2 Gawˇliˬtu 13 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Yawqhar Yawqha Tsermr-awq

¹ Heupov, ngar, nawmaf jawr-eu gar oe-eu smq pov tiqpov ma. “Nawmaf kharngaeq-eu yawqdawq navluf yawduq baw-eu jeq pyeuflarni, sarkir kamq-eu tsawrhaq nyiq ghaq smr ghaq yabi jawr-eu mae.” (Dm 19:15)

² Ngar, nawmaf jawr-eu gar nyiq pov tiqpov oe ngae aertaq yaf-euq lof-aer, nymq-mr ngar, nawmaf naeq-aer maqjawr-eu khawf, ngar oekeuv nar-aq, dzeurlaf ngae iqbax mr-euq tsawrhaq hawr-eu nuideuq dawqtawv luf-anr khawf maq taqnaeq laer bofanr lef-euq ma.

³ Kali, ngaq-anr ghoe-awr dawq ngaeqluf-eu nga lor laer nawmaf siqduq mawf-eu mirnae, ngar, khoerlof-aer aer-eu ma. Kali, nawmaf-euq lafkhoer gar mr-eu-aq ghaq maqanr-eu maqngeur-a, nawmaf-euq lafkhoer baoq huiq-eu mae.

⁴ Aqyawf, ghaq baq-eu lafkhoer lafyaq-euq khoertav bi tafsaef-euq mae. Aerkhawf, Miqyaer-euq baoq baqda’nae daefluf-eu mae. Nga’maf khawf, aqyawf-euq lafkhoer ghaq baq-eu tsawrhaq ma. Aerkhawf, Miqyaer-euq baoq baqda’nae, nawmaf-euq gharduq nga’maf, Kali naeq-aer yadaef taef-a.

⁵ Nawr jan-eu lafkhoer daefluf mir-a lor laer yawqhar yawqha tsermr haw-awr, nawr yawqhar yawqha pyaevtser haw-awq. Yeqsur Kali, nawmaf-euq lafkhoer jawrluf-eu gar nawmaf maq siqnya-eu le lor? Maqngeur nar-aq, tsermr haw-eu jeq-anr nawmaf maq daqcoer-euq le laq?

⁶ Nga’maf-aq, tsermr haw-eu jeq-anr maq daqcoer-eu tsawrhaq maqngeur nga laer, nawmaf siqnyalar taef-a laer ngar noeqtmq ma.

Pawrluv Nanqyuni Dzoermawf-eu

⁷ Nawmaf yawdoer jeq tiqjeq-iq maqya mrni, nga’maf, Miqyaer-anr guiqlanq sharluf-eu ma. Nga’maf tsermr haw-eu jeq-anr daqcoer ngar-a laer bi dovlar mawf-eu mirnae janr-eu maqngeur. Nga’maf tsermr haw-eu jeq-anr maq daqcoer-eu tsawrhaq lof-aer dur-eu khawf, nawmaf taqhuiq paq-aer ghae-eu jeq mrnya’ni, nga’maf guiqlanq sharluf-eu ma.

⁸ Nga’maf, yawtsaq yawdawr-anr lavtsoeq-eu jeq tiqjeq-iq maq mrnya nya. Nga’maf-aq, yawtsaq yawdawr-euq gharduq taef-aer ya’mr-eu mae.

⁹ Nga’maf ghaqbaqbaq ngae, nawmaf ghaq khav-eu mirnae, nga’maf laqkhaqcaer mir-a. Nawmaf kuflar byanlarni khawf, nga’maf guiqlanq sharluf-eu ma.

¹⁰ Khoermirnae, ngar, nawmaf jawr-eu gar oekeuv ngae, Sanqpaq Miqyaer nae ngaq-anr aryaq bifnaeq laf-euq lof-aer nawmaf-anr yawkhav-aer maqya janrnaeqni, ngar, nawmaf jawr-eu gar maqjawr ngae, garkawv heudeuq sanqbof bofanr lef-eu ma. Aryaq yawkhav-aer zmq-eu-aq, lavcawv-eu gharduq maqngeur-a, bihuiq bi manrlar-eu gharduq mae.

Arsaq Saq-eu Dawq

¹¹ Aqyuif aqnyir deuq-or! Ghawqdawq ngaeq-awr arsaqsaq ma. Nawmaf byanlar-awr, nuima sarlar-awr, nuinoeq tiqjeq taef-aer taq-eu uqtaf, tiqghaq tirghaq tsaqler dzoerler-awq. Khoerlof-aer janr nar-aq, gaq-eu jeq bif-awr nuisar bif-eu Miqyaer, nawmaf naeq-aer jawr taef-a.

¹² Nawmaf tiqghaq tirghaq shawr-eu maeqsaw saw-awr dawqcawq puq-awq.

¹³ Tsawrshawr dawqtawvluf nawmaf-anr dawqcawq puqanr lef-euq mae.

¹⁴ Sanqpaq Yeqsur Kali-euq guiqlanq yawdzanr, Miqyaer-euq gaq-eu jeq hawr-eu Yawshawr Saflar-euq lafkhoer cawq cawqtaf-eu jeq, nawmaf yawqghaq navluf-euq khoertav jav luf-ur. Aqmeq.