2 Gawˇliˬtu 11 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Pawrluv Hawr-eu Ghaqkhaer Janrgeuf-eu Deuq

¹ Ngar, aqdzawq argan-euq dawq uicuiv ngaeq-eu gar nawmaf bi ormawf mir-a. Nawmaf, ngaq-anr aqdir or naeqlaf-euq mae.

² Miqyaer, nawmaf-anr myavnav nav-eu lof-aer, ngar khawf nawmaf-anr myavnavnav mir-a. Aqjeq mirnae aernar-aq, nawmaf-aq, zaqyo aqli tiq ghaq-anr bi danqdzaq-ir-eu laer ngaq nae aertsaev taq-euq ma. Shawrjaevni ghae-eu miqdaf dafshawr lof-aer Kali-anr nawmaf a’naeq-eu laer ma.

³ Arlawr, aqyawf-euq jaqmyawf nae Erbav-anr maershuir shuirtawv-euq lof-aer, Kali-euq lafkhoer shawrjaevni ghae-eu nawmaf-euq nuima khoersiq byov-ir gar ngar guv mir-a.

⁴ Nga’maf nae dawqmaeq maeq-euq Yeqsur maqngeur-eu, Yeqsur nuighaq-euq garkawv maeqlar-awr, nawmaf nae hageuf-euq Saflar maqngeur-eu, saflar nuijeq-anr hageuf-eu uqtaf, nawmaf nae hageuf-euq guiqlanqdawq maqngeur-eu, guiqlanqdawq nuijeq-anr hageuf-awr nae zawr-aer daqnya-eu nga aerlawq!

Pawrluv Hawr-eu Ghaqkhaer Jaqmyawf

⁵ Ngar-aq, huiqdui gor duidui-eu ghaqkhaer khoerdeuq taf-aer tiqpawf-iq maqteq laer noeq-eu ma.

⁶ Ngar dawq ngaeq-eu paw maq dzawlaf-euq khawf, siqnya-eu tsawrganr paw-aq maqteq. Khoer-aq, yawqjeq navluf-euq lafkhoer nga’maf, nawmaf-anr byacaevni bimawr-euq ma.

⁷ Nawmaf-anr taqhuiq-eu laer ngar, yawqha-euq mawrdo-anr taqnyir-awr, arpoeq maqyurni nawmaf-anr Miqyaer-euq guiqlanqdawq maeqnaeq-euq mirnae, ngar iqbax mr-euq nga lor?

⁸ Ngar, nawmaf-euq gharduq guiqlanq-euq gar mrpoeq Kalizaq armur yawqmur yawq-anr yur-euq khoer-aq, tanrjoe joe-euq lof-aer dur-eu mae.

⁹ Ngar, nawmaf jawr-eu gar jawr ngae tiqjeqnav mawf-eu khawf, tiqghaq-iq-euq khavbaev maqbi pyeuf-aq. Aqjeq mirnae aernar-aq, Maqgeqdawrniv mirkhanq-anr nae oe-euq aqyuif aqnyir deuq nae ngar nym-eu jeq bifnaeq laf-euq mae. Dzeurlaf ngae, nawmaf-anr tiqjeq-iq maqbi dar-euq lof-aer, maeqhu paw khawf khoerlof-aer mrghae ma.

¹⁰ Ngaq-euq lafkhoer Kali-euq yawtsaq yawdawr jeq anr-eu mirnae, Aqgaqyar mirkhanq-anr jawr-eu tsawrhaq tiqghaq-iq ngar khanqsaer jaev-eu gar maq lavtsoeq nya-ar.

¹¹ Aqjeq mirnae la? Ngar, nawmaf-anr maqgaq-eu mirnae-a lor? Ngar, nawmaf-anr gaq-eu Miqyaer siqnya mae.

¹² Ngar aqjox-aer janr-eu tsaq la. Tsawrhaq khoerdeuq, nga’maf kharmr-eu jeq mrluf-eu ma laer aeraer-aer, khanqsaer jaev-eu laer laejae luf-eu gar lavtsoeq-eu gharduq, nymq-mr ngar khar mrluf-eu lof-aer maeqhu paw khawf mrdavlef ma.

¹³ Tsawrhaq khoerdeuq-aq, ghaqkhaer janrgeuf-eu deuq mae. Aqyawf maf-aq, Kali-euq ghaqkhaer deuq lof-aer janrgeuf-awr, jaqmyawf maershuir-euq gar mr-eu tsawrhaq mae.

¹⁴ Aqyawfmaf khoerlof-aer mr-eu gar taq zanqler. Aqjeq mirnae aernar-aq, naef Saqdaq khawf yawshaef-euq mqtav ghaqkhaer lof-aer janrgeuf nya-eu mae.

¹⁵ Khoermirnae, aqyawf-euq ghaqzaq ghaqkhaer deuq khawf, tsaq-awr dawr-eu kuirlaf zaqkhav janrgeuf-eu gar zanqlerkhar maqza-a. Aqyawfmaf nae kharmr-euq lof-aer arsaqsaq ngae aqyawfmaf yadaq taef-a.

Pawrluv Aqdzawq Lof-aer Khanqsaer Jaev-eu

¹⁶ Ngar tiq pov paraer ma, tsawrhaq tiqghaq-iq ngaq-anr aqdzawq argan nga laer taqnoeq. Aerkhawf, nawmaf, ngaq-anr khoerlof-aer noeq-eu ngeur nar-aq, ngar khanqsaer uicuiv jaevnya’ni ngaq-anr aqdzawq argan-anr hageuf-eu lof-aer hageuf naeqlaf-awq.

¹⁷ Ngar ngaeq-eu-aq, Sanqpaq Miqyaer bi ngaeqlaf-eu lof-aer ngaeq-eu maqngeur. Aqdzawq argan yawduq baw-eu lof-aer khanqsaer jaev-eu ma.

¹⁸ Haw ngae, tsawrhaq ghawqmya ghaq shiqshaq paw-euq garkawv khanqsaer jaev-eu lof-aer, ngar khawf khanqsaer jaev-eu ma.

¹⁹ Nawmaf-aq, tsawrganr anr-eu mirnae, aqdzawq argan deuq-anr laqkhaq caertavni daq-awr or-eu nga aerlawq.

²⁰ Tsawrhaq tiqghaqnav, nawmaf-anr zaqkhav bigeuf-awr, nawmaf-anr kawfsaef dzaqlar-eu uqtaf, nawmaf-anr myawfdzaq shuirdzaq lar-awr, yawqhar yawqha ciqgor-eu uqtaf, nawmaf-anr naqtaev taevlar-eu khawf, nawmaf daq-awr or-eu nga aerlawq.

²¹ Nga’maf khoerlof-aer janrni ghaqbaqbaq mir-a laer shafdawr-eu lafkhoer ya’aer-eu ngar-a! Aerkhawf, tsawrhaq tiqghaqnav aqjeq-euq garkawv-anr nae nuima khaqduqni ghae nar-aq, ngar khawf, nuima khaqduqni ghae ma. (Ngar heulof-aer ngaeq-eu-aq, aqdzawq argan lof-aer ngaeq-eu ma.)

Kali-euq Gharduq Shaqzanq Daq-eu

²² Aqyawfmaf, Heqbyaer tsawrhaq-a lor? Ngar khawf ngeur ma. Aqyawfmaf, Irsaqleqlav tsawrhaq-a laq? Ngar khawf ngeur ma. Aqyawfmaf, Aqbyaqhaq-euq aryoeq-a lor? Ngar khawf ngeur ma.

²³ Aqyawfmaf, Kali-euq ghaqzaq ghaqkhaer-a laq? Ngar, aqdzawq argan lof-aer ngaeq ma de-eq. Ngar, aqyawf maf-euq navmaqtser Kali-euq ghaqzaq ghaqkhaer ma. Ngar, aqyawf maf-euq navmaqtser gar mr-eu laejae-awr, maq guijir coerni diqlar khovlaf-eu gar yadaq-euq uqtaf, aqyawf maf-euq myavmaqtser kuv-anr urmyaq dzaeq-awr, shirtaw taeqni khawf ghawqmya pov daqhaw-euq ma.

²⁴ Ngar, Yurdav tsawrhaq nae 39 laf diqnaeq laf-eu gar ngaq pov keuvni yadaq-euq ma.

²⁵ Darkawq nae daelar-eu gar smq pov yadaq-awr, khaqlo nae biqlar-eu gar tiq pov yadaq-euq uqtaf, lawq cawv-ir-awr smq pov yashaq-awr, tiq nan tiq mir iqmalavshav-euq lafkhoer yajawr-euq ma.

²⁶ Ngar maqmyanr kaq-anr garma dov-ir-eu, ircuf huiq-eu gar guvkhar za-eu, tanrjoe-anr guvkhar za-eu, ngaq-euq tsawrjeuq tsawrca-anr guvkhar za-eu, aqcawq tsawrjeuq tsawrca-anr guvkhar za-eu, meuq-euq lafkhoer guvkhar za-eu, bawrtsanq bawrdanr-anr guvkhar za-eu, iqmalavshav-euq lafkhoer guvkhar za-eu, aqyuif aqnyir janrgeuf-eu deuq-anr guvkhar za-eu heudeuq-anr yadaq-euq ma.

²⁷ Laejae-awr gar mr-euq mirnae ghaqdoerdoer duidui-awr, maqmyanr kaq-anr maqya yufdaev-eu uqtaf, hawq maef-awr ircuf maef-eu hawr-eu ghawqmya pov maqdzaq maqdawrni dzanq-euq ma. Yawgav gavgav-aer nermyawvni khawf ya shaqhaw-euq ma.

²⁸ Lafnyir paw heudeuq-anr yadaq-eu uqtaf, Kalizaq armur dawqtawv luf-euq gharduq khanqlanr-eu jeq khawf, yawqnan navluf ngaq-anr uvtaeqle luf-eu mae.

²⁹ Tsawrhaq tiqghaqnav ghaqbaqbaq nar-aq, ngar khawf ghaq maqbaq-a lor? Tsawrhaq tiqghaq nav-anr sanqtif bitif nar-aq, ngar nuima maqpaer-ar laq?

³⁰ Ngar khanqsaer yajaev nar-aq, ngar ghaq baq-eu gawrkawv-anr taf-eu deuq taef-aer khanqsaer jaev ma.

³¹ Ngar jaqmyawf myawf-eu maqngeur-a laer, mqmaq maqbyav yarzir guiqlanq huiq-eu Sanqpaq Yeqsur Kali-euq Aqda Miqyaer siqnya mae.

³² Ngar, Daqmaqsaer-anr jawr ngae, ngaq-anr nyaefmawf-eu mirnae, sanqpaq Aqleqdar-euq lafov uvlanr-eu meuqsanr nae guirzaq deuq-anr Daqmaqsaer meuqlanni bilof-euq mae.

³³ Aerkhawf, aqcawq, ngaq-anr khavpuq-euq lafkhoer biur-awr nae, meuqlanr-euq kavpyawr-anr danr-eu larghovzaq-anr nae pyaeqka naeqlaf-euq mirnae, aqyawf-euq aqlaf-anr nae yabuq-ir-euq ma.