2 Gawˇliˬtu 4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Guiqlanq Dawq-euq Yawshaef Khanqsaer

¹ Miqyaer ghawqshaq gaq-eu baqda’nae, nga’maf guiqlanq-euq gar heu za-euq ma. Khoermirnae, nga’maf nuighaq maqbaq.

² Aerkhawf, nga’maf shafdawrlar paq-aer ghae-eu zaftaq-euq jeq byaerdzae jir-awr, jaqmyawf-euq lafkhoer maqdaef-aer, maershuir maqanrni, Miqyaer-euq dawq khawqluf-eu ma. Khoermirnae, Miqyaer-euq maeqshi, tsawrhaq dawqtawv luf-euq zaqsiq nuisiq-anr tsaqni, yawtsaq yawdawr-aq, nga’maf-anr byacaevni ciqpoeq luf-eu mae.

³ Nga’maf maeqluf-eu guiqlanq dawq-anr daeqkaq taq-euq jav-eu ngeur nar-aq, cawv-ir luf-eu tsawrhaq-euq gharduq daeqkaq taq-euq mae.

⁴ Maqjan-eu tsawrhaq-anr Miqyaer-euq shaevdzeuf pyeuf-eu Kali-euq yawshaef khanqsaer byadov lef-eu guiqlanqdawq, maqbi bya’naeq-eu gharduq, heuzir-euq miqyaer, aqyawf maf-euq nuima-euq myavnuiv bibaef-ir taq-euq mae.

⁵ Nga’maf-aq, yawqha-euq garkawv dawqmaeq maeqluf-eu maqngeur. Yeqsur Kali-aq, Sanqpaq Miqyaer mae laer maeq-eu uqtaf, nga’maf-aq, Yeqsur-euq gharduq nawmaf-euq zaqkhav pyeufluf-eu ma.

⁶ Yawzanr-anr nae yawshaef byadov larni dawq bif-euq Miqyaer-aq, aqdui-euq nuima-anr yawshaef bi byalar naeqlaf-euq mae. Heu-aq, Yeqsur Kali-euq myavpyawq-anr nae byadov lef-eu, Miqyaer-euq yawshaef khanqsaer-anr siqnya-eu tsawrganr biza-eu gharduq mae.

Mirtsaq Oeqlanq-euq Lafkhoer Anr-eu Poeq-eu Myawqganq

⁷ Huiq-awr muiq-eu baoq heu-aq, nga’maf-anr nae maqngeur-eu, Miqyaer-anr nae dovle-euq ngar-a laer bisiqni, nga’maf poeq-eu myawqganq heu, mirtsaq oeqlanq-euq lafkhoer anrluf-eu ma.

⁸ Nga’maf-anr yawqpaw navluf nyaefsuflar luf-eu khawf, nyaefpyaev lar-eu gar maqkeuv-a. Noeq ngae maqdov-eu khawf, noeqtmqkhar maqza-eu gar maqkeuv-a.

⁹ Khaeq-awr khav-eu gar yadaq-eu khawf, byaerdzae naeqlaf-eu gar maqkeuv-a. Diqlan naeqlaf-eu gar yadaq-eu khawf, diqsaef-eu gar maqkeuv-a.

¹⁰ Nga’maf-euq mawrdo-anr nae Yeqsur-euq daef-eu jeq byacaevni bi dovlar nya’ni, nga’maf-euq mawrdo-euq lafkhoer aqmyanluf Sanqpaq Yeqsur shir-euq jeq piluf-eu ma.

¹¹ Aqjeq mirnae aernar-aq, Yeqsur-euq daef-eu jeq, shirnya-eu nga’maf-euq mawrdo-anr nae byacaevni dovlar nya’ni, nga’maf daefluf-eu deuq-aq, aqmyanluf Yeqsur-euq gharduq shirni a’naeq-eu gar ya daqluf-eu ma.

¹² Khoermirnae, nga’maf-euq lafkhoer shir-eu jeq gar mrluf-eu khawf, nawmaf-euq lafkhoer daef-eu jeq gar mrluf-eu mae.

¹³ “Ngar jan-eu mirnae ngar ngaeq-euq ma,” (Jc 116:10) laer Yaerbof boftaq-euq lof-aer, nga’maf khawf jan-eu mirnae, nga’maf ngaeq-eu ma.

¹⁴ Aqjeq mirnae aernar-aq, Sanqpaq Yeqsur-anr bi ghofdaef lar-euq khoerghaq, nga’maf-anr khawf Yeqsur naeq-aer tiqkawv lof-aer bi ghofdaef lar-awr, aqyawf-euq maeqshi, nga’maf-anr khawf nawmaf naeq-aer tiqkawv lof-aer yajawr taef-a laer siqnya ma.

¹⁵ Khoerdeuq dawqtawvluf, nawmaf-euq gharduq mae. Guiqlanq yawdzanr khoer, tsawrhaq ghawqmya ghaq-euq baqda’nae maeqkhawq ghae-eu naeq-aer, Miqyaer-euq guiqlanq-anr jaceuq-eu myaqlar-eu mirnae, Miqyaer-euq yawshaef khanqsaer huiq luf-ur.

Maq Mawrlar-eu Jeq-anr Haw-awr Daef-eu

¹⁶ Khoermirnae, nga’maf nuighaq maqbaq. Nga’maf-euq shiqshaq lafnyir paw cawv-ir luf-eu khawf, lafkhoer paw-euq saflar-aq, tiqnan sair tiqnan yawshuif pyeuflar luf-eu ma.

¹⁷ Nymq-mr nga’maf tiqkhaeq-euq lafkhoer ya daqluf-eu pyarsawvni ghae-eu shaqzanq heudeuq-aq, maq ciqcaev nya-eu myaq duidui-awr, mqmaq maqbyav yarzir, huiq-eu yawshaef khanqsaer-anr nga’maf-anr biza-eu gharduq mrluf-eu jeq pyeuf-eu mae.

¹⁸ Khoermirnae, nga’maf-aq, mawrlar-eu jeq-anr hawluf-eu maqngeur. Aerkhawf, maq mawrlar-eu jeq-anr hawluf-eu ma. Aqjeq mirnae aernar-aq, mawrlar-eu jeq-aq, tiqkhaeq larkhaeq taef-aer jav-awr, maq mawrlar-eu jeq-aq, mqmaq maqbyav yarzir gmq-eu mae.