2 Gawˇliˬtu 6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Gar Mr Ngae Yadaq-eu

¹ Nawmaf, Miqyaer-euq guiqlanq yawdzanr hageuf-euq khoer yawqngaef-aer taqbi pyeuf laer Miqyaer-euq gar mrcawq pyeuf-awr mrluf-eu nga’maf, nawmaf-anr tanqshar-eu ma.

² Aqjeq mirnae aernar-aq, Miqyaer aer-eu, “Aryamq tsaq ngae, ngar, nawq-euq shardawq-anr narhaq-euq ma. Kakhof-eu arnan ngae nan, ngar, nawq-anr cawba-euq ma.” (Isy 49:8) Hawsher-eq. Nymq-mr-aq, aryamq tsaq-eu mae. Iqnan-aq, kakhof-eu arnan mae.

³ Nga’maf guiqlanq-euq gar mr ngae, aqcawq dawqdoer maqbi ngaeqlar nya’ni, sanqtiftif paq-aer ghae-eu jeq tiqjeq-iq maqmr-aq.

⁴ Aerkhawf, nga’maf yawqjeq navluf-euq lafkhoer yawqhar yawqha, Miqyaer-euq guiqlanq-euq gar mrzaq ma laer noeqpoeq-awr, heudeuq-anr yadaq-euq ma: yawkhav-aer ya’or-eu, shaqzanq myaq-eu, mawf-awr nym-eu, noeqshaq-eu,

⁵ diq-eu, kuv-anr dawv-eu, tsawrhaq baqmaf-aer luiqgha lar-eu, gar yawkhav-aer mr-eu, maqya yufkhav daev-eu hawr-eu maqya dzaq maqya dawr-eu, heudeuq-anr daqdaq-aer mr-euq ma.

⁶ Nuima shawr-eu, siqnya-eu tsawrganr zmq-eu, nuinoeq ghawqmanrni noeq-eu, ghawqshaq gaq-eu, Yawshawr Saflar-anr ghoe-eu, nuima shawrjaevni gaq-eu,

⁷ yawtsaq yawdawr-euq dawq maeq-eu, Miqyaer-euq baoq-anr ghoe-eu, tsaq-awr dawr-eu guirdeuv keuka, arcar armar-aer tuvtaeq taq-awr mr-euq ma.

⁸ Taqhuiq naeqlaf-awr, taqteq naeqlaf ngae khawf, yawmuiq ja-awr, yawdoer ja’naeqlaf ngae khawf, jaqmyawf maershuir aer-eu khawf, dawrcoeni mr-euq ma.

⁹ Aqcawq tiqghaq-iq maq siqnya-eu tsawrhaq-anr dur-eu khawf, aqcawq ghawqmya’ni siqnya-eu mae. Shirtaw taeqni pyeuf-ir-euq tsawrhaq-anr dur-eu khawf, daefluf-eu tsawrhaq ma. Diq-eu gar yadaq-euq khawf, saef-eu gar maqya daq-aq.

¹⁰ Noeqshaq-eu gar dur-eu khawf, aqmyanluf laqkhaqcaer luf-eu ma. Irshaq shaq-eu tsawrhaq-anr dur-eu khawf, tsawrhaq ghawqmya ni-anr smrmuiq bi muiqlar-eu ma. Tiqjeq-iq maqjav-eu gar dur-eu khawf, yawqjeq navluf jav-eu tsawrhaq ma.

¹¹ Gawrliqtu-anr jawr-eu deuq-or! Nga’maf-euq nuima jerloni pan-awr, khaqmae mrnga-awr nawmaf-anr ngaeqnaeq-euq ma.

¹² Nawmaf-euq nuima-aq, nga’maf-euq baqda’nae piqtaeq taq-euq maqngeur-a, yawqha-euq nuinoeq-euq baqda’nae piqtaeq taq-euq mae.

¹³ Nawmaf khawf, ngaq-anr nuima jerloni pannaeq laf-awq laer yawqha-euq zaq-anr ngaeqnaeq-eu lof-aer aer-eu ma.

Yawshawr Shawr-aer Daef-awq

¹⁴ Nawmaf, Kali-anr maqjan-eu tsawrhaq naeq-aer taqgawf. Tsaq-awr dawr-eu jeq hawr-eu zanrdawq-anr leur-eu jeq aqjox-aer gmler nya-eu? Yawshaef hawr-eu yawzanr cawq aqjox-aer cawqtaf nya-eu?

¹⁵ Kali hawr-eu Beqleqlar aqjox-aer gmler nya-eu? Kali-anr jan-eu tsawrhaq hawr-eu maqjan-eu tsawrhaq cawqtaf nya-eu aqjeq jav-eu la?

¹⁶ Miqyaer-euq uqduq tanqnymr nymrma hawr-eu tanqpanq aqma mawrkawr aqjox-aer tsaqler dzoerler nya-eu? Aqjeq mirnae aernar-aq, nawmaf-aq, daefluf-eu Miqyaer-euq uqduq tanqnymr nymrma mae. Miqyaer nae aertaq-euq lof-aer, “Ngar, aqyawf maf-euq lafkhoer jawr-awr, aqyawf maf-euq ghanrcae can ma. Ngar, aqyawf maf-euq Miqyaer pyeuf-awr, aqyawfmaf, ngaq-euq tsawrhaq pyeuf taef-a.” (Lb 26:12; Ezk 37:27)

¹⁷ Khoermirnae, “Aqyawf maf-euq lafkhoer nae dovlar-awr, aqyawf maf-anr ghawqtsaev tsaev-awq. Maqshawr-eu jeq-anr taq toeqciv. Maq toeqciv nar-aq, ngar, nawmaf-anr hageuf ma.” (Isy 52:11; Ezk 20:34)

¹⁸ “Ngar, nawmaf-euq Aqda pyeuf-awr, Nawmaf-aq, ngaq-euq zaqmiq hawr-eu zaqyo pyeuflar taef-a laer, Baoq huiq duidui-eu Sanqpaq Miqyaer aer-eu mae.” (2Sml 7:8,14)