2 Gawˇliˬtu 8 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq Yawdzanr-euq Gar Mrbyan-awq

¹ Aqyuif aqnyir deuq-or! Nga’maf, nawmaf-anr Maqgeqdawrniv mirkhanq-anr jawr-eu Kalizaq armur deuq-anr Miqyaer, guiqlanq yawdzanr bif-euq garkawv bi siqmawf mir-a.

² Aqyawfmaf yawkhav-aer tsermr-eu shaqzanq daq-eu lafkhoer, laqkhaq caer-eu jeq byan-awr irshaqshaq duidui-eu khawf, nuima jerloni bif-awr damq-eu mae.

³ Aqyawfmaf khar ghaenya-eu lof-aer damq-euq uqtaf, maq ghaenya-eu gar keuvni laqkhaq caertavni damq-euq gar khawf, ngar sarkir kamqnya-eu ma.

⁴ Aqyawfmaf, tsawrshawr deuq-anr cawq cawq-eu gharduq guiqlanq pyeufnaeq-eu lafsawq hageuf naeqlaf laer, nga’maf-anr shar duidui-eu mae.

⁵ Khoeruqtaf, nga’maf nae noeqtmq-euq navmaqtser khawf aqyawfmaf janr-euq mae. Miqyaer nuima tsaq-eu lof-aer yawqha-euq mawrdo, Sanqpaq Miqyaer-anr jeqhu lawrnaeq-awr, khoernar-aq, nga’maf-anr khawf a’naeq laf-euq mae.

⁶ Tirtuv nae guiqlanq yawdzanr-euq gar heu mrdanq bae-euq lof-aer, nawmaf-euq ghanrcae khawf mrluiv-awq laer nga’maf, aqyawf-anr shar-euq ma.

⁷ Nawmaf-aq, jan-eu paw khawf, ngaeq-awr tmr-eu paw khawf, siqnya-eu paw khawf, laejae-eu paw hawr-eu nga’maf-anr gaq-eu paw khawf, mrbyan luf-eu lof-aer, guiqlanq yawdzanr-euq gar heudeuq dawqtawv luf-anr mrbyan-awq.

Yeqsur Kali-anr Hawgeuf-awq

⁸ Ngar heulof-aer aer-eu-aq, nawmaf-anr dawq bif-eu maqngeur. Aerkhawf, aqcawq laejae-eu garkawv ja’naeq-awr, nawmaf shawrjaevni gaq-eu jeq-anr tsermr-eu jeq pyeuf-eu ma.

⁹ Nawmaf, aqdui-euq Sanqpaq Yeqsur Kali-euq guiqlanq yawdzanr-anr siqnya luf-eu mae. Aqyawf smrmuiq muiq-eu khawf, nawmaf-euq gharduq irshaqzaq pyeufle-euq mae. Aqyawf irshaq shaqle-euq baqda’nae, nawmaf smrmuiq muiqlar-euq mae.

¹⁰ Ngar, garkawv heukawv-anr taf-eu, ngaq-euq nuinoeq nawmaf-anr heulof-aer aernaeq-eu ma. Heu-aq, nawmaf-euq gharduq yawmuiq mae. Aqjeq mirnae aernar-aq, nawmaf gar heuhmq mrmawf-awr, mirnuivkhof nae mrdanq baetaq-euq mae.

¹¹ Nymq-mr nawmaf gar heuhmq mrluiv-awq. Nawmaf mrmawf-eu nuima anr-awr danlar taq-euq mae. Khoermirnae, nawmaf jav-awr khar ghaenya-eu lof-aer mrluiv-awq.

¹² Aqjeq mirnae aernar-aq, yawbae jeq-aq, tsawrhaq tiq ghaq bifmawf-eu nuima anr nar-aq, aqyawf kharjav-eu lof-aer Miqyaer hageuf-eu mae. Maqjav-eu gar keuvni mr laer Miqyaer maqaer-a.

¹³ Ngar, aqcawq-euq khavbaev bipyar-ir-awr, nawmaf-euq khavbaev bi kanlar-eu laer janr-eu maqngeur.

¹⁴ Tiqkawv lof-aer dini mr-eu ma. Nymq-mr nawmaf ghawqmya’ni jav ngae, aqyawfmaf nym-eu gar nawmaf cawba naeqluf-eu mae. Aqkar nawmaf nym-awr, aqyawfmaf ghawqmya’ni jav ngae, nawmaf-anr cawba-awr, tiqkawv lof-aer dilar taef-a.

¹⁵ Yaerbof-euq lafkhoer boftaq-euq lof-aer, “Ghawqmya’ni ghovuiq-euq tsawrhaq-aq, ardzaeq maq dzerlar-aer; uicuiv taef-aer ghovuiq-euq tsawrhaq-aq, javlof-eu mae.” (Di 16:18)

Tirtuv Hawr-eu Gar Mrcawq

¹⁶ Ngar, nawmaf-euq gharduq nuima keuv-eu lof-aer, Tirtuv khawf nawmaf-euq gharduq nuima keuvni, Miqyaer janrnaeq laf-euq mirnae, Miqyaer-euq guiqlanq-anr jaceuq ma.

¹⁷ Aqjeq mirnae aernar-aq, Tirtuv-aq, nga’maf nae shar-euq dawq-anr geufnaeq laf-euq uqtaf, aqyawf nuima keuv duidui-eu mirnae, aqyawxyawf noeqtsaev-awr nawmaf jawr-eu gar oe-euq mae.

¹⁸ Nga’maf, maernmr nuighaq tiqghaq-anr khawf aqyawf naeq-aer bi’oe-euq ma. Kalizaq armur dawqtawvluf, aqyawf guiqlanqdawq maeqnya duidui-eu gar jaceuq-eu mae.

¹⁹ Khoer taef-aer maqngeur-eu, nga’maf naeq-aer tiqkawv lof-aer aqyuif aqnyir deuq nae damq-euq pyur khoer bi shaha-ir-eu laer, Kalizaq armur deuq, maernmr heughaq-anr tserdov-awr khaertaq-euq mae. Sanqpaq Miqyaer-euq yawshaef khanqsaer dovlarni hawr-eu aqcawq-anr cawba mawf-eu nawmaf-euq nuima byacaevni bi dovlar-eu laer nga’maf gar heu mrluf-eu ma.

²⁰ Nga’maf, aqcawq nae damqtaq-euq zawr myaq-eu pyur heu-anr dzoeqdzaq mrluf-eu gar, aqcawq, nga’maf-anr aerkhar maqbi za paq-aer nga’maf yanrluf-eu ma.

²¹ Sanqpaq Miqyaer-euq maeqshi taef-aer maqngeur-eu, tsawrhaqzaq-euq maeqshi khawf dawrcoeni mr ma laer, nga’maf noeqtsov taq-euq ma.

²² Aqyawfnyaf naeq-aer maernmr tiq ghaq parbi oecaw-euq ma. Nga’maf, maernmr heughaq-anr ghawqmya jeq ghawqmya pov tsermr haw-awr, aqyawf nuima keuv duidui-eu tiq ghaq ngar-a laer yasiq-euq ma. Nga’maf, nawmaf-anr yawduqbaw duidui-eu mirnae, nymq-mr aqyawf nuima par keuvdzaeq lar-euq mae.

²³ Tiqghaqnav siqnya’mawf nar-aq, Tirtuv-aq, ngaq-euq cawq pyeuf-awr nawmaf-anr gar mrnaeq luf-eu, ngaq-euq gar mrcawq mae. Maernmr heu nyiq ghaq-aq, Kali-euq yawshaef khanqsaer pyeuf-eu Kalizaq armur deuq-euq dawqtsaf dawqdzawr mr-eu tsawrhaq mae.

²⁴ Khoermirnae, nawmaf gaq-eu nuima anr-eu garkawv hawr-eu nga’maf, nawmaf-anr japoeq-euq khoer tsaq ngar-a laer aqyawfmaf mawrnya’ni, Kalizaq armur-euq maeqshi bi dovlar-awq.