2 Gawˇliˬtu 2 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹ Ngar, nawmaf jawr-eu gar paroe ngae, noeqshaq-eu lafkhoer maqoe laer noeqtsaev taq-euq ma.

² Ngar, nawmaf-anr bi noeqshaq nar-aq, aqsur ghaq, ngaq-anr laqkhaq bi caerlar nya-eu la? Ngaq nae bi noeqshaq-euq tsawrhaq taef-aer ngaq-anr laqkhaq bi caerlar nya-eu mae.

³ Khoermirnae, ngar oekeuv ngae, ngaq-anr laqkhaq bicaer paq-aer ghae-eu tsawrhaq, ngaq-anr bi noeqshaq-eu tsawrhaq maqya pyeuf-ir ni, ngar, nawmaf-anr sanqbof heu bofanr lef-euq ma. Ngaq-euq laqkhaq caer-eu jeq-aq, nawmaf dawqtawv luf-euq laqkhaq caer-eu jeq pyeuf taef-a laer ngar yawduqbaw luf-eu ma.

⁴ Dzeurlaf ngae, ngar nuima-euq lafkhoer shaqzanq mr duidui-awr, khanqlanr duidui-eu lafkhoer, myavbir juju-aer nawmaf-anr sanqbof khoer bofanr lef-euq ma. Nawmaf-anr bi noeqshaq-eu laer bofanr lef-euq maqngeur, ngar, nawmaf-anr gaq duidui ngar-a laer nawmaf yasiqni bofanr lef-euq ma.

Iqbax Pyaeqnaeq-awq

⁵ Tsawrhaq tiqghaqnav aqcawq-anr bi noeqshaq nar-aq, ngaq-anr bi noeqshaq-eu maqngeur-a, nawmaf yawqghaq navluf-anr khawf uicuivnav bi noeqshaq-eu mae. Uicuivnav laer aer-eu-aq, ardzaeq dzeurni maq aermawf nya.

⁶ Khoerlof-aer ghae-eu tsawrhaq-anr, nawmaf myaqni tiqpav aqyawf-anr khoerlof-aer darnaeq-euq-aq ghaq taef-a.

⁷ Aerkhawf, aqyawf ardzaeq noeqshaq dzeur-awr, maqya cawv-ir ni, nawmaf, aqyawf-anr iqbax pyaeqjir naeq-awr, aqyawf-anr bi noeqsar lar-eu tsaq taef-a.

⁸ Khoermirnae, nawmaf, aqyawf-anr aqdir gaq-eu ngar-a laer aqyawf yasiqni, nawmaf, aqyawf-anr janrnaeq-awq laer ngar, nawmaf-anr ghaq bif-eu ma.

⁹ Nawmaf, yawqjeq navluf-euq lafkhoer narhaqgeuf luf-eu nga lor laer, nawmaf-anr tsermr haw-eu gharduq ngar sanqbof khoer bofanr lef-euq ma.

¹⁰ Nawmaf, tsawrhaq tiqghaq nav-euq iqbax-anr pyaeqnaeq nar-aq, ngar khawf khoerghaq-euq iqbax-anr pyaeqnaeq ma. Ngar iqbax tiqjeqnav pyaeqnaeq-eu-aq, nawmaf-euq gharduq Kali-euq maeqshi pyaeqnaeq-eu ma.

¹¹ Maqngeur nar-aq, naef Saqdaq heulof-aer ghae-eu yamq-anr zmq-awr, aqdui-anr ghaqlar nya-eu baw-mr. Aqjeq mirnae aernar-aq, aqdui, aqyawf-euq bawqtov-anr maq siqnya-eu maqngeur.

Kali-euq Baqda’nae Ghaqler-eu

¹² Kali-euq guiqlanqdawq maeq-eu laer ngar, Daqlor-anr larkeuv ngae, Sanqpaq Miqyaer, ngaq-euq gharduq larghov pannaeq laf-euq mae.

¹³ Aerkhawf, ngar, ngaq-euq maernmr Tirtuv-anr maqya mawr-euq mirnae nuima ghaqnaq maqdan-aer, khoergar jawr-eu tsawrhaq deuq-anr ghawq-awr, Maqgeqdawrniv mirkhanq-anr lar-euq ma.

¹⁴ Aerkhawf, Miqyaer-anr jaceuq ma. Aqyawf, aqmyanluf Kali-anr ghoe-awr ghaqler-eu lafkhoer, aqdui-anr sheuqghae naeqlaf luf-eu mae. Kali-anr siqnya-eu tsawrganr-euq baqda’nae dovlar-eu yawsaw jeq, Miqyaer, aqdui-anr ghoe-awr yawqgar navluf bi sawkeuv-ir luf-eu mae.

¹⁵ Aqjeq mirnae aernar-aq, aqdui maf-aq, buq-ir luf-eu tsawrhaq hawr-eu, cawv-ir luf-eu tsawrhaq-euq ghanrcae, Miqyaer-euq gharduq Kali-euq yawsaw jeq pyeuf-eu ma.

¹⁶ Aqdui-aq, cawv-ir luf-eu tsawrhaq-euq gharduq lavsaef nya-eu yawsaf pyeuf-awr, buq-ir luf-eu tsawrhaq-euq gharduq-aq, lavdaef nya-eu yawsaf pyeuf-eu ma. Heulof-aer aqsur ghaq janrnya la?

¹⁷ Tsawrhaq ghawqmya ghaq, pyur za’ni Miqyaer-euq dawq maeqluf-eu mae. Aerkhawf, nga’maf-aq, khoerlof-aer ghae-eu tsawrhaq maqngeur. Miqyaer-anr nae za-euq lof-aer Miqyaer-euq maeqshi, Kali-euq lafkhoer dawrcoeni maeq-eu ma.