr ghaq bif-awr, nawmaf jawr-eu gar yabi oe nga laer ngar noeq-euq ma. Nawmaf damq ngae, nuima maqkeuv-aer yadamq-eu mirnae damq-eu jeq maqbi pyeuf-aer, nuima jerloni damq-eu jeq bipyeuf-awq.

Laqkhaq Caertavni Bif-awr Damq-eu

⁶ Ngar heulof-aer aer ma: uicuiv taef-aer saeq-eu tsawrhaq-aq, uicuiv taef-aer yayaeq taef-a. Ghawqmya’ni saeq-eu tsawrhaq-aq, ghawqmya’ni yayaeq taef-a.

⁷ Yawqghaq navluf yawqha-euq nuima-euq lafkhoer noeqtsaev taq-euq lof-aer damq-awq. Nuima maqkeuv-eu mirnae damq-eu jeq taqbi pyeuf. Maqdamq-aer maq ghaenya-eu mirnae damq-eu jeq taqbi pyeuf. Aqjeq mirnae aernar-aq, laqkhaq caertavni damq-eu tsawrhaq-anr Miqyaer gaq-eu mae.

⁸ Nawmaf aqmyanluf yawqjeq navluf javlof-awr, yawmuiq yawqjeq navluf tiqbyan tiqlof mrnya’ni, Miqyaer, nawmaf-anr guiqlanq yawdzanr dawqtawvluf tiqbyanni bifnaeq nya-eu mae.

⁹ Yaerbof boftaq-euq lof-aer, “Aqyawf ghawqmya’ni saeq-awr, irshaqzaq-anr bifkhawq naeq-euq mae. Aqyawf-euq tsaq-awr dawr-eu jeq, li-eu maqbawni zif-eu mae.” (Jc 112:9)

¹⁰ Miqyaer, siqyoeq saeq-eu tsawrhaq-euq gharduq siqyoeq zanqnaeq-awr, dzaq-eu gharduq dzaqdzaq dawrdawr bifnaeq luf-ur! Aqyawf, nawmaf ka-eu gharduq, siqyoeq laeqhmq naeq-awr, nawmaf nae saeqtaq-euq siqyoeq khoer bibaw bi zale-eu uqtaf, tsaq-awr dawr-eu jeq bimyaq bi sanrlar luf-ur!

¹¹ Nawmaf, yawqjeq navluf-euq gharduq nuima jerloni bifnya damqnya paq-aer, yawqpaw navluf smrmuiq muiqlar taef-a. Heu-euq baqda’nae, aqcawq, Miqyaer-euq guiqlanq-anr jaceuq taef-a.

¹² Aqjeq mirnae aernar-aq, guiqlanq-euq gar heu-aq, tsawrshawr deuq mawf-eu jeq-anr cawba-eu taef-aer maqngeur-eu, tsawrhaq ghawqmya’ni Miqyaer-euq guiqlanq-anr jaceuq duidui-eu jeq khawf dovlar-eu mae.

¹³ Nawmaf, Kali-euq guiqlanq dawq-euq uqmov jawr-eu ma laer sarkir kamq-awr, aqyawf maf-anr khawf, tsawrhaq dawqtawv luf-anr khawf, nuima jerloni bifnaeq-eu guiqlanq-euq gar heu-anr aqcawq ya’mawr-awr, Miqyaer-anr ciqhuiq ciqmanr taef-a.

¹⁴ Miqyaer-euq guiqlanq yawdzanr nawmaf-euq lafkhoer jav-eu myaq duidui-eu mirnae, aqyawfmaf, nawmaf-anr mawrmawf duidui-awr, nawmaf-euq gharduq guiqlanqshar taef-a.

¹⁵ Maq aerjir coer-eu lafsawq bifnaeq laf-euq Miqyaer-anr jaceuq kar-eur.