2 Gawˇliˬtu 7 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹ Ngar zawr gaq-eu cawqdeuq-or! Aqdui sarjax heudeuq-anr zataq-euq mirnae, aqdui-euq mawrdo hawr-eu saflar-anr bi jawflar-eu yawqjeq navluf-anr tsiqshawr-awr, Miqyaer-anr guv-eu lafkhoer, yawshawr jeq bi byanlar kar-eur.

Pawrluv Nuima Pan-euq

² Nga’maf-anr nawmaf-euq nuima pannaeq laf-awq. Nga’maf tiqghaq-anr-iq maq mrlaeq-aq, tiqghaq-anr-iq maq lavcawv-aq, tiqghaq-anr-iq maq shuirdzaq haw-aq.

³ Ngar heulof-aer aer-eu-aq, nawmaf-anr yarkhaq dar-eu maqngeur. Shir khawf tiqkawv lof-aer shir-awr, daef khawf tiqkawv lof-aer yadaefni, nga’maf-euq nuima-euq lafkhoer nawmaf-anr gaq mir-a laer ngar, nawmaf-anr aernaeq dzeur-euq ma.

⁴ Ngar nuima khaqduqni nawmaf-anr ngaeqnaeq-eu ma. Ngar, nawmaf-euq baqda’nae khanqsaer jaevnya-awr, nuima sar-eu jeq byan mir-a. Nga’maf shaq-awr zanq-eu dawqtawv luf-euq lafkhoer khawf, ngar laqkhaqcaer duidui mir-a.

⁵ Nga’maf, Maqgeqdawrniv mirkhanq-anr larkeuv ngae, tiqjawr-iq ghaqnaq naq-eu maqdan-aq. Khoeruqtaf, nga’maf-euq tiqjawq nuima maqsar-eu jeq keuvle-eu gar yadaq-euq ma. Lafnyir paw iqdaeq iqcae dovlar luf-awr, lafkhoer paw guv-eu jeq anr-eu mir-a.

⁶ Aerkhawf, nuima nyir-eu tsawrhaq-anr nuima bi sarlar-eu Miqyaer-aq, Tirtuv larkeuv ngae nga’maf-anr nuima bi sarlar-euq mir-a.

⁷ Tirtuv larkeuv-euq mirnae taef-aer nuima sarlar-euq maqngeur-aer, aqyawf, nawmaf naeq-aer jawr ngae nuima sarlar-euq mirnae, nga’maf khawf nuima sarlar-euq mir-a. Nawmaf, ngaq-anr mawrmawf duidui-eu, nawmaf tsawrngoer ngoerluf-eu hawr-eu nawmaf, ngaq-anr nuima keuv duidui-eu garkawv heudeuq, aqyawf, ja’naeq laf-euq mirnae ngar laqkhaq caerdzaeq lar-euq mir-a.

Noeqshaq-eu Nyiq Jeq

⁸ Ngaq nae nawmaf-anr bofnaeq-euq sanqbof khoertaf nawmaf-anr bi noeqshaq-euq mirnae, yawbae ngar noeqshaq-euq khawf, nymq-mr maqpar noeqshaq mir-a. Aqjeq mirnae aernar-aq, sanqbof khoertaf nawmaf-anr tiqkhaeq taef-aer bi noeqshaq-euq gar ngar ya’mawr-euq ma.

⁹ Ngar, nawmaf-anr bi noeqshaq-euq mirnae, nymq-mr ngar laqkhaq caer-eu maqngeur. Nawmaf noeqshaq-eu khoer baqda’nae noeqpov noeqpar-euq mirnae, laqkhaq caer-eu mir-a. Nga’maf-euq baqda’nae, nawmaf guiqlanq tiqpawf-iq maqya smq-ir ni, Miqyaer nuima tsaq-eu lafkhoer nawmaf ya noeqshaq-euq mae.

¹⁰ Aqjeq mirnae aernar-aq, Miqyaer-anr yawzeu baw-eu lafkhoer noeqshaq-eu jeq-aq, kakhof-eu jeq za’ni noeqpov noeqpar-eu jeq bi dovlar-eu mirnae, nuima cawv paq-aer ghae-eu jeq maqngeur-a. Aerkhawf, mirtsaq-anr taf-eu noeqshaq-eu jeq-aq, shir-eu jeq-anr saqler-eu mae.

¹¹ Miqyaer-anr yawzeu baw-eu lafkhoer noeqshaq-eu jeq-aq, nawmaf-euq lafkhoer aqgeu jeq bi dovlar-euq nga laer sharnoeqhaw sher-eq: nawmaf laejae mawf-eu nuima anrlar-awr, yawqha-euq garkawv jashaw mawf-eu uqtaf, maqtsaq-eu jeq-anr nuima paer duidui lar-awr, Miqyaer-anr guv-eu jeq anrlar-euq uqtaf, yawmuiq jeq-anr za’mawf duidui lar-awr, yawmuiq jeq mrmawf-eu shaqdaef shaqnar anrlar-euq uqtaf, dawrcoeni yarkhaq darmawf lar-euq mae. Heudeuq dawqtawv luf-euq lafkhoer, nawmaf yawlaeq maqanr nga laer byacaevni dovlar-euq mae.

¹² Khoermirnae, ngar, nawmaf-anr sanqbof bofnaeq-euq-aq, mrbanq-euq tsawrhaq-euq gharduq maqngeur. Aqcawq mrbanq lar-eu gar ya daqluf-eu tsawrhaq-euq gharduq khawf maqngeur. Miqyaer-euq maeqshi nga’maf, nawmaf-anr arnavni khanqlanr-eu garkawv bisiqni bofanr lef-euq ma.

Tirtuv Laqkhaq Caer-eu

¹³ Nawmaf nuima sarlar-euq mirnae, nga’maf-euq nuima khawf sarlar-euq mir-a. Nawmaf dawqtawvluf Tirtuv-euq saflar-anr lavshuif-awr, laqkhaq bi caerlar-euq mirnae, nga’maf laqkhaq yawkhav-aer par caerdzaeq lar-euq mir-a.

¹⁴ Ngar maq shafdawrni Tirtuv-euq maeqshi, nawmaf-euq garkawv khanqsaer jaev-euq ma. Nga’maf, nawmaf-anr yawqdawq navluf dawrcoeni ngaeqnaeq-euq lof-aer, Tirtuv-euq maeqshi ngaq nae nawmaf-euq garkawv khanqsaer jaev-euq-aq tsaq duidui-eu mae.

¹⁵ Nawmaf dawqtawvluf, aqyawf-euq dawq narhaq geuf-awr, guv-eu lafkhoer yawdzuq gan’gan-aer aqyawf-anr ha-euq gar, aqyawf noeqdovlar ngae, aqyawf, nawmaf-anr ghoerdzaeqlar luf-eu mae.

¹⁶ Yawqjeq navluf-euq lafkhoer ngar, nawmaf-anr yawduq baw-eu mirnae, nymq-mr ngar laqkhaqcaer mir-a.