2 Gawˇliˬtu 10 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

Saflar Paw Guirdeuv Deuv-eu

¹ Ngar-aq, nawmaf naeq-aer jawr ngae nuinanq nuiyu anr-awr, nawmaf naeq-aer maqjawr ngae-aq, nuima khaqduqni ghae-eu Pawrluv ma. Nymq-mr ngar, Kali-euq nuinanq nuiyu hawr-eu nuima nanqyuni ghae-eu lafkhoer, nawmaf-anr shar-eu ma.

² Nga’maf shiqshaq-euq maeqnan daefluf-eu mae laer noeqluf-eu tsawrhaq-anr, yawduq baw-awr nuima khaqduqni janrnaeq ma laer ngar noeqtsaev taq-euq ma. Aerkhawf, ngar, nawmaf jawr-eu gar oekeuv ngae, nuima khaqduqni maqya janrni, ngar, nawmaf-anr tanqshar-eu ma.

³ Nga’maf-aq, shiqshaq-euq lafkhoer daefluf-eu khawf, shiqshaq-anr taf-eu guir deuvluf-eu maqngeur.

⁴ Nga’maf-euq guirdeuv keuka-aq, shiqshaq-anr taf-eu maqngeur. Zifdanni jav-eu lanrlof-anr gheuka nya-eu Miqyaer-euq baoq anr-eu keuka ma.

⁵ Yawqhar yawqha ciqgor-awr, Miqyaer-anr siqnya-eu tsawrganr-anr lavtsoeq-eu yawgor yawqjeq navluf hawr-eu, dawqpyaer pyaer-eu jeq-anr nga’maf pyavdzae luf-eu ma. Khoeruqtaf, nuinoeq dawqtawv luf-anr paf-awr, Kali-anr bi narhaq geuf-eu ma.

⁶ Nawmaf tiqbyan tiqlof narhaqgeuf ngae, maq narhaq geuf-eu yawqghaq navluf-anr darnaeq-eu laer nga’maf danlar taq-euq ma.

Pawrluv-euq Aryaq

⁷ Nawmaf myav-anr mawrlar-eu lafnyir paw taef-aer haw-eu le laq? Tsawrhaq tiqghaqnav yawqhar yawqha, Kali-euq tsawrhaq ma laer yawduqbaw nar-aq, aqyawf, Kali-euq tsawrhaq pyeuf-eu lof-aer, nga’maf khawf Kali-euq tsawrhaq ngar-a laer aqyawf par sharnoeq paq-aer ghae-eu mae.

⁸ Nawmaf-anr bicawv-ir-eu gharduq maqngeur-eu, nawmaf-anr bihuiq bi manrlar-eu laer Sanqpaq Miqyaer, nga’maf-anr aryaq bifnaeq laf-euq mae. Aryaq heu-euq garkawv, ngar khanqsaer uicuiv jaev-euq law-awr khawf, ngar maqya shafdawr-ar.

⁹ Ngar heulof-aer sanqbof bofanr lef-eu-aq, nawmaf-anr lavguv mawf-eu mirnae maqngeur.

¹⁰ Aqjeq mirnae aernar-aq, aqyawfmaf aer-eu, “Aqyawf nae bof-euq sanqbof-aq, kan duidui-awr, baoq khav duidui-eu khawf, aqyawf-euq mawrdo heugar jawr nar-aq, tiqpawf-iq ghaq maqanr-aer, aqyawf-euq dawq-aq shiqma maqnaf-a.”

¹¹ Nga’maf, nawmaf naeq-aer maqjawr ngae, nga’maf sanqbof bofanr lef-euq lof-aer, nga’maf, nawmaf naeq-aer jawr ngae khawf, aqdir heulof-aer janr taef-a laer, tsawrhaq khoerdeuq siqnya paq-aer ghae-eu mae.

¹² Nga’maf-aq, yawqhar yawqha ciqpoeq-eu tsawrhaq-anr maq ciqcaev peuq-aer, aqyawf maf-euq armur-anr maq keuqlerpeuq nya. Aqjeq mirnae aernar-aq, aqyawf maf-aq, tsawrganr maqanr-eu lof-aer, yawqha-euq yawkaq daeqdza haw-awr, tiqghaq tirghaq ciqcaev luf-eu mae.

¹³ Aerkhawf, nga’maf, khanqsaer jaev-eu ardzaeq maqbi dzeur. Miqyaer nae nga’maf-anr gar bi mrnaeq laf-euq mirkaq-euq lafkhoer khanqsaer jaev-eu taef ma. Nawmaf khawf, aqyawf nae nga’maf-anr bi mrnaeq laf-euq mirkaq-euq lafkhoer jawr-eu mae.

¹⁴ Nga’maf, nawmaf jawr-eu gar Kali-euq guiqlanqdawq pi-awr oe-euq ma. Khoermirnae, nawmaf-aq, nga’maf-euq aryaq-euq lafkhoer jawr-eu mae. Nga’maf yawqha-euq mirkaq taf-aer ardzaeq maq mrdzeur-aq.

¹⁵ Aqcawq nae mrtaq-euq gar, nga’maf nae mrtaq-euq janrgeuf-awr, khanqsaer ardzaeq-aer jaev-eu maqngeur. Aerkhawf, nawmaf jan-eu myaqlar-eu lof-aer, nawmaf-euq baqda’nae, Miqyaer, nga’maf-anr bi mrnaeq laf-euq mirkaq khawf huiqlar jerlarni, nga’maf noeqtmq luf-eu ma.

¹⁶ Khoerlof-aer pyeuflar nar-aq, nga’maf, nawmaf-euq jawrduq irdzeur ghae-awr, guiqlanqdawq ya’maeq taef-a. Aqcawq-euq mirkaq-euq lafkhoer, aqcawq nae mrpyeuf taq-euq gar nga’maf khanqsaer maqjaev.

¹⁷ Aerkhawf, “Khanqsaer jaevmawf-eu tsawrhaq-aq, Sanqpaq Miqyaer-euq lafkhoer khanqsaer jaev luf-ur!” (Ylm 9:25)

¹⁸ Aqjeq mirnae aernar-aq, yawqhar yawqha ciqpoeq-eu tsawrhaq-anr maqngeur-eu, Sanqpaq Miqyaer ciqpoeq-eu tsawrhaq-anr taef-aer hageuf paq-aer ghae-eu mae.