2 Gawˇliˬtu 3 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Dawqma Sarjax Yawshuif-euq Gar

¹ Nga’maf, ardanq bae-awr, yawqhar yawqha ciqpoeq-eu laer parghae-eu nga lor? Tsawrhaq tiqpavnav deuq janr-eu lof-aer, aqcawq nae nga’maf-euq garkawv nawmaf-anr bofnaeq-euq, ciqpoeq-eu sanqbof yageuf-eu la laq? Maqngeur nar-aq, nawmaf nae nga’maf-anr ciqpoeq-euq sanqbof yageuf-eu la lor?

² Nawmaf-aq, nga’maf-euq nuima-anr boftaq-euq ciqpoeq-eu sanqbof mae. Tsawrhaq dawqtawvluf sanqbof heu-anr yagui-awr siqnya-eu mae.

³ Nawmaf-aq, Kali nae nga’maf-anr ghoe-awr boftaq-euq sanqbof ngar-a laer byacaevni javluf-eu mae. Sanquir nae boftaq-euq sanqbof maqngeur-a, daefluf-eu Miqyaer-euq Saflar nae boftaq-euq mae. Khaqlo terbyaf-anr boftaq-euq khawf maqngeur-a, shiqshaq-euq terbyaf pyeuf-eu nuima-euq lafkhoer boftaq-euq sanqbof mae.

⁴ Nga’maf, Miqyaer-euq maeqshi Kali-anr ghoe-awr heulof-aer janzif luf-eu ma.

⁵ Nga’maf, yawqha-euq ghaq-anr ghoe-awr, yawqha taef-aer tiqjeqnav mrnya ma laer aer-eu maqngeur. Aerkhawf, nga’maf, Miqyaer-euq ghaq-anr ghoe-awr mrnya-eu gar aer-eu ma.

⁶ Nga’maf, dawqma sarjax yawshuif-euq guiqlanq-euq gar bi mrnya larni Miqyaer, nga’maf-anr janrnaeq laf-euq mae. Dawqma sarjax heu-aq, sanqbof armawr-anr taf-eu maqngeur-a, muiq-eu Saflar-anr taf-eu mae. Aqjeq mirnae aernar-aq, sanqbof armawr-aq, lavsaef-eu khawf, muiq-eu Saflar-aq, daef-eu jeq bif-eu mae.

Dawqma Sarjax Yawshuif-euq Khanqsaer

⁷ Shir-eu jeq-euq gar-aq, khaqlo-euq khoertav tafbof taq-awr yawshaef-euq lafkhoer dovlar-euq mae. Morseq-euq myavpyawq-anr byadov lef-eu yawshaef khoer byov-ir luf-eu khawf yawshaef ardzaeq-aer khav-eu mirnae, Irsaqleqlav tsawrhaq, aqyawf-euq myavpyawq-anr maq hawnya nar-aq,

⁸ muiq-eu Saflar-anr taf-eu guiqlanq-euq gar ngeurdzaeq, yawshaef khoernav maqtser khavdzaeq-eu maqngeur-a lor?

⁹ Laeq-ir-euq mirnae yarkhaq dar-eu jeq, yawshaef khanqsaer jav-eu ngeur nar-aq, tsaq-awr dawr-eu tsawrhaq bi pyeuflarni mr-eu guiqlanq-euq gar ngeurdzaeq, yawshaef khanqsaer yawkhav-aer huiqdzaeq-eu mae.

¹⁰ Nymq-mr-euq yawshaef khanqsaer heu huiq duidui-eu mirnae, yawbae jav-eu yawshaef khanqsaer khoer-aq, yawshaef khanqsaer maqjav-eu gar dur-eu mae.

¹¹ Byov-ir luf-eu jeq khawf yawshaef khanqsaer jav-eu ngeur nar-aq, gmq-eu jeq-aq, khoernav maqtser yawshaef khanqsaer javdzaeq-eu mae.

¹² Aqdui heulof-aer noeqtmqkhar za-eu mirnae, aqdui nuima khaqduqni ngaeqpeuq tmrpeuq-eu ma.

¹³ Byov-ir luf-eu yawshaef khanqsaer-anr arsaqsaq ngae keuvni, Irsaqleqlav tsawrhaq maqbi haw-eu laer Morseq, aqyawf-euq myavpyawq-anr saqpar daeqkaq taq-euq mae. Aqdui khoerlof-aer maqjanr.

¹⁴ Aqyawf maf-euq nuima-euq myavnuiv-aq, baef-ir taq-euq mae. Iqnan keuvni dawqma sarjax yawoer-anr gui ngae, daeqkaq taq-euq saqpar khoer maq yurdzae-aq siq. Aerkhawf, Kali-euq lafkhoer saqpar khoer yurdzae-euq mae.

¹⁵ Iqnan keuvni, Morseq nae boftaq-euq sanqbof-anr khargui ngae, aqyawf maf-euq nuima-anr saqpar khoer nae daeqkaq taq-euq mae.

¹⁶ Aerkhawf, tsawrhaq tiq ghaq Sanqpaq Yeqsur jawr-eu paw ghoflar-euq naeq-aer, daeqkaq-eu saqpar khoer khawf yurdzae-eu mae.

¹⁷ Sanqpaq Miqyaer-aq, muiq-eu Saflar pyeuf-eu mae. Sanqpaq Miqyaer-euq Saflar aqgeugar jawr-eu ngeur nar-aq, khoergar buq-ir-eu jeq jav-eu mae.

¹⁸ Aqdui yawqghaq navluf-euq myavpyawq-anr saqpar maq daeqkaqni, pyawqhaw-anr hawluf-eu lof-aer, Sanqpaq Miqyaer-euq yawshaef khanqsaer-anr hawluf-eu ma. Aqdui, Sanqpaq Miqyaer-euq shaevdzeuf-anr durlarni, Sanqpaq Miqyaer-euq Saflar-euq baqda’nae, yawshaef khanqsaer tiqtiv sair tiqtiv javdzaeqlar luf-eu ma.